کۆنسەو ڕاۋەبەری هامسەرۆکایەتی کۆما جڤاکێن کوردستان-کەجەکەی ئاشکراش کەرد: "دژ بە بڕیارەکەو ئەمەریکای کە بەشێۋەن جە پیلانگێڵێ میاندەوڵەتی، مشیۆم گەلەکەمان و هێزە دیموکراتییەکێ بە پاخێزا و ناڕەزایەتی شایستە نیشانە بڎانە".
دمابەدمای ئانەیە کە وڵاتە یۆگێرتەکێ ئەمەریکای خەڵاتش پەی دەستگیرکەردەی ڕاۋەبەرانو پەکەکەی دیار کەرد، کۆنسەو ڕاۋەبەری هامسەرۆکایەتی کۆما جڤاکێن کوردستانی-کەجەکە بە ۋەڵاکریێۋ هەڵۋێستو ئەمەریکاش سەرکۆنە کەرد و بە دوژمنکارانە و درێژەدای پیلانگێڵی میان دەوڵەتی دژ بە گەل و جمیەرو ئازادی کوردی بە نامێش کەردەن. کەجەکە داۋاش جە گەلو کوردی و هێزە دیموکراتوازەکان کەردەن، تا دژ بە هەڵۋێستو ئەمەریکای بە پا خێزا و ناڕەزایەتی شایستە نیشانە بڎانە.
کەجەکە دەستنیشانش کەردەن: "ئەمەریکا سەبارەت بە هاۋەڵانمان (جەمیل بایک، دوڕان کاڵکان و موڕاد قەرەیلان)ی، کە ئەرەمەرزنەرێ پەکەکەی و پێشەنگێ جمیەرو ئازادی کوردیەنێ و ئیسەیچ جە ڕاۋەبەری پەکەکەی و کەجەکەی و هەپەگە-یەنە یاگێشان گێرتێنە، بڕارێ بێ بنەما و تۆمەتبارانەش دان کە دەستگیرکەردەیشان بە ئامانج مەگێرۆنە و ئاشکرا کریان کە هەر کەسێ یاگێ و شۆنیشان ئاشکرا بکەرۆنە بە زەڕ خەڵات مەکریۆنە. ئی بڕیارە سیاسی و بێ بنەمان و دژ بە جمیەری ئازادی کوردی دریان و هیچ بنەمایێ سیاسی، ئەخلاقی، ۋیژدانی و حقوقی گەردونیش نییەن. بڕیار و هەڵۋێستێن کە بە گردی بە هۆکاری ئایدلۆژی و سیاسی و بە ڕەفتاری دوژمنانە دریان. جە کەسایەتی هەڤاڵانمانە نەک تەنیا دژ بە پەکەکە، کەجەکە و هەپەگەی، بەڵکو دژ بە سەرجەم کوردی و کۆشایشی دیموکراتیبڕیارەکە دریان".
کەجەکە ئاشکراش کەردەن: "دەوڵەتانێ کە دژ ڕێبەر ئاپۆی، پەکەکەی، جمیەرو ئازادی و پێشەنگەکانشان سیاسەتو قڕکەردەیشان بەردەن ڕاۋە و چەنی هێزە دماکەوتە هەرێمی و هامکارە میاندەوڵەتیەکانشان دوژمنایەتی ڕێبەر ئاپۆی و پەکەکەی و جمیەری ئازادی و پێشەنگەکانشان کەردەن، ئامانج و هەوڵشان تەسفیە کەردەی و دلێنەبەردەیمان بییەن. پیلانگێڵی و گەلەکۆمە کە جە ۹ تشرینو یەکەمو ۱۹۹۸ی دەستش پنەکەرد و جە ۱٥ شوباتو ۱۹۹۹ی بە بەدیلگێرتەی ڕێبەر ئاپۆیی بە ئەنجام یاۋا، بە کامە ئامانج ئەنجام دریا، ئی بڕیار و هەڵۋێستەو ئیسەیچ بەهەمانج ئامانجەن و درێژە دایەن بە پیلانگێڵنای و گەلەکۆمەکەی. هەڵبەتە پیلانگێڵی و گەلەکۆمەکە بە هێز و وردبییەی قۆڵو ڕێبەر ئاپۆی و بە کۆشایی ئازادی پەکەی تا ئاستێ فرە مایە پووچ کریاۋە. جە ئارۆنە جمیەری ئازادی جە وەرهۆرزی میانیەنە بییەن بە ئاکتۆرێ گرنگ و کاریگەریش سەرو وەرهۆرزی میانی نیانەرە. ئەی بڕیارە هێرش-ئامێزەو ئەمەریکای پەیوەندیش پانەیەۋە هەن. جە لایێ تەرەۋە کۆشایشی ئازادی کوردی سەرەڕاو گاریگەریش سەرو وەرهۆرزی میانی، پەی کۆشای ئازادی و دیموکراتی جیهانی دەروازێ نۊش کەردەنەۋە و یاۋنانش قۆناغ نۋین. ڕێبەر ئاپۆ جە ۋەراۋەر بە دەوڵەت نەتەوەی، ئەڵتەرناتیڤو وێڕاۋەبەری گلێرگەی دیموکراتیش، پێسەو چارەسەری پەی سەرجەم کێشە سیاسی و کۆمەڵایەتی و ئابوریەکان پێشکەش کەرد و ۋست ڕووە. هامتەریب چەنی ئانەیە جە بەریتانیا کە بە نیشتمانو سەندیکاکان ئەشناسیان، سەرجەم هێزە دیموکراتی-وازەکێ، نوسەرێ، ڕۆشنۋیرێ و سەندیکاکێ، پەی ئازادی ڕێبەر ئاپۆی کەمپینێ گرنگشان دەسپنەکەردەن و هامشانیچش گەلو کوردی و هێزەدیموکراتیوازەکێ بە دروشمو (گۆشەگیری شکست مڎمێنە و فاشیزمی هۆرشانمێۋە و کوردستانی ئازاد مەکەرمێنە) بەهەمان مەبەست کەمپینشان بەردڕاۋە. بڕیار و هەڵۋێستو ئەمەریکای بەشێش پەیۋەستەن بە ئا کەمپینیە و ئامانجشەن ئاسەتنگی پەی کەمپینەکەی دروست بکەرۆنە".
بە پەیلۋای و هۆرسەگنای کەجەکەی، بڕیارەکەو ئەمەریکای هێرشێ دوژمنانە و بێئەخلاقانەن دژ بە کوردی و جمیەرەکەیش و دەستنیشانش کەردەن: "بڕیارەکە ساتەوەختێنە دریان کە جمیەرو ئازادی کوردی جە گرد جایێ و شۆنێۋە ۋەڵێ-کەوتەن و کورد جە ژیۋای ئازاد و دیموکراتیکی نزیک بییەنەۋە و پی پیلانگێڵیە گەرەکشانە ئاسەتەنگیش پەی دروست بکەرانە و کۆشایشی ئازادی پەکەکەی دما بۋزانە و هامکات درێژە بە باڵدەستی وێشان سەرو کورد-یەرە بڎانە".
کەجەکە باسش جە ڕوودای و ڤییەرەکان جە٤۰ ساڵێ ۋیەردەنە و ڕۆڵ و کاریگەری پەکەکەی کەردەن و جەختش کەردەنەۋە: "بە بێ ۋەرچەمگێرتەی ڕۆڵ و کاریگەری پەکەکەی، هۆرسەنگنای پەی ڕوویدایە سیاسی، نه‌ته‌وه‌یی و كۆمه‌ڵایه‌تییه‌كان جە هه‌ر چوار پارچه‌و كوردستانی و ناوچەکەنە مومکن نییەن، هەر ئانیچە بییەن بە بایس تا فرەتەرین دوژمنایەتی کوردی، ڕێبەر ئاپۆی و پەکەکەی و سەرکردایەتەکەیش بکریۆنە".
کۆنسەو ڕاۋەبەری هامسەرۆکایەتی کەجەکەی، ئاماژەش بە بەشداری پەکەکەی و گەریلاکانش جە جەنگو داعشی دان و ئاشکراش کەردەن: "جە چنڎ ساڵێ ۋیەردێنە بابەتێ کە فرەتەر کوردستان و وەرهۆرزی میانی و جیهانش سەرقاڵ کەردە بێ، داعش و هێرشەکێش بێنێ. پەکەکە جە شەنگال ڕاگیریش جە قڕکەردەو ئێزیدیەکان بەدەستو داعشی کەرد، کە یۆ گلێرگە کلتوری و باۋەڕیە دێرینەکانو مرۆڤایەتیەنێ. ئانێچە دەرسیێۋی ئەخلاقیش بە هێزە سیاسیە هەرێمی و میاندەوڵەتیەکان دا و چێرو بارو ۋەرپەرسیاری و تۆمەتێۋی قورسیەنە ڕزگارێش کەردێ. هەر پەکەکە و گەریلاکێش بێنێ ڕاگیریشان جە هێرشو داعشی پەی سەرو هەۆلێری کەرد و دەروازەو ئاگێشان ڕوو بە داعشی ۋستەرە. هەر گەریلاکێ هەپەگەی و یەژەئا ستاری بێنێ جە سلێمانییە و کەرکوک شابەشانو پێشمەرگەی ڕووبەڕوو داعشی بیێۋە. جە سەکەوتەی کۆبانیەنە کە سەرجەم کورد و گەلێ و هێزە دموکراتیوازەکێ جیهانی بەشدارێش بێنێ، گەریلاکێ هەپەگەی و یەژەئا ستاری هامتەریب چنی یەپەگە و یەپەژەی ڕۆڵی گەورەشان بێنە و بە ڕۆحی فیدایانە جەنگشان کەرد و قوربانی گەورەشان دا. پەکەکە نەک تەنیا جەنگو داعشیش کەرد، بەڵکو بە هۆشمەندی نەتەوەی دیموکراتیکی پەی سەرجەنۊ بنیاتنیای وەرهۆرزی میانی کە پەشتیش بە پێۋەرە ژیۋای عه‌ره‌ب، كورد، تورك، سریانی، ئه‌رمه‌نی، چه‌ركه‌ز و فارسی بەستەن، هنگامێ گرنگەش نیان. شەڕڤانێ یەپەگەی و یەپەژەی کە وێشان مەۋاچان: سەرو خەتو ڕێبەر ئاپۆی دژ بە داعشی و تەرۆری مەجەنگانە، جە کۆشکو ئیلیزەو فەڕەنسای پێشۋازی کریێ. نمایندێ ڕۆژئاڤاو کوردستانی جە وەزارەتو بەرو ئەمەریکای مێمانداری کریێ. ئینێ گرد ۋەرو چەمو جیهانیاۋە کریێ. چا ساڵانە ئانە کە فرەتەرین پەیوەندیش چەنی داعشی بییەن و باسش کریان، ئەردۆغان و ئاکەپە بیێنێ. کەچی ئیسە ئەمەریکا پەی دەستگیرکەردەی ڕاۋەبەرکانو پەکەکەی، کەجەکەی و هەپەگەی خەڵاتش دیاری کەردەن! ئینە یانی پەشتیۋانیکەردەی جە سیاسەتو دوژمنکارانە و تاۋانکارانەو تەیب ئەردۆغانی ۋەراۋەر بە کوردی و هێزە دیموکراتیەکان. سەمەرە ئانەن کە ئیسە گەرەکشانە ئانیشا دلێنەبەرانە کە دژ بە داعشی جەنگیێنێ و ئانیشاچە خەڵات بکەرانە کە چەنی داعشی پەیوەندیشان بییەن!".
کۆنسەو ڕاۋەبەری هامسەرۆکایەتی کۆما جڤاکێن کوردستان-کەجەکەی داۋاش کەردەن: "دژ بە بڕیارەکەو ئەمەریکای کە بەشێۋەن جە پیلانگێڵێ میاندەوڵەتی و درێژەدای بە پیلانگێڵیەکەی، کورد و گەلێ و هێزە دیموکراتییەکێ وەرهۆرزی میانی و جیهانی بە پاخێزانە و ناڕەزایەتی نیشانە بڎانە. پێویستەن سەرجەم گەلێ جیهانی و هێزە دیموکراتەکێ خاس بزانانە، ئانێ کە جە خەتو ئازادی ژەنێ و ڕێبەر ئاپۆی و ئازادیەنە مەکۆشانە و ئینێ ڕێبەرێ پەکەکەی و هەپەگەیەنە کە پەی ئازادی کوردی کە یۆن جە دێرینتەرین گەلەکانو جیهانی خەبات مەبەرانە ڕاۋە، هێزەکێ گەریلایەنێ و مشیۆم خاوەنداری بکریانە. ئەمەریکا بە بڕیاری بێ بنەمای سیاسی نمەتاۆنە ئی ڕاستییەیە پێچەۋانە بکەرۆۋە. حکومەتو ئەمەریکای کە متمانەش جە گەلەکەیش هۆرگێرتەن، نمەتاۆنە پی تۆمەتە بێ بنەمایە قەناعەت بە گەلەکەیش بکەرۆنە و پەکەکەی و جمیەرو کوردی ۋەرو چەماش سیاۋ بکەرۆنە. بێگومان پەشتو بڕیارەکەو ئەمریکای-یەۋە بەرژەوەندیێ و دەستکەوتێ سیاسیێ، ئایدلۆژیێ و ئابوریێ هەنێ و ئەمەریکا بییەن بە هامکارو هێزە پیلانگێڵە تاۋانکارەکان. ئەشیەی ئەمەریکا سەبارەت بە گەلەکۆمەو ۱۹۹۹ی کە دژ بە ڕێبەر ئاپۆی ئەنجام دریا ڕەخنەش جە وێش گێرتایە. بێگومان ئارۆ ئی بڕیار و هەڵۋێستەشان بۆ بایس تا جەلاو گەلو ئەمەریکای باج بڎانە و سەبایچ جە ۋەردەمو دادگاو مێژوویەنە دادگایی بکریانە".
کۆنسەو ڕاۋەبەری هامسەرۆکایەتی کۆما جڤاکێن کوردستان-کەجەکەی جە کۆتایی ۋەڵاکریاکەیشەنە جارێ تەر داۋاش کەردەن: " گەلو کوردی، گەلێ وەرهۆزری میانی و سەرجەم دیموکراتیوازێ دنیای دژ بە بڕیارە بێ بنەما و نائەخلاقیەکەو ئەمەریکای بێ دەنگێ نەبانە و چی ڕووانە کە داۋاو ئازادی ڕێبەر ئاپۆی و بەرۋستەی نامێ پەکەکەی جە لیستو تەرۆری مەکریۆنە، ۋەراۋەر بە هێرشو سەر هەڤاڵەکانمان (دووران كاڵكان، جه‌میل بایك و مووراد قه‌ره‌یلان)ی بمدراۋە و هەڵۋێستی شایستە و جدی نیشانە بڎانە. پێۋیستەن کۆشای ئازادی فراوان بکریۆنە و پەرەش پنە بڎریۆنە و زیاتەر جە جاران داۋاو ئازادی ڕێبەر ئاپۆی بکریۆنە. بڕیارو ئەمەریکای جە کەسایەتی هەڤاڵانمانە ئامانجش دلێنەبەردەی و قڕکەردەی کوردی و جمیەرکەیش و دیموکراتی و ئازادیۋازیەن".
