پارتو ژیۋای ئازادو کوردستانی (پەژاک)، پەی نیای هەنگامێ کرداریێ و هەماهەنگی پارت و لایەنە سیاسیەکا وەرکەوتو کوردستانی پڕۆژێۋی ۱۰ خاڵی-یش ۋەڵاکەردەۋە. جە پڕۆژەکەنە کە بە "هەنگامێ کرداریێ پەی هەماهەنگی پارت و لایەنە سیاسیەکا وەرکەوتو کوردستانی" نامێ بریان، باس جە دمایین ئاژەو کوردستانی و ناوچەکەی و ئەگەرەکا و فاڕیایەکا کریان و جە بوارە سیاسی و سەربازی و دبلۆماسیەکانە جەخت جە گرنگی هەماهەنگی پارت و لایەنە کوردستانیەکا وەرکەوت(ڕۆژهەڵات)ی کریانەۋە.

پەژاک جە پڕۆژەکەشەنە ئاماژەش دان پانەیە کە، کوردستان و کورد نزیک بە سەڎ ساڵێن پەی یاۋای بە ئازادی و دیموکراسی قوربانیشا دان و ئازیزتەرین ڕۆڵەکێ وێش بەخێشێنێ و ڕێبەرانێش  شەهیدیێ بیێنێ. جە قۆناغو ئارۆیەنە سەرەڕا ڕەخەنە و گلەیێ و لاۋازیەک جە بوارە سیاسی و سەربازی و ڕێکوستەیی و دبلۆماسیەکانە، بەڵام دیسان کورد و کوردستان و جمیەر (تەڤگەر)ەکەش، ڕێکۋرزیا-تەرین، دینامیک-تەرین و چالاک-تەرین-ـەنێ جە ئێران-ـەنە و مشیۆم لایەنە کوردیەکێ بانە دلێگە و ناوەند پەی کۆبیەی پارت و لایەنەکا ئێرانیەکا، چونکە جە قۆناغو ئایندەیە نە ئێران جە ناوچەکەنە دلێگە و ناوەندو فاڕیایەکان. ئانێچە بە بێ دروستکەردەی بەرەی نەتەوەی‌-دیموکراتی و یەکێتی گرد پارت و لایەنەکا و گەلی کوردی و هەماهەنگی چەنی پارت و لایەنە ئێرانیەکا بەدی نمەیۆنە. بەپێچەوانەۋە کورد و جمیەرەکەش بانە بە قوربانی بەرژەوەندی لایەنەکا و جە بەرژەوەندیە نەتەوەیەکاچ بێبەشێ مەبانە و بانە بە قوربانی بەرژەوەندی تاکڕەوی حزبی و تاکە کەسی، کە ئاشکران ئیسە گەلو کوری فرە چانەیە و جە جەنگی کورد بە کورد نیگەرانەن کە چەنی هەر فاڕیایێ جە ئێران-ـنە، ئایندەو کوردستانی ڕووبەڕوو مەتەرسی فرە جدی و نەبەخشیای مەکەرۆۋە.

پەژاک بە ڕەهایی ئاشکراش کەردەن، کرێڵ-و چارەسەری جە ئێران-ـنە کوردستان-ـەن، پۆکەی گەرەکەن بەرژەوەندی نەتەوەیی و نیشتمانی و گردی، زاڵ بکریۆنە سەرو بەرژەوەندی حزبی و کەسی-ـەرە. هەر پارت و لایەن و کەسێ کە پەی جورە نەجمۆۋە، دیارەن کە بەرژەوەندی و داۋاکاری گەلیش ۋەرچەم نەگێرتەن و دژش مدرانەۋە.

پەژاک ئاماژەش بە ئەزموون و ڕوودایەکا ۱۳٥۷ (۱۹۷۹)یش دان، کە کورد بە ئاکام نەیاۋان و پەی دووبارە نەبیەیش یەکێتی و یۆگێرتەی بە چارەسەر مزانۆنە، کە جە ئایندەنە سەیە و قورسایش باڵ مەکێشونە سەرو مێزو گفتوگۆی و دایوئەسای چەنی ئەمەریکای، فەڕەنسای و زلهێزەکا تەری و هێزە ئێرانیەکارە. هەر پۆکەی پەژاک بە باوەڕی و سیاسەتی ڕۆشن و دیار و نەشاریا و وەڵامدەر بە گەلی و نیشتمانی، بانگەۋزای جە هێزە کوردستانیەکا وەرکەوتی مەکەرۆنە، جەچوارچێۋەو پڕۆژەو "هەنگامێ کرداریێ پەی هەماهەنگی پارت و لایەنە سیاسیەکا وەرکەوتو کوردستانی" یۆبگێرانە. هەڵبەت وەڵتەر پەژاک و کۆدار پڕۆژە و نەخشە ڕای چارەسەریشان پەی ئێران-یچ ۋەڵاکەردەبێ کە دلێشنە جەخت کریابێ، کە دۆزو کوردی بە بێ چارەسەرکەردەی دۆزەکا، ئازەربایجان، بەلووچستان و ئەهواز و باوەڕی و مەزهەبە جیاۋازەکا و ژەنا و پرسپەکتیڤ و سیاسەتی دیموکراتیکی مەحاڵەن.

پۆکەی (پەژاک)ی جەی قۆناغە هەستیارەنە پەی هەماهەنگی پارت و لایەنە مەدەنی و سیاسیەکا، ڕۆشنۋیرا، شارەزایا وەرکەوتو کوردستانی، تا بەشێۋازی پلۆڕالیستی و هەرەوەزیانە و دەستەجەمی ئایندەو گلێرگەی بگێرانە دەست و پەی خۆڵقنای گلێرگەی دیموکرات و سکۆلار و مەدەنی و ئەرەمەرزنای کوردستانی ئازاد و دیموکراتی، هامکارێ و هەماهەنگێ بانە و ئەرکو مێژوویی وێشان بەگا باۋەرانە ئی ۱۰ خاڵەشە ۋستێنێ ڕووە:

١- دروستکەردەی "کۆمیسیۆنێۋی هامبەشی" بە بەشداری پارت و لایەن سیاسیەکا، ڕۆشنۋیرا و ئەکادیمیەکا، پەی ۋەلاۋە نیای ناکۆکیەکا.

٢- دروستکەردەی "ئەنجومەن (مەجلیس)ی نەتەوەیی و دموکراتی و فەرا حزبی" بە بەشداری حیزب و لایەنە سیاسی و مەدەنیەکا، کە چەمداری هەڵسوکەوت و ڕەفتارو حزبەکا بکەرۆنە.

٣- دروستکەردەی هێز و ئەرتەشی هامبەشی نەتەوەیی.

٤- دروستکەردەی ئەنجومەنی سەربازی هامبەشی، کە ۋاراۋە به مەجلیسی نەتەوەیی و دمۆکڕاتی و چەمداری وەڵامدەر بۆنە.

٥- دروستکەردەی ئەنجومەنیێۋی دیپلۆماتی هامبەشی، کە چێرو چەمداری مجلیسی نەتەوەیی ودیموکراتی-ـەنە بۆنە تا جە کۆڕ و کۆمەڵە هەرێمی و جیهانیەکانە نمایندەیی کوردی بکەرۆنە.
 
٦- دروستکەردەی میدیا و تەلەفزیۆنی هامبەشی، پەی ۋەڵاکەردەی و یاۋنای سیاسەتەکا ئەنجومەنی نەتەوەیی.
 
۷– دروستکەردەی ناوەندو پەیجۆری ستراتیژی کوردستانی جە ئەوروپا، بە بەشداری کوردا تاراوگەی، پەی ڕاۋێژکەردەی چەنی ئەنجومەنی نەتەوەیی و لایەنە سیاسیەکا.

۸– دروستکەردەی ناوەند و دلێگە پەی ئەنجامدای چالاکی هامبەشی.

۹-- دروستکەردەی ئەرەمەرزیێۋی (فەرا حزبی) تایبەت به ژنا، پەی چارەسەرکەردەی کێشە و قەیرانەکا ژەنا جە وەرکەوتو کوردستانی. 

۱۰– دروستکەردەی کۆمیتێۋی هامبەشی پەی ڕۆچانە چەمداریکەردەی زیندانیە سیاسیەکا جە زیدانەکاو کۆماری ئیسلامیەنە و چالاکانە کۆشای پەی ئازاد کەردەیشا.