سالح موسلم: مۆدێلی ۋیەردە سەرشیەن، سیستمی دیموکراتی چارەسەرەن

ساڵح موسلم، دیدارەکێ مەسەدەی و دیمەشقی-یش هۆرسەنگنێێ و ۋاتەنش: ئەۋەگێڵای پەی سیستمی ۋەرینی و دکتاتۆری جە سوریا نمەبۆنە. بەڵکو گەرەکمانە سیستەمە دیموکراتیەکەیما جە سوریای یاگەگیر بۆنە و هەر ئانەێچ چارەسەرەن.

چنڎ ڕۋێن قامشلۆ و دیمەشق دیدارێ و چەمپەنەکوتێشا دەس پنە کەردەێنێ و جە ٢٦ تەمووزی ۋیەردەیەن کیاستێۋ جە ئەنجوومەنو سوریای دیموکراتی-مەسەدە، بە داۋەتی فەرمی پەی یەکەم جاری سەردای دیمەشق (شام)یش کەردەن و چەنی ۋەرپەرسە حکومی و لەشکریەکا سوریای چنڎ دیدارێ و چەمپنەکەوتێشا ئەنجام دێنێ.

هەر چنڎە زانیاری فەرمی تەمام دەربارەو قسەوباسەکا دلێ دیدار و چەمپنەکەوتەکا نییەن، بەڵام زانیان چارەسەری پەی ڕۆژئاڤای و سەرنیش(باکور)و سوریای و بە فەرمی ئەشناشایش و ئایندەو سوریای ئاژەی سەرەکی بیەن و دایوئەسایش سەر مەکریۆنە.

جەی بارەۋە و پەی ۋەرچەمڕۆشنی زیاتەری، ئاژانسەکەما فورات نیوز دیمانێۋش چەنی سالح موسلم، ۋەرپەرسو کۆمیتەو جمیەرو گلێرگەی دیموکراتی (تەڤدەم)ی ئەنجام دان.

ساڵح موسلم ئاشکراش کەرد: سەردای مەسەدەی پەی دیمەشقی بەفەرمی ئەنجام دریان و ئامانج ۋنەش ئەنەیاۋایەن جە نیاز و جدیەت و هەڵۋێستو ڕژێمو سوریای. ئەندامێ کیاستەکەی، سەردای و دیدارەکێشا بە خاس باس کەردێنێ و ۋاتەنشا؛ هەر دۋێ لێ ڕێکێکەوتێنێ کۆمیتە و لیژنە دروسێ بکرایانە. ئەگەر پاسە بۆنە، ئینە هەنگامێ حاسەنە.

موسلم، سەردای مەسەدەی پەی دیمەشقی و دیدارەکا چەنی ۋەرپەرسە سوریەکا بە چەمپنەکەوتێ نەک دایوئەسای (دانوستان) بەنامێ مەکەرۆنە و ماچۆنە: چەمپەنەکەوتەی، دیالۆگ و دایوئەسای جیاۋازیشا هەن، ئانە ئیسە جە دیمەشق (شام) میانو مەسەدەی و دەوڵەتو سوریای ڕووە مڎۆنە تەنیا چەمپنەکەوتەیەن و دەربازو دایوئەسایی نەبیەن، بەڵکو پەی ئەنەیاۋای جە نیاز خاسی و جدیەت و هەڵویستو ڕژێمو سوریای و مەسەدە-یەن و پەی دروسکەردەی متمانەین جە میانشانە. ئەگەر چەمپنەکەوتەکە بیاۋانە ئا ئامانجا، ئا وەختە کریۆنە هەنگامێ تەرێش شۆنیەرە بەیانە.

ساڵح موسلم، ئاماژەش بە شۆڕش و سەرهۆرادی سورایای جە ۲۰۱۱ دا و واتش: جە ڕاسیەنە شۆڕشی ڕاسەقینە جە سوریانە شۆڕشەکەو ئێمەن، ئێمە شۆڕشما دەسپنەکەرد. هەر ئێمەنمێ کە گەراکمانە جە سوریا هەم جە بوارە کۆمەڵایەتیەکەنە هەم جە بوارو سیستەمیەنە فاڕیای ڕووە بڎۆنە. پەی یاۋای پانەیە ئێمە جە ناوچەکا وێمانە بە سیستەم زەمینەسازیما کەردەن. سەرەڕا ئانەیە گەرەکمانە سیستمەکە سەراپا سورایای بگێرۆۋە.

جە ۋەراۈرەنە بەنام ئۆپۆزسیۆن، تەنها جەنگ پەی یاۋای بە دەسەڵاتی مەکەرۆنە و ئاژاولێش ۋستەنە سەرتاسەرو وڵاتی. بەڵام ئێمە نمایندەیی گلێرگەیما کەرد بە سەرجەم جیاۋازیەکاشەۋە و تەقەلا فاڕایی و ئاشتی و چارەسەریما کەرد. ئێمە پارچێۋە جە سوریا-یەنمێ و چنەش نەبڕیایمێرە و نەتەکیامیمێ. ئێمە مۆدێلۋما هەن، کە وێما ئاۋاما کەردەن، کە ڕاستەرین و خاستەرین مۆدێلەن. گەرەکمانە ۋەڵاش بکەرێمەۋە سوریارە.

سالح موسلم، ۋەرپەرسو کۆمیتەو جمیەرو گلێرگەی دیموکراتی (تەڤدەم)ی ئاشکراش کەرد: ئەۋەگێڵای پەی سیستمی ۋەرینی و دکتاتۆری و ملهوڕی و تاکە کەسی و تاکە حزبی جە سوریانە سەرشیەن و کۆتاییش ئامان، جە ڕاسیەنە جە ۲۰۱۱ ۋە سەرشیەن و کۆتاییش ئامان. ئیتر ئا سیستمە باۋش نەمەن کە حزبێ یان کەسێ تەنیا دەسەڵاتداری بکەرۆنە. بشۆم سوریێۋی نو(تازە) بمەزیۆرە، پەی ئانەیە ئێمە مۆدێلو وێما ۋستەن ڕووە. جەولاچەۋە ڕژێمو سوریای هەن و سیستمش دیارەن. جا ئەگەر گەرەکمانە یەک وڵاتەنە پێۋەرە بژیۋمێنە، بشۆم یاگێۋەنە یەکانگیرێ بێمێ و ڕێکێ بگنمێ. ئەگەر ئێمە وێما نە پارێزنێ و ۋەرگیری و مدرامانما نەکەردێ، بەڕژێمی-چەۋە، کەس حسابما پەی نەکەرێ. ئەگەر ئێمە مۆدێلەکەما ئاۋا نەکەردێ، کەس ئەنەیاۋایش پێما نەبێ، ئیسە هەم مۆدیل هەم هێزو پارێزنای ڕەۋایما هەن. پۆکەی مشیۆنە گرد کەس و لایێ گۆشما چنە بگێرۆنە و حسابما پەی بکەرۆنە. جە ڕاسیەنە فاڕیای سوریای بەنڎەن بە سیستم و مۆدێلەکەو ئێمەۋە، هەڵبەت ئانە بە ۲٤ سەعاتێ بەدی نمەیۆنە، بەڵام پڕۆسێسێ درێژخایەنەن و بە دیدار و دایوئەسای و دروسکەردەی کۆمیتە و لیژنەکا مەیسەر کۆریۆنە.

ساڵح موسلم دەستنیشانش کەرد: ڕێککەوتەی ئانە نییەن سەرو چنڎ خاڵا ڕێکێ بگنمێنە و جە بڕێ خاڵانە ئێمە سازش بکەرمێنە، بێگومان ئێمە داۋا خاستەرین ڕێککەوتەی مەکەرمێنە، ئانێچە کات و دەرفەتش گەرەکەن. بەڵام باۋەڕم هەن کە بوارێۋ هەن و پێۋەرە متاۋمێنە چێۋێۋ بکەرمێنە. ئێمە ئیسە مۆدێلو وێما یاگەگیر مەکەرمێنە، هەر کەس و لایێ ئاقڵانە ژڵێۋیۆوە، مۆدیل و سیستمەکێما قبۆڵ مەکەرۆنە و نەک دژش بمدرۆۋە.

ساڵح موسلم ماچۆنە: ئێمە سەربەوێیی سوریای پارێزنمێ، نەک پارچەش بکەرمێنە، جە سوریانە چنڎین نەتەوێ و باۋەڕیێ چوون، (کورد، عەرەب، تورکمان، چەرکەس، چەچەن و مسوڵمان، مەسیحی، ئێزدی، ئیسماعیلی، عەلەوی) هەنێ. ئێمە گەرکمانە گرد پێۋەرە و ئازادانە و ئاشتیانە بژیۋانە. ئیتر مۆدێلی ۋەڵین و سیستمی یەک ئاڵا، یەک زۋان، یەک نەتەوە قبوڵ نمەکریۆنە. کێ سوریانە بۆنە بشۆم بەزۋان، باۋەڕی، ڕۆشنۋیری و شناسنامەو وێش بژیونە. ئێمە بە مۆدێل و سیستمەکەما ئامانجما سوریێۋی پاسنەنە و کارش پەی مەکەرمێ. دڵنیێنمێ ئانێچە بە دی مەیۆنە.