نزیک بە یەک مانگەن لەیلا گیوڤەنە پارلەمانتارەو هەدەپەی، جە زیندانەنە دژ بە گۆشەگیرکەردەی و چارنۋیس-نادیاری ڕێبەر ئۆجالانی مانش جە ۋاردەی گێرتەن. پەی پەشتیۋانی-کەردەی جە لەیلێ و داۋاکاریەکانیش، جە سەرنیشت (باکور)و کوردستانی، تورکیا، ئەوروپا و هەولێرو پانیشت (باشور)و کوردستانی چنڎین چالاکیێ مانگێرتەی ئەنجام دریێنێ. بەڵام تا ئیسە ڕژێمو تورکیای وەڵامێش پەی داۋاکاریەکەی نییەن.

جە چوارچێۋەو پەشتیۋانیەکانە، جە قەندیل بە وێنیشاندای پەشتیۋانی جە مانگێرتەکەو لەیلا گیوڤەنێ و سەرجەم مانگێرتەکانو تەری کریا و بێوەڵامی ڕژێمو تورکیای شەرمەزار کریا. نیشتەرەکێ قەندیلی سەرەتا جە دەگاو کوزینەی کۆبیێۋە و دماتەر بەۋێنیشاندای و ۋاتەی دروشمان و بەرزکەدەی لافیتان پەشتیۋانی ۋێشان بەرۋست.

سۆران عەلی بە نمایندەیی قەندیلیەکان قسێش کەردێ و ۋاتش: "جە ۲۰۱۱ تا ئیسە ڕژێمو تورکیای ڕاش بە پارێزەرەکانو ڕێبەر ئۆجالانی نەڎێنە تا سەردایش بکەرانە، ئانێچە کوردێ و ئازادیۋازێش نیگەرانێ کەردێنێ. بێگومان دمای گۆشەگیرکەردەی ئۆجالانی، ئیتر بارودۆخەکە جە تورکیا شێۋیا و ئاڵۆز بی، چونکە ئۆجالان پەی پڕۆسەو چارەسەری کرێڵەن و ئازادکەردەیش پڕۆسەکەی خێراتەر مەکەرۆنە".

سۆران عەلی ۋاتیچش: "۳۰ ڕۋێن لەیلا گیوڤەنە پارلەمانتارەو هەدەپەی جە زیندانەنە مانش جە واردەی گێرتەن و داۋاو ئازادی ڕێبەر ئاپۆی مەکەرۆنە، هەڵبەتە داۋاکاریەکەش هینو ملیۆنان کەسان و ئێمەیچ پەشتیۋانیش ۋنە مەکەرمێنە و داۋاچ جە ڕژێمو تورکیای مەکەرمێنە، تا گۆشداری داۋاکاری لەیلا گیۋڤەنێ و سەرجەم مانگێرەکانو باکور، باشور، ئەوروپای بکەرۆنە و وێش چانەی زیاتەر زەڕتاڵ تەر نەکەرۆنە. داۋاچ جە ڕێکۋزیێ میاندەوڵتیێ و دامودەستگێ ئەوروپای و جیهانی مەکەرمێنە ۋەراۋە بە گۆشەگیرکەردەی ڕێبەر ئۆجالانی بێدەنگێ نەبانە و فشار بۋازانە سەرو تورکیای تا کۆتایی بە گۆشەگیریەکەی باۋەرۆنە".