٤ حزبێ پەرلەمانو تورکیای ئۆپەراسیۆنو بەرۊ سنوریشان درێژ کەردەۋە
جگە جە هەدەپەی (ئاکەپە، جەهەپە، مەهەپە و ئیی پارتی) جە پەرلەمانو تورکیای جیاتی چارەسەرکەردەی قەیرانەکان، ئۆپەراسیۆنو بەرۊ سنوریشان درێژکەردەۋە.
جە یەکەمین ئەرەنیشتەو پارلەمانە نۊکەو توکیایەنە، یەکەم بڕیار درێژکەردەو ئۆپەراسیۆنە داگیراریەکەو بەرۊ سنوری بێ. هەر یۆجە ئاکەپە، مەهەپە، جەهەپە و ئیی پارتی و بە دژبەری هەدەپەی بڕیارشان دا، تا ئۆپەڕاسیۆنو بەرو سنوری پەی ساڵێۋ تەری درێژ بکریۆۋە. ئی بڕیارە وەختێۋەنە دریان کە تورکیا گرفتارەن بە چنڎین قەیرانێ ئابوری، سیاسی، کۆمەڵایەتییێ و جیاتی چارەسەرکەردەیشان، کەچی بە بڕیارو ئۆپەراسیۆنو بەرو سنوری قۆڵتەرێ کریاۋە.
جەی بارەۋە پارلەمانتارو هەدەپەی هشیار ئۆزسۆی، جە گفتوگۆکانو پارلەمانیەنە ڕوو بە ئا ٤ حزبێشە وات: "ئیستە ئەشیەی بڕیار پەی چارەسەری قەیرانەکان و خاستەرکەردەی ژیای خەڵکی دریا بیێ نەک پەی درێژکەردەی ئۆپەراسیۆنی کە کێشە و قەیرانەکان قۆڵتەر مەکەرۆۋە. ئەشیەی باس جە کارگە و دوکانەکان کریا بیێ کە مایەپووچێ و تاپولێ بیێنێ. باس جە کەسانێ کریا بیێ کەبەهۆو قەیرانەکانەۋە وێشان مەکوشان. باس جە هۆرشنیای خێزانەکان کریا بیێ و باس جە هۆکارەکانو بە هەدەردای بودجە و زەڕی کریا بیێ. کەچی بڕیار پەی جەنگی مڎێدێ! ئینە چ گفتگۆ و بڕیارێۋەن".
سەرەڕا ناڕەزایەتی هەدەپەی، کە چی ئا ٤ حزبە بەرژەوەندی گەلیشان نادیدە گێرت و ئۆپەراسیۆنەکەشان تا ٣٠ی تشرینو یەکەمو ٢٠١٩ی درێژکەردەۋە.
ئۆپەڕاسیۆنو بەرو سنوری دژ بە پانیشت و وەرنیشتو کوردستانی ئەنجام مڎریۆنە و سپا داگیرکەرەکەو تورکیای فرە جارێ سنورو ئا دۋە بەشەو واڵاتیش بە زەمینی و ئاسمانی بەزنان.
