جە هەڵمەتێۋەنە کە ژمارێۋ جە هورامیەکانو پارێزگاو هەڵەبجەی و پانیشتو کوردستانی جە تۆڕە کۆمەڵایەتیەکانە پنەش هۆرئێزێنێ، داۋا مەکریۆنە قەزا "شارستان"ێ تازە بە نامێ هەورامانی جە پارێزگەو هەڵەبجەی دروستە بکریۆنە و دلێگە "ناوەند"ەکەش شارچەو خورماڵی بۆنە.

جە هەڵمەتەکێنە ئامان: "هەورامییە وەشەۋیسەکان، ئێمە پێسەو هەقێۋی یاسایی و شەرعی وێمان، پێمان هەن داۋاو سنور و یاگێ وێمان بە نامێ (هۆرامان)ی بکەرمێنە. داۋاکارینمێ جە لایەنە بەرپرسەکان ئی داواکاریەمان کە کەردەی ناحیەو خورماڵی بە (قەزاو هۆرامان)ی قەبوڵ بکەرانە. ئێمە پێسە و وێبەخشی ئامادینمێ بە نامێ شمە هەورامییەکان ئی داۋاکاریەیە بیاونمێنە لایەنە بەرپرسەکان.

دما بەدمای ئاشکراکەردەی هەڵمەتەکێ، جە تۆڕە کۆمەڵایەتیەکانە پێشۋازی گەرمش ونە کریان و دەیان کەسێ بەنویستەی نامێ وێشان و دەگا و شارچەکانشان پەشتیۋانیشان پەی هەڵمەتەکەی بەرۋستەن.

یاگێ ئاماژەیەن کە شارچەو خورماڵی جە ئیسەنە ناحیەن و ٤۸ دەگێ و لادەگێ جە وێ مەگێرۆنە و سەر بە پارێزگەو هەڵەبجە--یەن و ئەگەر بکریۆنە بە قەزا، ڕەنگەن ناحیەو بیارێ جە ۲۸ دەگێش هەنێ و شارچەو تەۋێڵێ بۋزیۆنە سەرش. پی جۆرە  شارچەکانو تەۋێڵێ، بیارێ و خورماڵی و ۷٤ دەگێ و لادەگێ مەگنانە سنورو قەزا تازەکێ بەنامێ هەورامانی و دەرنجام سەرجەم هەورامانو پانیشتی مەگێرۆۋە.