دمانیمەڕۆ ۲ شەممەی ۲۲/۱۰/۲۰۱۸ی جە شارو هەڵەبجەی، بەسەرپەرشتی ڕاۋەبەری گەنجانو هەڵەبجەی و بە هەمکاری کۆمەڵگەو پەروەردەیی مارگرێتیٛ، یادێۋ پەی گەورە گۆرانی-ۋاچو کوردی (محەمەد ئیبراهیم عەبدول-ئەشناسیا بە حەمە قوتو)ی کۆچکەردەی ڕێکۋزیا.

جە یادەکەنە کە ژمارێۋ ڕۆشنۋیرێ، هونەرمەندێ و هاموڵاتیێ هونەردۆستێ هەڵەبجە و هەورامانی ئامادیێ بیێ، پەی ڕێزنیای جە تەمەنی هونەری حەمە قوتوی و خزمەتکەردەی بە گۆرانیێ هۆرامیێ و کودریێ، چنڎین چالاکیێ هونەریێ ئەنجامێ دریێ و ستاییشو هونەرمەندی کۆچکەردەی کریا.

حەمە قتو ساڵو ۱۹۳۲ی جە هەڵەبجە جەئەڎێ بییەن، بەڵام بەهۆو خزمەتکەردەیش بە گۆرانیێ هەورامیێ و پۆشای پۆشاکی هورامیانەی جە بەرو هەڵەبجەی بە هەورامی و خەڵکو هورامانی ئەژناسیان. حەمە قوتو جە نەوجەوانیشەنە تێکەڵ بە دنیاو گۆرانیێ و هونەری بییەن. ساڵو ۱۹٥٤ی جە ڕادۋینو بەغڎادی گۆرانیێش چڕیێنێ و ٦ گۆرانیێش چاگە تۆمارێ کەردێنێ.

جە ۱۹۷۰ کانە بە هەمکاری تیپو موزیکو سلێمانیێ چنڎین گورانیێ هۆرامیێش تۆمارێ و پێشکەشێ کەردێنێ و نامبانگش بەرکەردەن و زیاتر هەورامان و کوردستانەنە ئەژناسیان. حەمە قوتو دماتەر چەنی تیپو موزیکو مەولەوی و ساڵو ۱۹۸۳ی چەنی تیپو موزیکو شنرۋێ چنڎین گۆرانیش تۆمارێ کەردێنێ و ژمارێۋ گۆرانیش چەنی ئا ۳ تیپەیە پەی تەلەفزیۆنی کوردی جە کەرکوک تۆمارێ کەردێنێ.

هونەرمەندی کۆچکەردە بەدەر جە گۆرانیێ و هۆنەری،  کەسایەتیێۋی وەشەویس و کۆمەڵایەتی و قسەوەش و شیکپۆش بییەن و تێکەڵی و پەیوەندی فراوانش چەند هونەرمەندان و کەسایەتیەکانو سەردەمو وێش بییەن.

سەرئەنجام (محەمەد ئیبراهیم عەبدول-ئەشناسیا بە حەمە قوتوی)، ساڵو ۱۹۹۲ جە شارو سلێمانیێ بە جەڵدە کۆچی دمایی مەکەرۆنە و خەرمانێۋ جە گورانیێ ڕەسەنێ و قسێ و سەرپنەئامای وەشێ دمای وێش بەمیراث جیا مازۆنە.