عەفرین: سوپاو تورکیای و چەتەکێش گژیێ و ژمارێۋ چەتێ و سەربازێ کوشیێ
جە عەفرینی داگیرکریا چەتەکێ لیوا ئەلحەمزەی و ئەلجبهە ئەلشامیە و سپاو تورکیای گرژینێ و چەکی قورس و توپۋاران جەنگەکەنە بەکاربریان و ژمارێۋ چەتێ و سەربازێ کوشێنێ.
چنڎ سەرچەمێ هەۋاڵی جە عەفرینی داگیرکریاۋە ئاشکراشا کەرد، کە ڕۆ ۳ شەممەی چەتەکێ لیوا ئەلحەمزەی و سپاو تورکیای گرژینێ. ئانێچە دمای ئانەیە بیەن کە سپاو تورکیای داۋاش چا تاقمە چەتەکا کەردەن عەفرینی بازانەجیا و فاڕاۋە پەی یاگێۋەتەری جە بەرو شاری. بەڵام چەتەکێ لیوا ئەلحەمزەی داۋاکاریەکەشا قبوڵ نەکەردەن و ئانێچە جەنگ و ئاژاولێش شونیەرە ئامان و هەر دووێ لێ چەقی قورشا دژە بە هەنتری بەکارئاۋردەن. زانیا، هێزەکێ ڕژێمو تورکیای مۆڵگەکێ لیوا ئەلحەمزەیشا جە نەوەشخانەو دێرسیمی و دەگاو تیریندی بەقورسی تۆپۋارانێ کەردێنێ.
ڕۆ دۋە شەممەی هەر جە عەفرین، تاقمە چەتەکێ ئەلجبهە الشامیەی و سەربازە چەتەکێ سپاو تورکیای بە جەنگ ئامێنێ و هەر دۋێ لێ چەکی سوک و قورسشا بەکاربەردەن. زانیا، جەنگەکە دمای ئانەیە ڕووەش دێنە کە سەربازێۋی تورک گەرەکش بیەن دەسدرێژی جە ژەنێۋە ئاۋارێ خەڵکو غوتەی بکەرۆنە.
بە پا زانیاریەکا جە جنگەکانە ژمارێۋ فرێ چەتێ و سەربازێ کوشیێنێ و ژمارێوتریچ بریندارێ بیێنێ. بەهۆ جەنگەکاۋە زیاتەر جە ۋیەردەی عەفرین و دەوروبەرش ئاڵۆزیان و ئارامی و ئاساییشەکەشا شێویان.
