سەبای هەینی ۱۹/۱۰/۲۰۱۸ی ۋەراۋەربە ۲۷/مهری/۱۳۹۷، جە شارو هەورامانی کە سەر بە پارێزگەو سنە-یەن، شارەوانی شارەکەی یەکەمین نمایشگەو هەناری ڕێکۋزیۆنە و باخدارێ شارو هەورامانی و دەگاکێ دەوروبەریش بەشدارێش بانە.

چەمەڕا مەکەریۆنە سەبای گەشتیارێ فرێ جە پارێزگاکانو کرماشانی و سنەی و شار و شارچە و دەگاکانو هەورامانی سەردای نمایشگەکەی بکەرانە و جۆش و خرۆشی زیاتەر بەش نمایشگەکەی بەخشانە.

جاری یەکەمەن جە هەورامانو بەشو وەرهۆرزو کوردستانی نمایشگە پەی بەرهەمو هەناری ڕێکۋزیۆنە. ساڵانە باخە هەنارەکێ هەرێمو هەورامانی دەیان هەزار تەنێ بەرهەمشان هەن. هەنارێ هەورامانی جە خاستەرین جۆرەکانو هەناریەنێ و نامێ و نامبانگشان هەورامان و کوردستانش ڕوو بە بازارەکانو ئێرانی دەرباز کەردەن.