ئارۆ سەرسەبای شەممەی، زانیار و لوقمان مورادی و ڕامین حوسێن پەناهی، ۳ چالاکێ سیاسیێ کوردی خەڵکو وەرهۆرزو کوردستانی، جە زیندانو ڕەجایی شەهرو کەرەجی جەدار دریێنێ. جەداردای هەرە یەرە چالاکوانەکەی جەلاو ئاژانسە یاونەریەکانو ڕژێمو ئێرانی پەشتڕاست کریانەۋە، بەڵام تەرمەکێشان تا ئیستە نەڎریێنێ بە بنەماڵەکانشان.

زانیار و لوقمان موردای، جە ٥ ئۆگوستی جە زیندانو ڕەجایی شەهری فاڕیێ بێنێ پەی ژووری تاکەکەسی و ئا دۋە زیندانیە کوردە جە ئابو ٢٠٠٩ی جە مەریۋان دەستگیرێ کریێ-بێنێ و ۹ مانگێ جە ئیتلاعاتو سنەی ئەشکەنجە دریێ-بێنێ. دماتەر جە ۲۰۱۰ بریێ-بیێنێ پەی زیندانو ئەڤینی جە تاران و هاموەخت داداگا ئینقلابی ئیسلامی ئێرانی سزا جەداردایش پەی بڕیێبێنە. ئینەو ۱۷ تەمووزو ۲۰۱۸ی ئیقبال مورادی، تاتەو زانیار مورادی و مامو لوقمان مورادی جە شارچەو پێنجوێنێ جە پانیشتو کوردستان جەلاو هێزەکانو ئێرانی تەرۆر کریا بێ.

هەرچی ڕامین حوسێن پەناهی-یەن، ٢٣ حوزەیرانو ٢٠١٧ی جە سنە  جە کەمینو سوپاو پاسدارانی بە برینداری بە دیل گیریابێ و ۳ هاۋەڵێش بە نامەکانو "بێهزاد نوری، حامید سەیف پەناهی و سەباح حوسێن پەناهی" جە کەمینەکەنە گیانشان جەدەست دابێ. جە نیسانو هەمان ساڵێ، ڕامین بە تۆمەتو ئەندام بیەی جە کۆمەڵەی و دژایەتی کەردەی ڕژێمی، جەلاو دادگا ئینقلابی سزاو جەداردایش پەی بڕیابێۋە و هەر جە سنەی زیندانی کریا بێ. درەنجام هەفتێ جەی وەڵتەر فاڕیابێ پەی زیندانو ڕەجایی شەهرو کەرەجی و دەرەنجام  ئارۆ سەرسەبای ٨ ئەیلولو ٢٠١٨ی، سەرەڕا ناڕەزایەتی فرەی، چەنی زانیار و لوقمانی مورادی جەدار دریێ.