جەی بارەوە، قەسەکەرەو فەرمی هێزەکا سوریای دیموکراتی-قەسەدە-ی، فەرماندێ لیلوا عەبدوڵا، بە ئاژانسو هەۋالو 'ئانەها'یش واتەن: " شەڕڤانەکێشان جە بەردەۋامی هەڵمەتەو گەردەلو جزیرەی دەیان دێهاتێ و مزرێ، چەندین بنکێ و بارەگێ سەرەکیێ چەتەکا داعشیش و شارچەو ستراتیژی 'دەشیشە' یشان جە پارێزگەو حەسەکەی سەر بە هەرێمو جزیرەی ڕزگارێ کەردێنێ و بەگردیی ڕووبەرێۋی ٦۰۰ کیلۆمەتر چوار گۆشەیی جە چەتەکا پاکسازی کریان ".

ئا فەرماندێ ئاشکراش کەردەن: " بەشێۋ جە دەڤەرە ڕزگار کریێکا مەگنانە سەرو سنورو ئێراقی و قەسەد و هێزە ئێراقیەکێ پەی کۆتایی ئاردەی بەداعشی هەماهەنگی و ئۆپەراسیۆنی هامبەشان هەن. بێگومان تا بە تەمامی دلێنە بەردەی داعشی ئا هەماهەنگی و ئۆپەراسیۆنە هامبەشە بەردەۋام بۆنە".

یاگێ بە یاد ئاۋردەیەن، کە ڕۆ دۋە شەمەی ۋیەردەی، فەرمانداری گردیی ژوورو چالاکییەکا هەڵمەتەو گردەلول-و جزیرەی، سەر بە هێزەکا سوریای دیموکراتی 
-قسەدە-ی، سەبارەت بە ڕزگارکەردەی شارچەو دەشیشەی سەر بە پارێزگەرو حەسەکەی ۋەڵاکریای سەربازیش دابێ و ئاشکراش کەردەبێ: " جە ئانو ڕزگارکەردەکەیەنە، شەڕڤانەکێشا ۲۷٤ چەتێ داعشی کە چوارشا (سەرچەتێ-ئەمیرێ) بینێ کوشنێ، ۱۳ چەتێ بەدیل گیرێنێ، سەدان هاموڵاتیێ ڕزگارێ کرینێ ". 

بە پا ۋەڵاکریاکەی، ڕۆو ٣ ٢٠١٨ی هەڵمەتەکێ جە ٢ قۆڵێۋە دەسش پنەکەردێنە. قۆڵی یەکەم جە وەرنیشتو (شەدادی) و قۆلی دووەمیچ جە ۋەرکەوتو (هۆل)ی بریێنێ ڕاۋاوە و جە ئاکامەنە چەنڎین دێهات و مەزرێ و ڕووبەرێۋی ٦٠٠ کیلۆمەتر چوار گۆشەیی و  (تەل سفوک) کە خاڵێۋی سنوریەو سوریا و ئێراق-یەنە ڕزگارێ کریێنێ.

هەرپاسە، ماشینێۋی باربەر، ماشێنیۋی بۆمبکریا، ماشێنێۋی پەر جە چەک و تەقەمەنی و چەنڎین مۆتورسکلێتێ بۆمبکریێ، شەڕڤانا تەقنێنێ. ۸ حەشارگێ، ٦ هاوەنێ، ۲ تۆپێ و ۲ سەنگەرێ کۆنکرێتیێ بەتەمامی دلێنە بریێنێ.

هاموەخت، دوێ دۆشکێ ٢٣ و  ١٢ملم-ێ، ١٤ تۆپێ، ٣ ئاڕ پى جی-ێ، ماشینێۋی بۆمبکریا،  تانکەریێۋ ئاۋێ،  ٣ ئامێرێ بێتەلێ، ماشینێۋی  هەمەر، ٦ مۆبایلێ، کە پەی تەقنای بۆمبە نریاکا بەکارئاریێنێ، ٢ تانکەرێ بۆمبکریێ و بڕێۋی چەک و تەقەمەنی و تفاقی سەربازى، کەوتێنێ دەسو شەڕڤانەکا قەسەدە-ی.

فەرمانداری گردیی ژوورو چالاکییەکا هەڵمەتەو گردەلول-و جزیرەی، سەر بە هێزەکا سوریای دیموکراتی -قسەدە-ی، جە دماییەنە ئاشکراش کەردەن، جە هەڵمەتەو ڕزگارکەردەی شارچەو دشیشەی و دەوروبەریشەنە، دمایی جەنگی قارەمانانەی ۳ شەڕڤانێ شەهیدێ بیێنێ و ۲۰ی تەریچ بریندارێ بینێ.