ئارۆ یەکشەممە جە پانیشت(باشور)و کوردستانی، سەعات ۰۸:۰۰ سەرسەبای دەنگدای پەی هۊرۋچنای پەنجەمین خولو پارلەمانی دەستش پنە کەرد. پڕۆسەکە بە بەرئاۋرد چەنی ۋیەردەی سەرد و سڕیش پۆۋە دیار بییەن. ئاشکرا کریا، تا سەعات ۱٥:۰۰ دمانیمەڕۆی دەنگدەرێ سەڎەنە پەنجا بەشدارێش بیێنێ. پڕۆسەکە تا سەعات ۱۸:۰۰ بەردەۋام بییەن و هەر دمای کۆتایی ئاماییش ئەۋەکەردەی سنڎۆقەکان و ژماردەی دەنگەکان دەستش پنە کەردەن.

کۆمسیۆنو هۊرۋچنای و ڕاپەرسی هەرێمی ئاشکراش کەردەن: پەی دەنگداکەی جە هەر چوار پارێزگاکەو هەرێمی (هەۆلێر، سلێمانییە، دهۆک و هەڵەبجە) ٢ هەزارێ و ١٧٥ بنکێ دەنگدای پەی ٢ ملیۆنێ و ٩١٤ هەزار ێ و ٩٩٢ دەنگدەرێ کریێنێۋە.

بە پا زانیاری کۆمسیۆنەکەی، جە هەۆلێر ١ ملێۆن و ٣٦ هەزارێ و ٤١٩ کەسێ مافو دەنگدایشان بییەن و پەی ئا مەبەستەیە ٤٩٩ بنکێ و ٢ هەزارێ و ١٤٢ (وێستگۍ) دەنگدای کریێنێۋە. 

جە سلێـمانیێ ١ ملیۆن و ١٣٤ هەزارێ و ٧٦٠ کەسێ مافو دەنگدایشان بییەن، چاگێچە ٤٧٦ بنکێ و ٢ هەزارێ و ٣٠٦ (وێستگۍ) دەنگدای کریێنێۋە.

جە دهۆک ٢٥٧ بنکێ و هەزار و ٣٦١ (وێستگۍ) دەنگدای پەی ٦٧٧ هەزارێ و ٧٩٧ دەنگدەران کریێنێۋە.

جە هەڵەبجە ٦٦ هەزارێ و ١٦ دەنگدەرێ مافو دەنگدایشان بییەن و  ٢٨ی بنکێ و ١٣٢ (وێستگۍ) دەنگدای کریێنێۋە.

جە دەنگدای پەی هۊرۋچنای پەنجەمین خولو پارلەمانی، ٣٨ لیستێ و لایەنێ و هامپەیمانیێ و قەوارێ بەشدارێ بیێنێ و ٧٧٣ کەسێ، کە ٥٣٢ شان پیێ و ٢٤١ شان ژەنیەنێ کاندیدا-نێ پەی یاۋای بە پارلەمانی.
 
هامکات ١٨ لایەنێ و لیستێ و قەوارێ (تورکمان، کلدۆئاشوری و ئەرمەنی) ٦٥ کاندیدێشان هەنێ و هەوڵ پەی بەدەست ۋستەی ۱۱ کورسیان مڎانە.
 
بە گردی پارلەمانو هەرێمو کوردستانی ۱۱۱ کورسیێش هەنێ و ۱۱شان پەی (تورکمان، کلدۆئاشوری و ئەرمەنی)ـەکانێ. جە ۱۱ کورسیەکەی ٥ پەی تورکمانی، ٥ پەی کلدۆئاسوری، ۱ پەی ئەرمنی تەرخانێ کریێنێ.

دما بە دمای کۆتایی ئامای دەنگدای و ئەۋەکەردەی سندۆقەکان و ئەژمارای دەنگەکان، دیار نییەن کە کەی ئەنجامەکێ ئاشکرا کریانە.

جە سەروەختو دەنگداکەیەنە، پاشێلکاریێ فرێ کریێنێ و جەی بارەۋە ئاشکرا کریان، کە جە چنڎ بنکێنە ئاڵۆزی و ئاژاۋێ دورستێ بیێنێ و چەمدارێ دەنگدای ڕاگیریشان ۋنە کریان و چنڎشان ۋنەشان دریان و نمایندێ پارتە بەشدارەکان ئاستەنگی فرەشان پەی درۊست کریان. هامکات هەڕەشێ جە دەنگدەری کریێنێ و هێرش کران سەرو چنڎین دەنگدەران و چنڎین کاندیدانی و چنڎ کەسێ بریندارێ بیێنێ. هەرپاسە جە ژمارێۋ بنکێنە چنڎ کەسێ هەوڵشان دان بە نایاسایی دەنگ بڎانە و ئاژاۋلێشان درۊستە کەردێنە و کەلوپەلو چنڎ بنکان مەڕیان.