جە گرێ سپی کناچە زارۆڵێ ۱۲ ساڵانە شەهیدە بییە
جە گرێ سپی ڕژێمە داگیرکەرەکەو تورکیای بەردەۋامەن جە بۆردومان و هێرشەکانش و جە ئاکامشانە کناچە زارۆڵێ تەمەن ۱۲ ساڵانە شەهیدە بییە.
ئارۆ ٥ شەممە جارێ تەر سپا داگیرکەرەکەو تورکیای جە هێرش و بۆردومانەکانش دژ بە کانتۆنو گرێ سپی سەر بە هەرێمو فوڕاتی بەردەۋام بێنە. زانیا بە هۆو هێرش و بۆردومانەکانۋە کە بێسەروبەرانە دەگاکێ کانتۆنەکەیش کەردێنێ ئامانج، زیانی گیانیش دمارە ئامان و جە دەگاو تل فه‌نده‌ری کناچە زارۆڵێ تەمەن ۱۲ ساڵانە بە نامێ "سارا ڕەفعەت"ی شەهیدە بیێنە.
هێرش و بۆردومانەکێ جە ٤ شەممە تا ئیسە بەردەۋامێنێ و شارو گرێ سپی و دەگاکێ سلیپ قران، تل فندەر، سووسكێ و یابیسێ گێرتەنەۋە. هامکات چەنی گرێ سپی، بەردەۋام بۆردومانو کانتۆنو کۆبانی و دەوروبەریش مەکریۆنە و چاگێچە چنڎین شەهیدێ و بریندارێش ونە کەوتێنێۋە.
سەبارەت بە هێرش و بۆردومانەکان، هێزەکێ سوریای دیموکراتی قەسەدە وەڵاکریای سەربازیش دابێ و ئاشکراش کەردە: "ئامانج جە هێرش و بۆردومانەکانو تورکیا پەشتیۋانی-کەردەی جە داعشی و ئاسەتەنگ-کەردەی هەڵمەتەو گەردەلولو جزیرەیەن، کە جە ئاکامشەنە داعش ڕوو بە کۆتاییەن و تورکیاچ پانەیە قەڵسەن. ئێمە پێسەو قەسەدەی پارێزنای ڕەۋا دژ بە هێرشەکان بەکارمەبەرمێنە و چا چوارچێۋەنە وەڵاممان بییەن و شەڕڤانەکێمان زرێپۆشێۋی سەربازی سپا داگیرکەرەکەو تورکیاشان کەردەن ئامانج و دلێنە بەردەن".
قەسەدە دەستنیشانش کەردەبێ: "پێسەو پەرچەکرداری ۋەراۋەر بە هێرشە و بۆردومانەکانو تورکیای پەی ماۋێۋی نادیاری دمایین قۆناغو هەڵمەتەکێ مدرنۆنە، کە جە ۱۰ ئەیلولی ۋیەردەی دەستش پنە کریابێ و ڕووبەرێۋی فراۋان جە پارێزگەو دێرزووری جە داعشی پاکسازی کریابێ".
یاگێ بەیاد ئاۋردەیەن، کە هێرشەکێ تورکیای دژ بە ڕۆژئاڤا کوردستانی و پانیشتو سوریای دمابەدمای کۆبییەی چوار قۆڵی تورکیا، ڕووسیا، فەڕەنسا و ئەڵمانیای، کە جە ئەستەنبۆڵ ئەنجام دریا دەستاشان پنە کەردەن. چەمدارە سیاسیەکێ و شارەزێ جە بوارو تورکیا وسوریا و کوردستانیەنە ئاماژە پانەیە مەکەرانە، "کە ڕەنگا جە کۆبیەکەنە چراۋی سەوزەو هێرشەکەردەی پەی تورکیای هۆرکریێ بۆنە و هامکات دژ بە ڕۆژئاڤا،کوردستانی و بییەی ئەمەریکای جە سوریانە پیلانێ تازێ مجیێبۆرە".
سەبارەت بە بێهەڵۋێستی و بێدەنگی ئەمەریکای ۋەراۋەر بە هێرش و دەستدرێژیەکانو تورکیای، چەمدارەکێ ئاشکراشان کەردەن: "بەزوویی ئەمەریکا ناچارەن ۋەراۋەر بە هێرشەکان بێدەنگی بماڕۆنە و هەڵۋێست نیشانە بڎۆنە و نمەکریۆنە پی شێۋازەو ئیسەیە مامەڵە چەنی دۆخەکەی بکەرۆنە. یان ئانا میشۆم ۋاز جە هامپەیمانە کوردەکانش جە سوریا باۋەرۆنە، یان ئەبۆنە سەرشان هۆربڐنە و سنورێ پەی دەستدرێژیەکانو تورکیای بنیۆرە".
