پژاک: ئه‌مریكا دیماگۆژیانە خزمه‌ت بە داعشی و ئه‌ردۆغانی مەکەرۆنە
پژاک سەبارەت بە بڕیارو ئەمەریکای دژ بە ڕێبەران و پێشەنگانو جمیەری ئازادی ۋەڵاکریاش دان و ئاشکراش کەردەن: "بڕیارەکە دیماگۆژیانەن و خزمەتکەردەیەن بە داعشی و ئەردۆغانی".
ئەنجومەنو پارتو ژیۋاری ئازادو کوردستانی (پژاک) بە ۋەڵاکریا سەرکۆنەو بڕیارو ئەمەریکایش دژ بە ڕێبەران و پێشەنگانو جمیەری ئازادی کوردستانی کەردەن و ئاشکراش کەردەن:
جەنگ و ئاڵۆزیێ جە کوردستان و وەرهۆرزی میانی تا مشۆنە قۆڵتر مەبۆۋە و ڕوو بە قۆناخێ نۊ جە ململانە سیاسی و دبلۆماسیەکان منیۆنە. هێزە هەژەمونگەرا هەرێمیێ و جیهانیەکێ هەوڵ و تەقەلاشان پەی پارێزنای بەرژەوەندیەکانشان و پارێزنانی هامسەنگی و پارسەنگی جە ناوچەکەنە ۋستەن گەڕ. ئاشکران جە جەنگی جیهانی یەرەمەنە کە ئیسە جە وەرهۆرزی دلین ڕووە مڎۆنە، کورد و تەڤگەرە ئازادیەکەش جەشکستدای داعشی و تەرۆری ئاکتۆری سەرەکی بیێنێ و جە ۋەرانۋەر بە مۆدێڕنیته‌ی كاپیتالیستی ۋەرگریشان جە شناسنامەو گەلە ئازادیۋازەکان کەردەن. جمیەری ئازادی بە کۆشاییش و ڕێبازی دیموکراتی، سەرجەم پیلانێ و سیاسەتێ دیماگۆژیانێ هێزە هەژەمونگەرا هەرێمی و جیهانیەکانش مایەپووچێ کەردێنێۋە. پۆکەی هێزە دەمامکدار و قازانج پەرستەکێ کەوتێ نکۆڵیکەردەی جە شناسنامەو ئازادی کوردی و گەلانی و هێزە دیموکراتۋازە شۆڕگێڵەکانو ناوچەکەی.
بە تایبەتی کاتێ کە پەی ڕای گردیی جیهانی ئاشکرا بی، کە (پەکەکە) چوون هێزێ سەرەکی جە کوردستان و ناوچەکەنە دژ بە داعشی و تەرۆری جەنگان و جە شکستدایشانە ڕۆڵی سەرەکیش گێڵنان، ئیتر دمای ئی قەڵەمبازە مێژوویێ بە ئامانجگێرتەی ۳ شۆڕشگێڵێ کوردی و ئازادیۋازی و کۆشەیەرێ و پێشەنگێ پەکەکەی (ده‌وران كالكان، موراد كارایلان و جه‌میل بایك) جەلاو ئەمەریکایەۋە پەردەش سەرو حەقیقەتێۋی تەری هۆرماڵاۋە، کە ئاڎیچ ئانەن کە ئەمەریکا و هامپەیمانەکێش ئامانجشان دلێنەبەردەی تەرۆری و داعشی و بەرقەرارکەردەی ئاشتی و دیمۆکراسی نییەن، بەڵکو بەپێچەۋانەۋە ئینێ شۆنەو بێکاریگەرکەردەی و دلێنەبەردەی هێزە شۆڕشگێڵە دیموکرات و ئازادیۋازەکانو جیهانیەۋە. کە ئانێچە مایەو شەرمەزار ی و سەرشۆڕیەن پەی ئەمەریکای. هەر چنڎ ئەمەریکا بە ئەڕفانای و تەسلیمکەردەی ڕێبەر ئاپۆی بە تورکیای و تەسفیەکەردەی پەکەکەی دژایەتی کوردیش کەردەن، ئاڕۆچ پەی هێورکەردەی پەیوەندیەکانش چەنی تورکیای و گوڕدای بە جەنگی و تنڎوتیژی جە ناوچەکەنە، دیسان دژایەتی وێش پەی کوردی و گەلە ئازادیۋازەکانو ناوچەکەی ئاشکرا کەردەۋە.
ئەنجومەنو پارتو ژیۋاری ئازادو کوردستانی (پژاک) جە کۆتایی ۋەڵاکریاکەیشەنە بڕیارەکەو ئەمەریکای سەبارەت بە جمیەری ئازادی بە "هه‌ڵه، ناڕه‌وا، پراگماتیست، نایاسایی و دژ به سه‌رجه‌م پیمانەکانو مافو مرۆڤی" بە نامێ کەردەن و بە سەرەتاو قۆناخێۋی تەرسناکی دژ بە گەلە ئازادیۋازەکان و جمیەرە ئازادیۋاز و سۆسیالیستەکان جە قەڵەم دان. پژاک سەرەڕاو بە تنڎنی سەرکۆنە و شەرمەزارکەردەی بڕیارەکەو ئەمەریکای، هاموەخت بڕیارەکەی بە خزمەتکەردەی داعشی و تەرۆری و هێزە دکتاتۆرەکانو ناوچەکەی و جیهانیش مزانۆنە. پۆکەی داۋاش جە سه‌رجه‌م هێزه سۆسیالیستەکان، شۆڕشگێڵێ، ئازادیۋازێ، کەسایەتێ، ڕۆشنۋیرێ، سیاسەتمەدارێ، ژەنی و گەنجێ كوردستانی و جیهانی کەردەن، بە چالاکیێ دیموکراتیێ دژو بڕیارەکەی بمدراۋە و شەرمەزارش بکەرانە و مایەپووچش بکەراوە.
