جە وان گۆشەگیری ئیمرالی شەرمەزار کریا

جە وان ئەنجومەنو گەنجانو هەدەپەی گۆشەگیرکەردەی ڕێبەر ئۆجالانی و سیاسەتە جەنگەران و فاشیزمیەکەو ئاکەپە-مەهەپە و ئەردۆغانیشان شەرمەزار کەرد.

جە پارکو ئاپێ موسای دلێ شارو وانی، ئەنجومەنو گەنجانو هەدەپەی، بە دروشمو«بە گەنجی دەستمان پنە کەرد، بە گەنجی تەمامش مەکەرمێنە»، دژ بە گۆشەگیرکەردەی ڕێبەرو گەلو کوردی، عەبدوڵا ئۆجالانی و سیاسەتە جەنگەران و فاشیزمیەکەو ئاکەپە-مەهەپە و ئەردۆغانی چالاکیی پڕۆتستۆیشان ئەنجام دا.

جە چالاکیەکەنە ژمارێۋی فرێ گەنجێ و هاموڵاتیێ و پارلەمانتارێ، هامشارەدارێ، ڕاۋەبەرێ هەدەپەی و دەبەپەی و ئەندامێ کۆنگرەو گلێرگەی دیموکراتیکی-(کەجەدەکە) بەشدارێ بیێ.

چالاکییەکە بە دەیەقێ ڕێزگێرتەی جە شەهیدانو ئازادی دەستش پنە کەرد. دماتر  په‌رله‌مانتارو هه‌ده‌پهو شارو ئامه‌دی، ده‌رسیم داغ قسێش کەردێ و یادێش جە په‌رله‌مانتارو وەڵێ شار ڕحای ئیبراهیم ئایهانی کەرد، کە جە چن ڕۋێ ۋیەردەنە جە هۆلێر بە جەڵەتە کۆچی دماییش کەردە بێ.

دێرسیم دەغ ۋاتش: "گۆشەگیریێ کە ۋزیان سەرو ئۆجالانی، گەنجێ کوردی شکستش مڎانە و کۆتایی بە سیاستە جەنگەران و فاشستی و نکۆڵیاکارەکەو ئاکەپە-مەهەپە و ئەردۆغانی باۋەرانە. فاشیزمەکەو ئاکەپەی و مەهەپەی نەک تەنها کوردو باکوری و تورکیای، بەڵکو سەرجەم کوردش جە گرد لایێ کەردەن ئامانج. ئاکەپە و مەهەپە هێرش مەکەرانە سەرو سەرجەم کوردی و تەنانەت ئەڎایانو ئاشتی و هیچ ئەخلاقێ نمەشناسانە، تەنانەت مۆڵەت بە ئەسپەردەکەردەو تەرمەکان نمەڎانە. جە دۆخێ فرە سەختەنە گۆشەگیریشان سەرو بەڕێز ئۆجالان-یەرە سەپنان. دیارەن کە جە کۆشای ئازادی و باۋەڕۊ ئێمە مەتەرسانە! چونکە باش مزانانە کە تا ئیسە بەشەشان هەر شکست بیەن و ئیسە دمای گۋایا پی کەردەۋاشانە گەرەکشانە ئەنجام بەدەست ۋزانە. بەڵام با خاس بزانانە کە هەر پێسەو ۋیەردەی شکست بەشەشان بۆنە".

دماتەر هونه‌رمه‌ند قادر چات، چنڎ گۆرانیێش چڕیێ و بە درۊشم ۋاتەی چالاکییەکە کۆتاییش ئاما.