تت

ئارۆ پەنج شەممە ۲۸ حوزەیرانی، جە بارەگەو پارلەمانو ئەوروپا، جە شارو برۆکسل-و پایتەختو بەلجیکای، کۆنفرانسو میاندەوڵەتیی پەرسو کوردی و تورکیا و دیموکراسیەت جە وەرکەوتو دلینی و داگیرکاری تورکیا جە پانیشت و وەرنشینو کوردستان  " داگیرکاری تورکیای جە عەفرین " دەسش بە کارەکاش کەرد

جە کۆنفرانسەکەنە،  ژمارەێۋ ئەکادیمیسیەنێ بیانیێ و کوردێ، نمایندێ پارت و لایەنە سیاسیی و مەدەنیەکا کوردستانی، چەنڎین سیاستمەدارێ و پارلەمانتارێ کوردێ و ئەوروپیێ و ژمارێۋ دەزگێ یاۋنەریێ( مەدیا) کوردیێ و بیانیێ بەشدارێشەنێ.

کۆنفرانسەکە کە جە لایەن کۆنگرەو نەتەوەیی کوردستان-کەنەکە-ی، ئەنیستیتۆی کوردی جە برۆکسل، بۆردو پەیوەندیەکا تورکیا و پارلەمانی ئەوروپا-ی ڕێکۋزیان، سەعات ۰۹:۳۰ دەیەقێ سەرسەبای دەسش پنە کەردەن و  تا سەعات ۱۹:۰۰ ئێوارەگای درێژەش بۆنە.

کۆنفەرانسەکە، سەرەتا بەخێرئامای بەشدارا  و بە قسەکەردەی ژمارێۋ پارلەمانتارێ ئەوروپیێ سەرو مژارەکا و نیشاندای سینەڤزیۆنی سەرو داگیرکەردەی عەفرینی بەردەۋامی بەکارەکاش دا.
هەرپاسە هیڤی موستەفا، هامسەرۆکەو کانتۆنو عەفرینی، بە شێوەی زینڎە بە سکایپ جە کانتۆنی شەهباوە بەشدارەو کۆنفەڕانسی بییە و باسش جە وەڵێ و دمای داگیرکەردەی عەفرینی و داگیرکاری تورکیا و تاۋانەکاش چا کانتۆنە کەرد و داۋاش جە بەشدارا کۆنفرانسی و پارلەمان و یەکێتی ئەوروپای و کۆمەڵەی جیهانی کەرد، بێدەنگێ نەبانە و هەڵۋێست نیشانە بڎانە و هامکاری عەرفرینەیەکا بانە، کە ئیسە جە دۆخێیۋی فرە سەختەنە ژیۋای بەسەر مەبەرانە.

کۆنفرانسەکە، سەرەڕاو خێرئامای ۋەرقسەی،  ٤ پانێڵێ مەگێرۆنە وێ کە ئیێنێ:

پانێڵی یەکەمە: تەماحە کۆلۆنیالییەکا دەوڵەتو تورکیای.
پانێلی دووەمە: بێدەنگیی کۆمەڵگەی میاندەوڵەتیی ۋەراۋەر بە دەستدرێژییەکا تورکیای پەی سەرو پانیشت و وەنشین (ڕۆژئاوا)و کوردستانی بەتایبەتی عەفرین و پەیوەندییە دۋەقۆڵییەکێ یەکێتی ئەوروپا و تورکیای و جە وەرکەوتی دلین.
پانێڵی یرەمە: ژیۋگەی نۆو و  کێشە و گرفت و ئانگاریەکێ کە  ڕوو بەڕوو پرۆسەو بەدیموکراتیکەردەی بانەۋە.
پانێلی چوارەمە: کوردەکێ و چانسو فاڕیەری دیموکراسییانە جە وەرکەوتی دلین-ـەنە.

جە کۆنفرانسەکەنە، بابەتەکێ بە زۋانەکا: کوردیی. عەرەبیی، تورکیی، ئینگلیزیی و فەرەنسیی، پێشکەشێ کریانە و هۆرگێڵنایشا پەی مەکریۆنە.