فه‌رماندەیی گردی هێزەکا سوریای دیموکراتی- قه‌سه‌ده‌، بە ۋەڵاکریێۋ ڕزگارکەردەی پانیشتو حەسەکەی و دەوروبەرو دێرزوریش ئاشکرا کەرد و جەی بارەوە ئەی زانیاریێشە دێنێ:

۳ حوزەیرانی ۋیەردەی، پەی ڕزگارکەردەی ناوچەکا پانیشت(باشور)و حەسەکەی و شارچەو دەشیشەی کە سەر پارێزگەو دێرزووریەن و پەی بەرقەراری ئارامی و سەقامگیری  ئاساییشی جە پارێزگەو دێرزووری و سنورکا ئێراق-سوریای، هێزەکێما بە هامکاری و هەماهەنگی چەنی هێزەکا ئێراقی و هامپەیمانی میاندەوڵەتی دژ بە داعشی، هەڵمەتێ هامبەشەما دژ بەداعشی دەس پنە کەردە. 

هەڵەمەتەکە سەرەتا جە شارچەکا شەدادی و هۆڵی دەسش پنە کەرد و دەرنجامشەنە  ٧ هه‌زارێ و ١٣٦ كیلۆمه‌ترێ پانتایی به‌ درێژایی ١٩١ كیلۆمتەرا و سەرجەم سنورو ئێراق-سوریای جە چەکدارە چەتەکا داعشی ئازادێ و ڕزگارێ کریێ. هاموەخت شارچەکێ، دەشیەی، ئه‌لسوار و مه‌ركه‌ده‌-ی، ده‌روازه‌ی سنووری تل سه‌فوك و سەرجەم دێهاتەکێ دەوروبەریشا ڕزگارێ کرێیێنێ. پەی جۆرە سەرجەم ناوچەکێ پانیشتو حەسەکەی و وەرکەوتو دێرزوری جە تاقمە چەتەکا داعشی پاکسازی کریێنێ.

جە هەڵمەتەکەنە، شەڕڤانێ قەسەدەی سەدان سڤیلێ و دەگانشینێ-شا جە داعشی ڕزگارێ کەردێنێ و فاڕێنێشاۋە ناوچەی ئارام وپارێزیا. هاموەخت شەڕڤانێ ژمارێۋی فرێ مین و تەقەمەنی و پاشماۋەێ داعش-یشا هۆرگێرتێنێ و بێکاریگەرێشا کەردێنێ و چەنڎین تونێلێ چەتەکاشا تەقنێنێۋە و بڕێۋی فرە چەک و تەقەمەنی دەسش سەرەرە گیریان و سەدان چەتێ داعشی کوشیێنێ و بریندارێ بێنێ.

هەر جە هەڵمەتەکەنە، هێزەکێ هامپەیمانی میاندەوڵەتی دژ بە داعشی، جە زەمین و ئاسمانەۋە کارا بەشدارێ بیێنێ و گورزی قورشا جە چەتەکا دان.