جە ستۆکهۆڵم کۆنفڕانسو هەورامانشناسی دەستش پنەکەرد

ئارۆ جە شارو ستۆکهۆڵم-و پایتەختو سویدی یەکەمین کۆنفڕانسو هەورامانشناسی جە بەرۊ وڵاتی دەستش پنەکەرد و جە بەشی یەکەمشەنە هامسەرۆکەو کۆداری و ژمارێۋ کەسێ پسپۆڕێ بابەتێشان پێشکەشێ کەردێ.

سەرسەبای ئارۆی شەممە، جە شارو ستۆکهۆڵم-و پایتەختو سویدی یەکەمین کۆنفڕانسو هەورامانشناسی جە بەرۊ وڵاتی بە دروشمو «پێۋەرە ژیۋای و گلێرگێۋی فرە ڕەنگ» ئەنجام دریا و ژمارێۋ کەسێ پسپۆڕێ جە بوارە جیاۋازەکانە وابەستە بە هەورامانی بە بابەتێ زانستیێ بەشدارێشەنێ و ژمارێۋ هامڵاتیێ کوردێ سویدی و ئەوروپای ئامادێش بیێ.

کۆنفڕانسەکە بەخێرئاۋردەی مێمانەکان دەستش پنەکەرد و سەرەتا ڕێز جە گیان بەختکەردەکانو ئازادی گیریا. دماتەر دیۋانی ۳ کەسی پەی کۆنفڕانس هۆرۋچنیا. شۆنیشەرە ئامانج جە بەستەی کۆنفڕانسەکەی پەی بەشداربییەکان ۋزیا ڕووە. دما بەدمای ئانەیە، زیلان تانیا هامسەرۆکەو گلێرگەی ئازاد و دیموکراتو ۋەرهورزو کوردستانی، کە بە (کۆدار) ئەشناسیان، جە قەندیلەوە بە سکایپ بەشدارەو کۆنفڕانسەکەی بییە و ۋاچەو وێش پێشکەش کەرد.

دمای ۋاچەکەو ڕێزدار زیلانێ، شۆن بەشۆن هەر یۆ جە حوسێن خەلیقی نویسەر و سیاسەتمەدار و حاتەم مینبەری نویسەر، بابەتەکێ وێشان پێشکەشێ کەردێ. 

پی جۆرە بەشی یەکەم یان وەڵێ نیمەڕۊ کۆنفڕانسەکەی کۆتاییش ئاما و جە بەشی دووەمین و دمانیمەڕۆی کۆنفڕانسەکەیەنە  بڕیارەن هەر یۆ جە ئەهوەن چیاکۆ، ئەندام جە کۆنسەو ڕاۋەبەری گلێرگەو دیموکراتیک و ئازادو وەرهۆرزو کوردستانی-(کۆدار)، هەڵاڵه رافع چالاکەو ژەنان، حاتەم منبەری نویسەر، ئارێز ئەنداریاری نویسەر و ۋنەکۆڵەر، سەعید سەنەندەجی، چالاکوانو مافو مرۆڤی، ژاڵانە هەورامان هامسەرۆکەو پلاتفۆرم-و هەورامی بابەتشان بۆنە.

دمای پێشکەش کەردەی بابەتەکان،  پرسیار و وەڵام و گفتوگۆو بەشدرابیەکان هەن و جە کۆتایینە ئەنجامنامەو کۆنفڕانسو هەورامانشناسی پەی ڕای گردی ئاشکرا کریۆنە.

یاگێ ئاماژەیەن، کە کۆنفڕانسەکە جە (Sollentuna Bibliotek ANIARAPLATSEN 2) ستۆکهۆڵمی بریۆڕاۋە و پلاتفۆرمو هەورامی ڕێکۋستەن و ئارۆ ۋێرەگا کۆتاییش مەیۆنە.

جەی ڤیدیۆنە زانیاری زیاتەر سەبارەت بە کۆنفڕانسەکەی بزاندێنە