جە ستراسبۆگ پەی ئازادی ڕێبەرو گەلو کوردی، عەبدوڵا ئۆجالان، چالاکی ئێشکگێرتەی کە بەشێۋازی نۆبەتی بریۆنەڕاۋە، جە ۳۲٤مین هەفتەشەنە درێژەش هەن. ئی هەفتە چالاکییەکە گەنجێ کوردێ کە نیشتەجێ پاریس-و پایتەختو فەڕەنسایەنێ جە ئەستۆش مەگێرانە.

پەلدا ئارشیمەت، مەندەرەس یڵدرم و مەحسون چەلیک، جە گەنجە بەشداربیەکانو چالاکییەکەی بانگەۋازیشان جە گەنجان بە تایبەتی و سەرجەم کورد و ئازادیۋازانو دنیای کەرد، تا خاوەنداری جە ڕێبەر ئۆجالانی بکەرانە و بەشدارێ چالاکییەکان پەی ئازادی ڕێبەر ئاپۆی ببانە. داۋاچشان جە ڕێکۋزیاکان و لاینە پەیوەندیدارەکانو ئەوروپای کەرد، ئەرک وێشان بەگا باۋەرانە و پاشێلکەردەی مافە دەستوری و یاساییەکانو ئۆجالانی قبوڵ نەکەرانە. چونکە ئیتر گۆشەگیری ئیمرالی سەبر و بوردباری کوردیش ناستەن و مشیۆم بەخێرایی پەیجۆر پەی دۆخو ژیۋای و ئاساییشی و چارەنویسو ئۆجالانی بکەرانە و ئەنجامەکەیچش پەی ڕای گردی ئاشکرا بکەرانە.

چالاکی ئێشکگێرتەی کە بەشێۋازی نۆبەتی پەی ئازادی ڕێبەر ئۆجالانی ڕێکۋزیان، جە ۲٥و حزەیرانو ۲۰۱٦ ۋەردەمو بارەگاو کۆنسەو ئەوروپای جە شارو ستراسبۆگ-و فەڕەنسای دەستش پنە کەردەن و تا ئیسە درێژەش هەن. چالاکییەکە هەر هەفتە جەلاو دەستێ جە چالاکۋانێ، هاموڵاتیێ، سیاسەتمەدارێ کوردی و دۆستاشانەۋە جە ئەستۆ مەگیریۆنە و بریۆنەڕاۋە.