لیرەی تورکی زیاتەر بەهاش جە دەسدا و گرانی بازاریش شۆنیەرە ئاما

بە خێرایی لیرەی تورکی بەهاش ۋەزۆرە و ئابوری تورکیای تەپۆرە و جە ۋەراۋەرەنە دەوڵەت و بانکی ناوەندی تورکیای بێچارێنێ.

جە تورکیا سیاسە هەڵەکێ ئەردۆغانی و وێپەسەنڎی و ملهۆڕیەکەش، ئابوری ئا وڵاتێشە وێران کەردەن و ڕۆچ بە ڕۆچ و بەخێرایی لیرە ۋەراوەر بە دراۋە جیهانیەکان زیاتەر بەهاش ۋەزۆرە و تەپۆرە کە ئانێچە کاریگەری فرە خراپش سەرو ئابوری و رانی بازاری نیانەرە.

جە ئیسەنە، 1 دولاری ئەمەریکی، جە بۆرس و بازارەنە بە 6,26 لیرێن. هەر پاسە 1 یۆرو بە 7.22 لیرێن. دەوڵەت و بانکی ناوەندی تورکیای جە ئەرەتەپای لیرەی و ئابوری وڵاتەکێش بێچارێنێ و ئانێچە ڕەنگەن زیاتەر وێرانبیەی ئابوری و جەدەسدای زیاتەرو بەها لیرەیش شۆنیرە بەیۆنە.

ئەرەتەپای زیاتەرو لیرە و ئابوری تورکیای، دمای سەردای کیاستە(شاند)و تورکیای پەی ئەمەریکای ئاما، کە ئەنجامی ئەرێنیش شۆنیرە نامان. جەی بارەوە، ڕۆچنامەو واڵ ستریت جۆرناڵی ئه‌مه‌ریكی ئاشکراش کەردەن؛ کیاسەکەو تورکیای پەی ئەمەریکای جەدایوئەسای و گفتوگۆکاشانە چەنی ۋەرپەرسە ئەمەریکیەکا پەی چارەسەری کێشەکا میانیشا شکشتش ئاردەن و بە نائومێدی و دەسی هاڵی گێڵێنێۋە.

واڵ ستریت جۆرناڵ، باسش چانەیە کەردەن، ڕەنگا هەن کە دۆناڵد ترامپ و ئیدارەکەش سزێ زیاتەرێ سەپنا سەرو تورکیا-یەرە، ئەگەر ئەردوغان و ڕژێمەکەش سازش چەنی ئەمەریکای نەکەرانە.