سه‌ندیكاكێ به‌ریتانیای پڕۆژه‌و «ئازادی پەی ئۆجالانی»یشان په‌سه‌ند
ئارۆ جە لەندەن، ١٥٠ هه‌مین كۆنگره‌و یه‌كێتیی سه‌ندیكاكان-و به‌ریتانیای(TUC)، بە ئامادەبیەی هەزاران ئەندامێ بەسیا و بە یەک دەنگ پەشتیۋانی جە كه‌مپین-و «ئازادی پەی ئۆجالانی» كریا.
ئارۆ جە لەندەن-و پایتەختو بەریتانیای، ۱٥۰ هه‌مین كۆنگره‌و یه‌كێتیی سه‌ندیكاكان-و بەریتانیایUnite The Union بریاڕاۋە و هەزاران ئەندامێ ئامادێش بیێ.
جە کۆنگرەکەنە پڕۆژەو «ئازادی پەی ئۆجالانی»،کە جەلاو سەندیکاو مامۆستایانو سکۆچی(سکۆتلەندا) ئامادە کریابێ، جەلاو سەرجەم سەندیکاکان و ئەندامانو کۆنگرەی پەسەند کریا. جە پڕۆژەکەنە داۋا جە دەوڵەتو تورکیای کریان تا واز جە جەنگی چەنی کوردی باۋەرۆنە و چەنی پەکەکەی گفتوگۆ دەست پنە بکەرۆۋە و ڕێبەر ئۆجالانی ئازاد بکەرۆنە.
كارۆلینا یاته‌رس به نمایندەیی سه‌ندیكاو مامۆستایانو سكۆچی، ستێڤه بیرد به نمایندەیی سه‌ندیكاو په‌یامکیانەرانو به‌ریتانیای، جه‌وانه دی گرۆت به نمایندەیی سه‌ندیكاو ئه‌كادیمیسته‌كانو به‌ریتانیای و تۆمی مورفی به نمایندەیی سه‌ندیكاو Unite The Unionو بەریتانیای جە وتارەکانشانە جەختشان جە پەشتیۋانیشان جە پڕۆژەکەی و کەمپینو «ئازادی پەی ئۆجالانی» کەردەۋە.
تۆمی مورفی به نمایندەیی سه‌ندیكاو Unite The Union و بەریتانیای، کە گەورەتەرین سەندیکاو وڵاتیەن و ٥۰۰ هەزار ئەندامێش هەنێ، واتەنش: گەرەکەن دەوڵەتو تورکیای کۆتایی بە فشارەکانش سەرو کوردی باۋەرۆنە و بەزوویی گفتوگۆ و دای و ئەسای چەنی پەکەکەی دەست پنە بکەرۆۋە.
مورفی ده‌ستنیشانش کەردەن: چارەسەری کێشە و ئارێشەکانو تورکیای بە ئاشتی چەنی کوردی چارەسەرێ ببانە و واتەنیچش: ئۆجالان ماندێلا ۆەرهۆرزی دلین-یەن و شۆڕش جە ڕۆژئاڤا کوردستانی بەرهەمو ئاڎ-یەن.
تۆمی مورفی ئاشکراش کەردەن: گه‌وره‌ترین فێستیڤاڵ-و كرێكارانو جیهانی كه نامێش «دورهام مینه‌رس گالا»ن کریان بە خەڵات و دیاری پەی ئۆجالانی.
ئه‌رجان ئاكبال و ڕزگار وان به نمایندەیی ئه‌نجومه‌نو گه‌لو كوردی ئامادێ کۆنگرەی بینێ و سپاس و ستاییش کۆنگرەیشان کەردەن و پەشتیۋانی کۆنگرەیشان جە کورد و پەکەکە و ئۆجالانی بە گرنگ وەسف کەردەن.
یه‌كێتیی سه‌ندیكاكان-و به‌ریتانیای(TUC)، بەتایبەتی سه‌ندیكاو Unite the Unionی، جە ۲ ساڵێ ۋیەردەنە کەمپین و کار و خەباتی فراۋان و گرنگشان پەی ئازادی ڕێبەر ئۆجالانی کەردەن و تا ئارۆچ بەردەۋامێنێ جە کار و خەباتەکەی.
