ئارۆ شەممە جە شارو ستۆکهۆڵم-و پایتەختو سویدی یەکەمین کۆنفڕانسو هەورامانشناسی جە بەرۊ وڵاتی بە دروشمو «پێۋەرە ژیۋای و گلێرگێۋی فرە ڕەنگ» ئەنجام مڎریۆنە و ژمارێۋ کەسێ پسپۆڕێ جە بوارە جیاۋازەکانە وابەستە بە هەورامانی بە بابەتێ زانستیێ بەشدارێش بانە.

جەی بارەۋە ئاریا بەزموونە ئەندام جە ڕاۋەبەری پلاتفۆرم-و هەورامی پەی ئاژانسەکەێمان فوڕات نیوزیش ئاشکرا کەرد: " کۆنفەڕانسو هەورامانشناسی یەک ڕۆ خاینۆنە و بە شێۋەی ئەوەکریا بریۆڕاۋ و هەر کەس متاۊنە  بەشدارش ببۆنە و مەبۆنە بە تریبوونێۋی ئازاد پەی بەشداربییەکانو سەرجەم زاراوەکانو زۋانی کوردی".

بەزموونە واتەنش: "جە کۆنفڕانسەکەنە کەسێ پسپۆڕێ و هەورامانشناسێ جە بوارێ جیاۋازێنە بەشدارێنێ و بابەتێشان سەرو «ئایین و باوەڕی، کلتور و زۋان، مێژوو و سیاسەت، سرووشت و ژیۋگە، ژەنی و هونەر» جە هەرێمو هەورامانی مەبۆنە و کە بریتیێنێ جە: "دکتۆر حوسەین خەلیقی نویسەر و سیاسەتمەدار، ئەهوەن چیاکۆ، ئەندام جە کۆنسەو ڕاۋەبەری گلێرگەو دیموکراتیک و ئازادو وەرهۆرزو کوردستانی-(کۆدار)، هەڵاڵه رافع چالاکەو ژەنان، حاتەم منبەری نویسەر، ئارێز ئەنداریاری نویسەر و ۋنەکۆڵەر، سەعید سەنەندەجی، چالاکوانو مافو مرۆڤی، ژاڵانە هەورامان هامسەرۆکەو پلاتفۆرم-و هەورامی".

جە کۆتاییەنە ئاریا بەزموونە واتیچش: "کۆنفڕانسەکە جە (Sollentuna Bibliotek ANIARAPLATSEN 2) ستۆکهۆڵمی بریۆڕاۋە و وازیار بی تا کوردێ ستۆکهۆڵمی و دەوروبەریش بە تایبەتی و سوید بەگردی بەشدارێش ببانە".