موراد قەرەیلان فەرماندەو بڕیارگەو دلێگەو پارێزنای گەلی جەختش کەردەۋە، کە جە کوردستان خەت و مۆدێلو گەریلا سەدەی ٢١مینیشان خوڵقنان و هەرپاسە جە بواری لەشکریی و گەریلایەتی-یەنە ئاژەو ئارۆ کوردستانیش هۆرسەنگنان.
موراد قەرەیلان فەرماندەو بڕیارگەو دلێگەو پارێزنای گەلی (نەپەگە - NPG)، جە دیمانێۋەنە چەنی ئاژانسەکێمان فوڕات نیوز (ANF)ی، جە بواری لەشکریی و گەریلایەتی-یەنە ئاژەو ئارۆ کوردستانی هۆرسەنگنان و سەبارەت بە پڕۆژەو سەرجەنۊ بونیاتنیای گەریلای و کۆشاییشی ئازادی قسێش کەردێ، کە جە کۆبییەی هێزەکانو پارێزنای گەلی-(هەپەگە)یەنە بڕیارش سەر دریان.
"گەریلا نەبیێ باس جە دیموکراسی و دۆزو کوردی نەکریێ"
قەرەیلان ۋاتش: گەریلا گرد وەختێ بە بییەی وێش بییەن بە ئاکتۆرێ بنەڕەتی پەی سەپنای چارەسەری دۆزو کوردی و دیموکراتیزەکەردەی تورکیای. ئەگەر هێزەکێ گەریلای دلێنەبریێنێ، ئارۆ باسێ سەبارەت بە دۆزو کوردی و دیموکراتی جە تورکیانە نەبێ و ئاژەنە بەرۋزیێنێ و سیاسەتو کوشتوبڕی و ئەۋەسڕیەی یاگێش گێرێۋە. ئارۆچ ئەگەر گەریلا نەبۆنە، ئاکەپە کە گرد چێۋێۋش ۋستەن چێرو ڕکێف و دەسەڵاتو وێش بە ئاسانی سیتمەکەو وێش سەپنۆنە و هیچ لەمپەڕ و ئاستەنگیێ پەی بە ئەرەمەرزیاکەردەی فاشیزمی ۋەردەمشەنە نییەن. پۆکەی هەر پێسەو ۋیەردەی کە گەریلا پێشەنگی کوشاییشی ئازادی کوردی و دیمۆکراتیش کەردەن، ئارۆچ درێژەبە هەمان پێشەنگایەتی مڎۆنە.
"جەنگی زەمینیەنە بێچارێ بیێنێ و پەرە بە تەکنەلۆژی مڎانە"
موراد قەرەیلان باسش جە تایبەتمەندی گەریلای جە کوردستان کەردەن و ۋاتەنش: "گەریلاکێ کوردستانی گەریلێ ئایدۆلۆژیکی و سیاسەتیەنێ. گەریلاکێ کوردستانێ چینێ نییەنێ کە پێسەو وڵاتان تەنها ئەرکشان پێشەنگی سەربازی و جەنگی بۆنە، بەڵکو گەریلاکێ کوردستانی پێشەنگێ شۆڕشیەنێ و نمایندەیی گەلی و بواری سەربازی و ئایدۆلۆژی و سیاسەتیشان جە ئەستۆن. دەوڵەتو تورکیای جە جەنگی زەمینیەنە بێچارە و زەمینگیر بییەن، پۆکەی ئیسە قورساییش ۋستەن سەرو جەنگی تایبەتی و دەروونی، سیخوڕی و هەۋاڵگیری و تەکنەلۆژیای سەربازی مۆدێرنی".
"مۆدێرنیزەکەردەی سپاو تورکیای لاۋاز مەکەرۆنە"
قەرەیلان سەرنجش ۋست سەرو هەوڵو تورکیای پەی مۆدێڕنیزەکەردەی سپاکەیش و ئاشکراش کەرد: "چانەیە ئاگاردارێنێ کە ئەگەر سپاکەیشان مۆدێرنیزە بکەراۋە مشیۆم سپاکەیشان ۋیچک "گولانە" و کەم بکەراۋە، بەڵام کارێۋی پاسنە سپاکەیشان لاۋاز و گولانە مەکەرۆۋە. جە کوردستان دەیان هەزار سەربازێشان هەنێ، تەنها تەماشاو ئەلکێ، چەلێ، شەمزینان و شرنەخی بکەردێ کەش و ملە و قوتە و بەرزایی نییەن یەکە سەربازیەکیێ پایگە و بنکە و سیپەی سەربایشان سەرشاۋە دروست نەکەردێ بانە. شارچە چەلێ ئەرەنیشتەکێش ۹ هەزار کەسێنێ، کەچی ۲٤ هەزار سەربازێ چاگە هەنێ. پەی ڕاگیری جە لۋای گەریلای پەی شار و ناوچەکان گرد یاگێشان بە سەربازێ و بنکێ، بارەگێ، سەربازگێ و سیپێ سەربازیێ تەنیێنێ. پۆکەی ئاتاجشان بە دەیان هەزار سەبازان هەن. خاس ئاگادارێنێ ئەگەر ژمارەو سەربازەکانشان کەم بکەراۋە، ئانە یەکسەر گەریلاکێ پەکەکەی یاگێشان مەگێراۋە و پەی هەمیشەی ناوچەکان مەۋزانە چێرو ڕکێفیشان. جار ۋەرو ئانەیە سپاو تورکیای توخنو کەمکەردەو سەربازەکانش نمەگنۆنە. ئانێچە هۆکارەن تا نەتاونە سپاکەیش مۆدێرنیزە بکەرۆۋە.
"دەوڵەت پەشتیش بە میلیشیای بەکرێگێرتەی بەستەن"
موراد قەرەیلان دەستنیشان کەرد: "جیاتی مۆدێرنیزەکەی سپای، دەوڵەت میلیشیای بەکرێگێرتەش بەنامێ «جمەو تایبەتو جەندرمەی (JOH)» مەرزنارە، کە بە کۆنترات و بە زەڕ جەنگ مەکەرانە. یانی ئا میلیشا تەنها پەی زەڕ و پوڵی جەنگ مەکەرۆنە. جە مێڎان و بە کەردەیی سەلمیان، هێزێۋی بەکرێگیریا کە ئامانجش زەڕ بۆنە سەرکوتە نمەبۆنە و نمەتاونە سەنگ و قورسای جەنگی هۆربگێرۆنە و وەختێ هەڕەشێش سەر بۆنە مەجەنگۆنە و هۆرشنیۆۋە. ئێمە ئانەیە ڕۆچانە جە مێڎانەنە بەدی مەکەرمێنە. ئا هێزە جە جەنگی زەمینی گەریلایەنە شکستش واردەن. پۆکەی سوپاو تورکیای پەی شارادەی و قەرەبووکەردەی شکستەکەی قورساییش ۋستەن سەرو جەنگی ئاسمانی، هەۋاڵگیری و سیخوڕی و تەکنەلۆژی مۆدێرنی".
"سوپاو تورکیای و ستراتیژییەکەش بێچارێ کریێنێ"
فەرماندە موراد قەرەیلان جە درێژەو قسەکانشەنە ماچۆنە: "گەریلا شێۋاز و تەکنیک و تەکنەلۆژی جەنگیش هەن و متاونە شکست بە شێۋازو هەواڵگیری و سیخوڕیى و تەکنەلۆژیاى دەوڵەتو تورکیای بڎۆنە و پووچەڵش بکەرۆۋە. ئێمە ئیسە قورسایمان ۋستەن سەرو ئانەیە. شێوازو جەنگی ۋەراۋەر بە گەریلای بێکاریگەر بییەن و بێچارەیی جە فرێۋ جە بوارەکانە سەرو دەوڵەتو تورکیایەرە سەپیان.
"سەردەمو تەکنەلۆژیا و سەرجەنۊ بنیاتنیای و وێڕێکۋستە-یەن"
قەرەیلان دەستنیشانش کەرد: "ئیسە سەردەم سەردەمو زانستی و تەکنەلۆژیا و پەیوەندیی جە ڕای دوور و ئاسمان-یەن. ئانێچە نۊگەرایی و سەرجەنۋ بنیاتنیای و وێڕێکۋستەی سەپنۆنە. ۋەڵ-کەوتەی تەکنەلۆژی بە جەنگی-چەۋە کاریگەری جە گرد بوارەکانو ژیۋای مەکەرۆنە. ئێمە چا بوارەنە سەرجەنۋ وێمان بنیاتمنیێۋە".
"سەرجەنۊ گەریلای ڕێکۋزمێۋە و گەریلا سەدەو ٢١ی خوڵقنمێنە "
موراد قەرەیلان فەرماندەو بڕیارگەو دلێگەو پارێزنای گەلی (نەپەگە - NPG)، ئاشکراش کەرد: "جمیەرەکەمان بە فەلسەفە و ۋەرۋینی (پێشبینی) ڕێبەرەکێمان عەبدوڵا ئۆجالانی جە ڕوو پاردیگمایی وێش نۊکەردەنەۋە و ئانێچە ئاڤانتاژی گەورەش بە ئێمە بەخشان. ئێمە هەمیشە هەوڵمان دان تا بابەتو نۋکەردەی گەریلای ئاژەمانە بۆنە. بەتایبەتی جە دووێ ساڵێ دماییەنە بە چڕی کارمان سەرش کەردەن و سەرەنجام دمایین کوبییەو (هەپەگە)یەن بڕیار سەرو پڕۆژەو نۊکەردەکەی دریا، کە بورای پەروەردەیی سەربازی، پسپۆڕی-کەردەی و گەریلای شارەزا مەگێرۆۋە. بێگومان، شارەزایی-کەردەی ئامانجی بنەڕەتین. بەڵام ئامانجی سەرەکی فاڕای مۆدێلو گەریلایی چین – ڤێتنامییە، کە ئێمە جە ١٩٨٤ تاوەکو ١٩٩٩ پەیڕەۋیمان کەردەن. بەڵام دمای ۲۰۰۰ی هەوڵماندا فاڕمێنەش. ئیسەیچ جە پڕۆژەکەمانە بڕیامان،پەی فاڕیاکەی دان و بە پڕۆژەکەی خەت و مۆدێلو گەریلاو سەدەی ٢١مینی خوڵقنمێنە. پی جۆرە گەریلایەتیی کلاسیک بە تەمامی کۆتاییش مەیۆنە. ئامانج ئانەن تا گەریلا بتاۆنە ۋەراۋەر بە جەنگی تەکنەلۆژی دوژمنی بمدرۆۋە و مایە پووچش بکەرۆۋە و وێش شارەزایانە تەکنەلۆژیەکەی بەکارباۋەرۆنە و سەرکەوتەی مسۆگەر بکەرۆنە. ئیسەیچە هەوڵ مڎێمێ کە پڕۆژەکەی کەردەیی بکەرمێنە".
"گەل و گەریلا ئینێ پێۋەرە"
موردا قەرەیلان جە کۆتایی دیمانەکەیەنە باسش جە ستراتیژی کوشایشی ئازادی کوردی کەردەن و ۋاتەنش: "ستراتیژی کوشایشیمان ستراتیژی گەلی شۆڕشگێڵیەن و چا ستراتیژیەنە گەریلا تەنها نییەن و بەڵکو گەل و گەریلا ئینێ پێۋەرە و شان بەشان کۆشانە و (سێک)و کوشاییشی ئازادیمان بناغەش سەرو ئانەیە نریانەرە و گەریلا پێشەنگیش مەکەرۆنە. یانی هەوڵ مڎێمێ ببمێ بە هێزی سەرەکی جە ناوچەکەنە و پی جۆرە ببمێ بە وەڵامدەرو چەمەڕاییەکانو ڕێبەر ئاپۆی و گەلی و هیۋا و ئاۋات شەهیدەکانمان بەدی باۋەرمێنە. بەدڵنیایی باۋەڕمان پانەیە هەن کە گەریلا ڕوو بە سەرکوتەیەن و دۆزو کوردی سەربوزۆنە".
