پژاک جە ئاژێوە تایبەتەنە ششەمین کۆنگرەو وێش بە سەرکەوتەی بەست و جە میانشەنە سەرەراو نەقدو کارنامەی سیاسیی و چەکداریی و کۆمەڵایەتیی وێش بە کۆ دەنگی پلاننامەو دوێ ساڵێ ئایندەیش پەسەند کەرد.
پارتو ژیواو ئازادوو کوردستانی – پژاک کە جە ساڵەو ٢٠٠٤ مەرزیانەرە، جە ١٠ و ١١ مارچو٢٠٢٠ی وەرانوەر بە ٢٠ تا ٢١ ئسفەندو ١٣٩٨ وەرەتاوی بە دروشمەو ”بەفراوانکەردەی ڕۆحو نەتەوەو؟دیمۆکراتیکی، پەی یۆگێرتەی نەتەوەکانو ئێرانی جە چوارچێوەو سیستمی دیمۆکراتیکی هەنگامە مەنیێمێ“ جە کەشە سەربەرزەکا کوردستانی ٦مین کۆنگرەو وێش بەست.
جە کۆنگرەو پژاک-یەنە کە جە ئاژێوی تایبەتی ئەمنیەتی و دوور جە چەمو میدیاکا لواڕاوە، سەرەراو نەقدو کارنامەی سیاسیی و چەکداریی و کۆمەڵایەتیی پارتەکەی، بە کۆ دەنگی پلاننامەو دوە ساڵێ ئایەندەی دیاری و پەسەند کریا. جە دماو هۆرچنیەو دیوانی، کۆنگرە بە فەرمی جە لاو هام سەرۆکوو پژاکی سیامەند موعینی دەسش پەنە کەرد و هۆرسەنگنای و ئەوەوانای پەی بابەتگەلێ کریا کە گرنگتەرینشان ئینێ بێن:
شەیکەردەی ئاژەو سیاسیی، کۆمەڵایەتیی و چەکداریی ئێرانی و وەرکەوتوو کوردستانی.
سیاسەتو خەتەتی یەرەمێ و تەئکید کەردەی سەرش
.
چارەسەری گرفتەکانو کۆمەڵگای بە تایبەت ژەنا جە بەروو سیستموو دەوڵەتی.
باوریدای بە جوانا و ئەرکداریشا پەی دەستەبەرکەردەی ئایندەو وێشان.
جە درێژەو بابەتەکا کۆنگرەیەنە جە لاو ئەندامە بەشدار بییەکاوە سەرەڕاو هۆرچنیاو ئەندامانو مەجلسوو پژاکی کە ١٦ کەسێ بێنێ، هەر یۆ جە زیڵان ڤەژین و سیامەند موعینی جارێ تەر بە هامسەرۆکێ پژاکی هۆرچنیێوە. هەر پاسە کۆمسیۆنێ پەی رێکوستەی و پەرسایۆ جە پلاننامەی دوە ساڵی ئایندی جە لاو ئەنداماوە هۆرچنیا. پژاک جە راپۆرتوو کۆنگرەو وێشەنە ئەنجامنامێوی ١٠ ئەرێ کەرد گرنگتەرینشان بە ئی جۆرەنێ:
کۆشیای پەی ئازادی ڕابەر ئاپۆی
ئەرەمەرزنای کۆمەڵگایێوی ئازاد و دیموکراتیکی
مدرامان وەرانوەر بە زهنیەتو پیاساڵاری و ناوەندگەرایی
بایەخدای بە خەباتو ژەنا و جوانا
کارکەردەی پەی یۆگێرتەی لایانەکان چێرو چەترەو یەکیەتی نەتەوەیەنە
دما جار زیڵان ڤەژین هامسەرۆکەو پژاکی قسێش کەردێ دەسنیشانەش کەرد: "سەرکەوتەی هەر پەی ئێمەن و کۆشیای پەی ئازادی و یەکسانی بە باوەری بە دروشمەو بژی سەرۆک ئاپۆی، ژەنی ژیوای ئازادی، ئەنجامەکەش هەر سەرکەوتەیەن".
