زیلان تانیا، هامسەرۆکەو کۆداری، جە بەرنامەو "هێڵی سێهەم"ی، ئاژە و ڤیەرەکێ ئارۆ هەورامان، کوردستان، ئێران و ناوچەکەیش ڕاڤە کەردێنێ و ستایشو گیانبازی ٤ شەهیدە ژیۋگەپارێزەکەو مەریوانیش کەردەن.
جە دیمانێۋەنە چەنی بەرنامەو "هێڵی سێهەم"ی کە جە ئاریەن تیڤی پەخش بیەن، زیلان تانیا، هامسەرۆکەو گلێرگەی ئازاد و دیموکراتو ۋەرهورزو کوردستانی، کە بە (کۆدار) ئەشناسیان، ئاژە و ڤیەرەکێ ئارۆ هەورامانی، کوردستانی و ئێرانی و ناوچەکەیش ڕاڤە کەردێنێ و ڕاچارەش ۋستەن ڕووە.
زیلانە سەرەتا ئاماژەش بە شەهیدبیەی ٤ ژیۋگەپارێزەکەو مەریوانی دان و سەرەڕا ستایش کەردەی کاری و خەبات و گیانبازیشان و سەرەوەشی کەردەی جە کەسوکاری و بنەماڵەیشان واتەنش: هەر ٤ شەهیدەکە بەگیانفیدایی وێشان دژ بە داگیرکاری مدرێۋە و دەرسێ تەرشان بە هەم بە گەلی و هەم بەداگیرکەری داۋە.
زیلانە سەرنجەش دێنە سەرو دژبەری دوژمانان و داگیرکەرانو کوردستانی دژ بە کۆشای ئازادی گەلی کوردی و واتەنش: ئیتر دوژمنێ و داگیرکەرێ ستاتۆس و کوشای ئازادی و وێ-ڕێکۋستەکەردەی و وشیاری کوردیشان جە وەرهۆرزو کوردستانی پەی هەرس نمەکریۆنە، پەوکەی بە تایبەتی کۆماری ئیسلامی ئێرانی جە بێچارەیی وێشەنە هێرشی هەمەلایەنە دژش ئەنجام مڎانە.
زیلان تانیا، هامسەرۆکەو کۆداری سەبارەت بە سیاسەتەکانو ئێرانی دژ بە هەورامانی واتەنش: هۆکارێ دژایەتیەکەی فرێنێ، دانێ جە هۆکارە سەرەکیەکانش شۆنگەی مێژووی و جوگرافی ستراتیژی هەورامان-یەن، کە جە دێرزەمانەوە تا ئیسە نەخش و ڕۆڵش بیەن. هەورامان جە گرد بوارەکانە پێسەو لانکەی بیەن و جە کوردستانەۋە پێشەنگایەتی مرۆڤایەتیش کەردەن.
زیلانە ئاشکراش کەردەن، هەر جە ئیسەنە هەورامان ڕووبەروو هێرشی نەبیەنەۋە، بەڵکو بەدرێژایی مێژووی هێرش کریان سەرش. ئارۆچ کە جمیەری ئازادی جە هۆرامانەنە یاگێش گێرتێنە، ئێرانیچ ئینەیە مەینۆنە و پەیش هەرس نمەکریۆنە.
زیلانە دەستنیشانش کەرد، بەهۆو بەهێزی گەلی و کۆشای ئازادیشەن کە هەورامان ڕووبەڕوو هێرشی مەبۆۋە، نەک بەهۆو بێهێزی و لاۋازیش. مشیۆم گەلەکەمان جە هەورامان ئا ڕاستیەی بزانۆنە و وێش بە بێهازی و لاۋاز نەوینۆنە. سەرەڕا ئانەیچە کۆماری ئیسلامی بە ئامانج و مەرام نەیاۋان.
زیلان تانیا، هامسەرۆکەو گلێرگەی ئازاد و دیموکراتو ۋەرهورزو کوردستانی، ئاماژەش بە پەراۋێزۋستەی هەورامانی جەلاو شۆڕش و سەرهۆردایەکانو ۋیەردەی دان و واتش: بەپاو شۆنگە و جایگاو گرنگەکەیش، هەورامان جە شۆڕشەکانە ئا نەخش و ڕۆڵەشە نبیەن یان نەدریانش پنە کە شایانش بیەن. ئەرێ ڕاستەن کە خەڵک پێسە ئەرک و هەڵوێستی نەتەوەیی بەشدارێ شۆڕشەکانی بیێنێ، کۆشش کەردەن و شەهیدێ و هونیش دێنە، بەڵام دەرەنجام جەی شۆڕشانە باسێ جە هەورامانی نییەن.
زیلانە ئاماژەش بە فرە ڕەنگی و جیاۋازیەکانو گلێرگەی دا و واتش: جە فەلسەفەی ڕێبەر ئاپۆی-یەنە، گرد کەس و لایێ بە ڕەنگ و جیاۋازی و ئیرادە وێش یاگێ مەگێرۆنە. گلێرگەی دیموکراتی سەرو ئا بنەمێ و هەڵۋست و فکری هامبەشی هەمەڕەنگی مەرزیۆرە.
زیلان تانیا، هۆکارێ تەرو ئۆپەراسیۆن و هێرشەکانو کۆماری ئیسلامی ئێرانی پەی سەرو هەورامانی پەی حزوورو جمیەری ئاپۆیی و هەستاری و ستراتیژی هەرێمەکە گێڵناۋە. ئانێچە نیشانەش مڎۆنە کە جە هەورامان کار و خەبات و چالاکی کارا هەن، یانی ئەگەر جە یاگێ چالاکی و خەبات نەبۆنە ئیتر چی هێرش بکریۆنە سەرش.
زیلانە ئاشکراش کەرد، جە هەورامان کەسانێ هەنێ بیێنێ بە کرێگێرتێ و جاشێ و هامکارێ و چەمساغێ و نانوەرێ سەرو سفرەو دوژمنی و ئەگەر ئانێ نەبانە کۆماری ئیسلامی نمەتاونە جە هەورامان ئۆپەراسیۆن ئەنجام بڎۆنە. کە ئانێچە نیشانەش مڎۆنە گەلو هەورامانی هیشتای جە ڕووەو سیاسی-ۋە هەمدەستێ و هەمفکرێ نەبیێنمێ و هیشتای دلێ وێمانە کێشەمان هەن. مشیۆم ئا کەس و لایەنێ کە کار پەی ڕژێمی مەکەرانە شناسایی بکریانە و گەلو هەورامانی خیانەتشان قبوڵ نەکەرانە.
زیلانە وریاییش دا بە جاش و هامکارەکانو ڕژێمی تا دەستبەردارێ خیانەتی ببانە و ۋاتەنش: ئیتر گەلو کوردی یاوان ئاستێ کە ئا کەسە خیانەتکارێ مشیۆم پاکسازی بکریانە یان تۆبە بکەرانە و بەشداری کۆشای ئازادی ببانە. گلێرگەی دیموکرات و دەوڵەمەند و فرەڕەنگ٘ پا مانا نییەن کە خیانەتکارێ دلێشەنە ڕاشان ببۆۋە، بە پێچەۋانەوە کۆمەڵگەی فرەڕەنگ ڕیشەکەنکەردەی خەتو خیانەتی فرەڕەنگ ببۆنە و وەڵێ بگنۆنە.
زیلان تانیا ئاماژەش بە پڕۆژە و نەخشەڕێ کەژاری پەی چارەسەری کێشەکانو ژەنێ جە کوردستانی و ئێرانی دا و بە گرنگ وەسفش کەرد و ماچۆنە: بارودۆخێ کە کۆمەڵگە کوردستانی و ئێرانیەن هەن پەی فاڕیای وەڵامدەر نییەن. جە ئیسەنە سیستم تاک ڕەنگ، تاک جنس و تاک عەقڵیەتەن، پی شێۋازە گۆمەڵگە نمەبریۆنە ڕاۋە. ژەنی قوربانیتەرین قوربانی ئەی سیستمیەنە. یانی ژەنی جەسیستمەکەنە یاگێش نییەنە، جە ڕاستیەنە گەرەکیچش نییەن یاگێش ببۆنە، چونکە ژەنی سیستمەکەش قبوڵ نییەن. سیستمەکە یاگێ پیایەنە کە نکۆڵیکارو ژەنێن، ئیتر چەنی ژەنی ملۆنە دلێ سیستمێ چامنەیە بەشدارە ببۆنە.
درێژەو دیمانەکەی جە دیمەنەکەنە بویندێنە
