كه‌ژه‌كه پیرۆزباییش جە هەپەگەی و یەژەئا ستاری کەرد
کەژەکە چالاکیەکەو شەمزینانییش جە گەریلاکانو هەپەگەی و ژەنە گەریلاکێ یەژەئا ستاری پیرۆز کەرد کە بە تەکنیکی نۊی سەربازی و ئامێری ئاسمانی و بەکاربەردەی مدرامان و جەنگی زیرەکی ئەنجامشان دابێ.
کوردیناسیۆن-و کۆما ژنێن کوردستانی-(کەژەکە)، بە پەیامێ ستاییش و پیرۆزبایی وێش ئاڕاستەو گەریلاکانو هێزەکێ پارێزنای گەلی- هەپەگە و ژەنە گەریلاکێ یەکینەکێ ژەنێ ئازادێ-یەژەئا ستاری کەرد، کە جە دەڤەرو ڕوبارۆک-و سەر بەر شەمزینانی جە چوارچێۋەو جەنگی زیرەکیەنە بە تەکنیکی نۊی سەربازی و ئامێری ئاسمانی ئەنجامشان دابێ و سەرەڕاو تەقنای و خاپورکەردەی سەربازگەکەی، کوشایی و برینداربییەی دەیان سەربازێ دوژمنیش ۋنە کەوتەبێۋە.
کەژەکە ئاشکراش کەردەن: "دەسەڵاتە فاشستیەکەو ئاکەپە و مەهەپەی جە ۋەهاری ۋیەردەۋە تا ئیسە جە هەر چوار بەشەکەو کوردستانی بەتایبەتی جە وەرنیشت(ڕۆژئاڤا)، شەنگال و هەرێمەکێ پارێزنای میدیای هێرشێ قڕکەرانێش دژ بە کوردی و جمیەرە ئازادیەکەیش دەست پنەکەردێنێ. جە ۋەرانۋەرەنە گەل و گەریلا بە مدرامان و ئیرادە هێرشەکێشان مایەپووچ ێکەردێنێۋە. چالاکیەکەو ئی دمایەو ژەنە گەریلاکانو یەژەئا ستاری جە شەمزینان بەردەۋامی ئا ئیرادە و مدرامانە سەردمیانەیەنە و وەڵامێ بەهێزەن دژ بە هێرەشە داگیرکەری و قڕکەریەکانو تورکیای، هاموەخت هۆرچەرخیایێ مەزنەن و نیشانەش مڎۆنە چالاکی گەریلای دەربازو قۆناخێۋی نۊی بییەن".
کەژەکە دەستنیشانش کەردەن: "جە ۋەراۋەر بە جە باربەردەی مدرامان و ئیرادەو گەریلای، چالاکی شەمزینانی وەڵامەن و خوڵقنای گەریلایەتی سەدەی ۲۱ مین-یەن. بێگومان گەریلایەتی سەدەو ۲۱ مینی و بەکاربەردەی تەکنیک و شێۋازی نۊی سەربازی و جەنگی زیرەکی هۆکارێنێ پەی شکستدای دوژمنی و یاۋای بە سەرکەوتەی و بێگاریگەرکەردەی هێرشەکان. هامکات جە سایەشەۋە کۆشای گەریلای و ئازادی ڕێبەر ئاپۆی مسۆگەر مەکەرێۆنە. بێگومان چالاکییەکە جە تۆڵەو هەڤاڵ ئاتەکان و هەڤاڵ زەگی شەنگالی و هەڤاڵێ فەرماندێ میدیا ماۋای ئەنجام دریان، پۆکەی فرە مانادارەن و یاگێ ستاییشی و پیرۆزبایی گەرمییەن".
کوردیناسیۆن-و کۆما ژنێن کوردستانی-(کەژەکە) جە دمایی پەیامەکەیشەنە، جارێ تەر پیرۆزبایی ئەنجامدای چالاکییەکەی و هەنگام و تاکتیکی نۋ و جەنگ و مدرامانی زیرەکی جە هەپەگەی و یەژەئا ستاری مەکەرۆۋە.
