بڕیارەن ۲۷/۱۱/۲۰۱۸ی جە شارو هەڵەبجەی ۹ کۆمپانیێ ۋرەتەی چەک و مادێ کیمیاوی دادگایی بکریانە، کە چەک و مادێ کیمیاۋیێ-شان بە ڕژێمە وڕیاکەو بەعسی و سەددام حوسێنێ ۋرەتەن. جەی چوارچێۋەنە ئارۆ نیمەڕۆ جە هۆڵ-و میری جە هەڵەبجە، بە ئامادەبییەی کەسوکارو شەهیدانو کیمیاۋارانی و پارێزەرەکانشان کۆبییەی ئەنجام دریا و سەبارەت دەرنجامو سکاڵا تۆمارکەردەی دژ بە ئا ۹ کۆمپانیایە زانیار دریا و قسێ و باسێ کریێ. جە کۆبیەکەنە ئاشکرا کریا، کە ۲۸و ئی مانگی جە دادگاو بەرایی هەڵەبجەی دووەمین ئەرەنیشتە پی دادگاییکەردەی ۹ کۆمپانیاکەی ڕێکۋزیۆنە.

هەر جە کۆبیەکەنە پارێزەر بەکر حەمە سدیق، باس جە سکاڵاکەی کەرد و ۋاتش: پەی یاۋای بە ئامانجی، کات و بوردباری زەرورەن و بەلانی کەم ۳ ساڵێ وەخت پێویستەن تا سکاڵاکە یەکلایی بکریۆۋە. نامبریا داۋاش کەرد، گرد لایێ بە پاو ئەرک و توانای پەشتیۋانێ و هامکارێ ببانە تا ئەنجام بەدەست بۋزیۆنە و دەرەنجام ئا ۸ کۆمپانیا جیهانیێ سزا بدریانە.

یاگێ بەیادئاۋردەیەن، کە جە ۱۲/۰۳۲۰۱۸ی، سکاڵا دژ بە ژمارێۋ کۆمپانیێ و کەسێ بیانیێ تۆمار کریابێ، کە چەک و چۆڵە و مادێ کیمیایێشان بە ڕژێمو بەعسی و سەدام حوسێنی ۋرەتێنێ و ڕژێمەکەش جە کیمیاۋارانکەردەی هەڵەبجەی و کۆمەڵکوشکەردەی ٥ هەزارێ جە هامشاریانو شارەکەی بەکارش بەردێنێ.
جەی چوارچێۋنە جە ۲٥/۰۷/۲۰۱۸ی، جە هەڵەبجە ئەرەنیشتەی پەی دادگاییکەردەی ئا کۆپانیا و کەسا ڕێکۋزیابێ، بەڵام بەهۆو ئانەیە کە سکاڵاکە نەیاۋابێ دەستو تۆمەتبارەکان، ئەرەنیشتەکەی دما ۋزیابێ و بڕیارەن ئەرەنیشتەی دووەم جە ۲۷/۱۱/۲۰۱۸ی ئەنجام بدریۆنە.

بە پاو زانیاری پارێزەر جەمال جەلال-ی کۆمپانیاکێ کە چەکشان دان بە ڕژێمو سەددامی و بەعسی بریتینێ جە: ( توو وی) و ( كارڵ كۆڵ) و (هێربەرگر)ی ئەڵمانی و ( دیدیتریش) فەرەنسی، ( گروپ پرۆتێل) و (جەنەرال مەریترین)ی هۆڵەندی، ( وێت)ی بەریتانی و ( مێڵ سپرینگ ئینەتەرناشناڵ)ی هۆڵەندی و (لۆكۆسۆمبۆرگ)ی لۆكۆسۆمبۆرگی. تا ئیسە ۲ جە کۆمپانیاکان ئامادەیشان نیشانە دان بشداری ئەرەنیشتەکەو هەڵەبجەی ببان.