جە شارو ستراسبۆرگ-و فەڕەنسای، چالاکی ئێشکگێرتەی پەی ئازادی ڕێبەرو گەلو کوردی، عەبدوڵا ئۆجالانی جە ۋەردەمو کۆنسەو ئەوروپای درێژەش هەن.

چالاکی ئی هەفتەیە جە لاو  ۱۰ جە کوردا ولایەتەکا وەرکەوتو ئەڵمانیای جە ئەستۆ گیریان و پەی ماۋەو ۷ ڕوا بریۆڕاۋە. بەشدارەکێ بریتیێنێ جە: کەرەم گۆک، ئاسلی خان چەتین، مەدییە چەلیک کورت، سەڵاحەدین ئۆزچەلیک، نۆرشین ئۆزچەلیک، ڤەیسەڵ چەتین، نەوال چەتین، ئامارا ئایدن، قاسم عوسمان و کانیوار ئەلخالید.

ئێشکگرەکێ داۋاشا جە ڕێکۋستەکا و دەوڵەتا ئەوروپای و کۆمیتەو بەرەنگاری ئەشکەنجەی (سی پی تی) کەرد، جە ڕەوش و گۆشەگیری ئیمرالیەنە بە پا پیمانە و یاساکا وێشا هەڵسوکەوت بکەرانە و پەی بەڕژەوەندیەکا وێشا پاشێلێشا نەکەرانە و ۋەراۋەر بە ئۆجالانی و گۆشەگیرکەردەیش خاوەن هەڵۋێستێ بانە.

هەرپاسە ئێشکگرەکێ داۋاشا جە کوردا و ئازادیۋازا ئەوروپای کەرد، بە دروشمەو "ئازادی پەی ئۆجالانی"، بەشداری چالاکیەکەی بانە یاخود پەشتیۋانێش بانە.

یەکەمین چالاکی ئێشکگێرتەی پەی ئازادی ئۆجالانی جە ٢٥و حوزەیرانو ٢٠١٢ی دەسش پنەکەردەن و ئی هەفتە ۳۱۹ مین چالاکیش ئەنجام مڎریۆنە و بە پاو قسێ ڕێکۋزەکاش تا ئازادی ئۆجالانی چالاکیەکە بەردەۋامیش هەن و هەر هەفتە دەسێ و گروپێ جە کوردا و دۆساشا جە ئەستۆش گێرانە.