ئەردۆغان و ئاکەپە بیێنێ بە بەڵا و نەگبەتی پەی تورکیای و جە ۱۷ ساڵێ دەسەڵاتداریشانە ٤۸ هەزارێ کەسێ پەناشان پەی وێکوشتەی بەردێنە و جە ۲۰۱۹ و ۲۰۲۰نە ڕۆچانە ۹ کەسێ وێشان مەکوشانە.
ڕژێمە دکتاتۆرەکەو تورکیا بە سەرۆکایەتی ئەردۆغانی نەک هیچ چارەسەریێوش پەی بارودۆخەکەی نییەن، بەڵکو قسێ و باسێ و پێشنیارێ سەمەرێ مەکەرانێ. پەی نمونەی ئامینە هامسەرو دکتاتۆرئەردۆغانی جە وەڵامو ناڕەزایەتیەکانە پێشنیارەش کەردێنە، تا پەی دەربازبییەی جە هەژاری و نەداری و قەیرانی ئابوری خەڵکی وێش زیادەڕەوی جە خەرجییەنە (ئیسراف) بە دوور بگێرانێ! ئامینێ ئا پێشنیارەیە جە وەختێوەنە مەکەرۆنە تەنها جانتاکەو دەستیش نرخش ٥۰ هەزارێ دولارێن و وێش و هامسەرش ئەردۆغان کۆشکێوە زەبەلاحەی ۱۰۰ ژووریێنە مەژیوانێ کە هەزاران چەکدارێ جە زەمین و ئاسمانەوە پاسەوانیش مەکەرانێ و مانگانەش ملیۆنان دولاری خەرجشەن. ئامینێ جە کۆشەکەێشانە پەی یەک خوانی و مێمانداری چەند کەسێوی ۱ ملیۆن و ۱٦۳ هەزارێ لیرێ تورکیش خەرج کەردەبێ.
ئەمینێ ۱ ساڵ جەی وەڵتەریچ کاتێوکە ملەوانێوە ۲۸۰ هەزار لیرەیەش ملەنە بیێ بێ هەمان پێشنیارش کەردەبێ.
جە سایەو دەسەڵاتەکەو ئەردۆغان-یەنە ئارۆ جە تورکیانە سەرجەم کەرتەکێ بازرگانی، ئابوری، پیشەسازی، بازار و سامانە سروشتیەکێ و ئاوردەیو کیاستەی جەلاو بنەماڵەو ئەردۆغانی و هامسەرێش ئامینێ و زاروڵێ و بنەماڵەکانشان و بنەماڵە دەسەڵاتدارەکێ ئاکەپە-یەوە مۆنۆپۆڵ وکۆنترۆڵ کریان و پوڵ و خێر و بێرو تورکیای مچیۆرە ژمارە حسابە بانکیەکانشان. ئینێچە بییەن بایس تا گرانی و هەژاری و نەداری پەرە بسانۆنە و دەرەنجامشە خەڵکی کەی هیچ ئاسۆیە پەی چارەسەری نمەوینۆنە پەنا پەی وێکشتەی و دیمایی ئاوردەی بە ژیوایش باوەرۆنە.
جە ئی بارەوە سەرچەمەکێ هەواڵی و ئامارە فەرمیەکێ تورکیا ئشکراش کەردەن: "جە ۱۷ ساڵێ دەسەڵاتداری ئەردۆغان-یەنە پەنابەردەی پەی وێکوشتەی ٤۸ هەزار کەسێش دەرباز کەردەن وسات بەسات ڕێژەکە ژیاتەر مەبۆنە".
هەر پەیوەست بە ئانەیە دەروونشناس سەڤگی تورکمەن بە ئاژانسو میزۆپۆتامیا-ش واتەن: "ڕۆچانە جە تورکیا ۹ کەسێ پەنا پەی وێکوشتەی مەبەرانێ و ئاکەسێ جە ناوچە گشتیەکانە ئا کارەیە مەکەرانێ بە ئا ئامانجە دەسەڵاتداری ئاکەپە-ی و ڕای گردینی جە نەهامەتیەکانشان ئاگاردارێ بکەرانێوە".
هەمان سەرچەمی سەبارەت بە وێکوشتەی ئی زانیاریێشە دێنێ:
۲۰۱۸ هەزارێ و ۱٦۱ کەسێ وێشان کوشتەن
۲۰۱۹ نزیک بە ٤ هەزار کەسێ وێشان کوشتەن
هەر ۱٦٦ دەیەقێنە ۱ کەس پەنا پەی وێکوشتەی مەبەرۆن
۲۰۱۹ هەر ۹ ڕوینە ۱ کەس وێش مەکشۆنە
۲۰۱۹ تەنها جە شوباتەنە ۱۲ کەسێ پەناشان پەی وێکوتەی بەردەێنە
فێشتەرو ئاکەسانە پەناشان پەی وێکوشتەی بەردێنە ئانێنێ کە ٤ ساڵی دماییەنە ئاکەپە-ی جەکار دوورێ وستێنێوە.
بەگری جە ۱۷ ساڵی ویەردێنە جە سەردەمو دەسەلاتداری ئەردۆغان و ئاکەپە-یەنە ٤۸ هەزار کەسێ پەناشان پەی وێکوشتەی بەردەن.
