سەردای جەۋانا شەنگالی پەی قەندیلی کە هیزی یەکشەممە ئەنجام دریا، ئامانج چنەش پەشتیۋانی کەردەی بێ جە قەندیلیەکا و قەڵغانۍ زینڎێ، کە ۲٤ڕوێن دژ بە داگیرکاری تورکیای بەردەۋامەن.

شەنگالیەکێ جەلاو قەندیلیەکا و ئەنداما چالاکی قەڵغانۍ زینڎێ بەگەرمێ خێرئامای کریێ. دماتەر سیروان ڕاپەڕین، بەنامێ ئەنداما قەڵغانۍ زینڎێ قسێش کەردێنێ و سەرەڕا خێرئامای واتەنش: " ئانێ کە جەلاو عوسمانیەکاۋە ڕووبەڕوو کۆمەڵکوشی بیێنێۋە ئارۆ ئامانێ قەندیل، ئێمە جە هۆکارو ئامای جەۋانا شەنگالی پەی قەندیلی میاۋمێنە، ئێزیدیەکێ جە ۋیەردەنە سەرو دەسو عوسمانیەکا چنڎین جارێ کۆمەڵکوشێ کریێنێ و پۆکەی ئارۆچ جە گرد کەسێۋی تەری زیاتەر جە مەتەرسی هەڕەشەکا تورکیای پەی سەرو قەندیلی و پانیشتو کوردستانی نیگەرانێنێ و هەستیارێنێ ".

دماتەر بەنامێ گەنجە ئێزیدیەکاۋە، گەرزان ئازەر قسێش کەردێنێ و واتەنش: " سەروەختو فەرمان و کۆمەڵکوشی ٣ ئابو ٢٠١٤ یەنە، جە قەندیل سەڎان گەریلێ پەی پارێزنای ئێزیدیەکا ئامێ شەنگال و ئێزیدخان، پۆکەی ئاساییا ئارۆ ئێمێچ جە شەنگال بێمێ قەندیل و پەشتیوانیش چنە کەرمێنە. ئارۆ بشۆم سەرجەم گەنجێ هەر چوار بەشو کوردستانی پێسەو ئەرکێۋی پیرۆزی جە قەندیل بانە و بە ڕۆحیەتو زیلانێ و گەریلاکاۋە هەرێمەکەی پارێزنا و یەکێتی نەتەوەیی دروس بکەرانە".

گەرزان،  داواش جە گەنجا ئێزدیخانی بەتایبەتی ئانێ ئینێ کامپەکانە کەرد، ڕووە جە قەندیلی بکەرانە و دژ بە داگیرکەرا بمدراۋە و قەندیلش بە یەگێ ئومێدی نامێ بەرد.

جە دماییەنە بەبۆنەو  ٢٣ مین ساڵیادو شەهیدبییەی زینەب کناجی، ئەشناسیێ بە زیلان-ێ، گەنجە شەنگالیەکێ و چالاکۋانەکێ قەڵغانۍ زینڎەی سەردای مەزارگەو شەهیدا محەمەد قەرەسوونگور-یشا کەرد.