ئارۆ جە باڵەخانەو هەدەپەی جە ئەستەنبوڵ، پەرۋین بۆڵدان، هامسه‌رۆكەو گردیی پارتو دیموكراتی گه‌لانی-(هه‌ده‌په‌) و ئه‌ندامە جە شاندو ئیمڕاڵی و دیرایەت دیلان تاشدەمیر، واچەرەو ئەنجومەنو ژەنان و پارلەمانتەرو هەدەپەی جە پارێزگەو ئاگری، سەبارەت بە «سزاو دیسپلینی» کە جەی دمایە پەی ڕێبه‌رو گه‌لو كوردی عه‌بدوڵا ئۆجالانی بڕیانەۋە و ئا گۆشه‌گیریە سەختە کە ۋزیان سەرش، کۆنفڕانسێ ڕۆچنامەۋانیشان ڕێکۋست.

جە کۆنفەرانسەکەنە په‌رۋین بووڵدانە جەی بارەۋە ئاشکراش کەردەن:"هەدەپە و کورد گەرەکشانە ڕاگردیی و کلێرگەو کوردستانی و تورکیای و جیهانی جە گۆشەگیری ئیمرالی و هێرشەکانو سەرو ئۆجالانی ئاگادارێ و ۋریێ بکەراۋە، کە ۲۰ ساڵێن درێژەشان هەن".

پەرۋینە واتەنش: "جە ٦و ئەیلولو ۲۰۱۸ی دۋاشان جە دەسەڵاتدارانو تورکیای کەردەن تا سەردای ئیمرالی بکەرانە، بەڵام داۋاکەردەکەی ڕەت کریانەۋە. بەهانەیچشان پەی ئانەیە گۋایا ٦ مانگێ سزاو دسپلینی پەی ئۆجالانی بڕیانەۋە. سزاکێ مەگێڵۆۋە پەی ساڵانو ۲۰۰٥-۲۰۰۹ی. هامکات هەمان سزا پەی بەندکریاکانو تەری جە ئیمرالی بڕیانەۋە و دیدارەکێشان قەدەغە کریێنێ".

په‌رۋینە ئاشکراش ماچۆنە: "بەڕێز ئۆجالان کەسێ ئاسایی نییەن تا پی جۆرە خراپە مامەڵەش چنی بکریۆنە، هامکات ئیمرالیچ بەندیخانێ ئاسایی نییەن، چاگە ئۆجالان دلێ گۆشەگیریەنە گۆشەگیرتەر کریان. ماۋێ درێژەن دیدارش چنی خانەۋادەکەیش و پارێزەکانش و شاندە سیاسیەکان ئەنجام نەڎان، ئانێچە کەردێۋە دژە یاسا و دەستورەن. پۆکەی ئێمە پەرسمێنە هۆکار چێشەن سزێۋە کە جە ۲۰۰٥-۲۰۰۹ بڕیارش دریان، چی ئیسە کەردەیش مەکەرانە؟ ئینە هەرگیز دادپەروەرانە نییا، سەمەرەن کە دمای ۱۳ ساڵان دیدارەکێ بەڕێزێ ئۆجالانی ئاستەنگێ کریانە!".

پەرۋین بۆڵدان، هامسه‌رۆكەو گردیی پارتو دیموكراتی گه‌لانی-(هه‌ده‌په‌) و ئه‌ندامە جە شاندو ئیمڕاڵی، بە تنڎی سەرکۆنەو سیاسەتو ڕژێمو تورکیاش کەرد و هاموەخت داۋاش جە کۆمیتەو دژەئەشکەنجەو ئەوروپای-(سی پی تی) کەرد تا سەردای ئیمرالی بکەۆنە و فشار بۋزۆنە سەرو تورکیای تا خانەۋادە و پارێزەرێش سەردای ئۆجالانی بکەرانە و کۆمیتەکە ڕۆڵگێڕی ئەرێنیش جە بارودۆخو ئۆجالان-یەن ببۆنە و واتش: "مڕۆڤێ کە نەتاۊنە خانەۋادە و پارێزەرەکانش بۋینۆنە و سزا دسپلینیش پەی بڕیۆۋە، ئانەیە نیشانە مڎۆنە کە یاسا و قانون جە تورکیانە چ کێشە و گیروگرفتی جدیش هەن و چەنی بەفراۋانی پاشێل مەکریۆنە! سەبارەت بە سزا دسپلینی ئێمە چەمەڕا وەڵام-یەنمێ. جەخت مەکرمێۋە کاتێ دیدار چنی بەڕێز ئۆجالانی ئەنجام بڎریۆنە، کاریگەریش سەرو چارەسەرکەردەی قەیران و گیروگرفتەکانو تورکیای مەبۆنە و تورکیا دەربازێشان مەکەرۆنە. ئێمە و گرد لایێ دیمان کە سەروەختێ دیدارێ جە ئیمرالی ئەنجام دریێنێ تورکیا بێ قەیران و کێشە بێ. دمای ئانەیە دەرۋازەکێ ئیمرالی ۋزیێرە ئیتر قەیرانەکێ سەرشان هۆردا و کودەتای سەربازی کریا، ۋەڵتەر بەڕێز ئۆجالان چا بارەۋە ۋریاییش دابێ". 

جە کۆتایی کۆنفڕانسە ڕۆچنامەۋانیەکەیەنە، پەرۋین بۆڵدان، هامسه‌رۆكەو گردیی پارتو دیموكراتی گه‌لانی-(هه‌ده‌په‌) و ئه‌ندامە جە شاندو ئیمڕاڵی، واتیچش: " گۆشەگیری دلێ گۆشەگیریەنە تاۋانی دژە مرۆڤایەتین و مایەو قبوڵی نییەن. پۆکەی جارێتەر بە نامێ هەدەپەی و شاندو ئیمرالی و گەلو کوردی داۋا مەکەرمێنە بەزوویی کۆتایی بە گۆشەگیریەکەی بێنە و سەردای بەڕێز ئۆجالانی بکریۆنە".