ئارۆ کۆمیتەو ڕاۋەبەری پارتو کارکەرانو کوردستانی-پەکەکە، سەبارەت بە هێرشەکەو ۱٦و ئابی کە جە شەنگال شەهیدبیەی "ئیسمائیل ئۆزدەن ئەسناشیا بە مام زەکی شەنگالی"، ئەندام جە کۆردیناسۆنو جڤاکی ئێزیدیش ۋنە کەوتەۋە، ۋەڵاکریێۋێش دان و سەڕەڕا یادکەردەی مام زەکی و شەرمەزارکەدەی شەهیدبیەکەیش ئاشکراش کەردەن:

هێرشەکە کە جە دەرەنجامو ڕێککەوتەی و بازاری گەورەی بیەن کە دیدارەکانو بەغڎای، هەولێری، ئەنقەڕەی و واشنتۆنی بڕیارش سەر دریان. جە ڕاستیەنە هێرشەکە جە کەسایەتی مام زەکی شەنگالی کە ٤۰  ساڵێ جە تەمەنیش پەی جمیەری ئازادی نیارە، خەڵک و گلێرگەی ئێزیدیش کەرد ئامانج، کە مام زەکی پێشنگایەتیش مەکەرێنە. هاموەخت هێرشێ بێ دژ بە کوردی و یەکێتێ و ژیۋای واڵە و برایی و پێۋەرەی گەلان. بە هێرشەکەی هەوڵ مڎانە ڕاگیری جە دیموکراتی بیەی پانیشت "باشور"و کوردستانی بکەرانە و بەردەۋامی بە فەرمان و کۆمەڵکوشی ۳ ئابو ۲۰۱٤ی بڎانە. ئانە کە داعشی جە شەنگال پنەش نەکریا، ئارۆ ئاکەپە و مەهەپە گەرەکشانە ئەنجامش بڎانە.

دەوڵەتە فاشیزمەکەو ئاکەپەی بە کامە ماف بە تۆپێ، تانکێ و فڕۆکێ هێرش دژ بە شەنگالی و باشوری ئەنجام مڎۆنە؟ ئایا ئانە بە ئاگاداری و ڕەزامەندی حکومەتو ئێراق بیەن؟ ئایا ئێراق جە بەغڎا دەوڵەت و حکومەتش هەن؟ ئەی حکومەتو هەرێمی جە هۆلێر "هەولێر" هەڵۋێستش چێشەن؟ دەیان ساڵێن ئەمەریکا ئاسمانو ئێراقی مەپارێزنۆنە، ئایا پەی هێرشەکەو شەنگالی، تورکیا مۆڵەتش جە ئەمەریکای هۆرگێرتەن؟ ئاشکران هەفتێ وەڵێ هێرشەکەی، دیدارە هەۋاڵگریەکێ میت و یەکێتی و پارتی و سەردای ژەنەراڵێۋی ئەمەریکی پەی ئەنقەڕەی جە ئارانە بیێنێ و گرد پەی ئامادەکاری هێرشەکەی و شەهیدکەردەو مام زەکی شەنگالی بیێنێ و جەی بارەۋە ڕێکەوتەی، سەودا و مامەڵە و بازاری کریان.

پەکەکە جە دماییەنە جەختش کەردەنەۋە، کە بکوژێ زەکی شەنگالی چنڎە بە کوشتەیش شادمانێ بانە، بەڵام فرە بەزوویی باجەکێش بڎانە و شادمانەیەکەشان بگێریۆنە بینی-شان. هەر چەنی گەنجێ ئێزیدیێ و گەلو کوردی داعش-شان دلێنەبەرد، پاسەیچ ئاکەپە و مەهەپەی دلێنەبەرانە. بێگومان شاگردەکێ زەکی شەنگالی و میلیتانەکێ ڕێبەر ئاپۆی هەنگام بە هەنگامە تۆڵەو هێرشەکەی و شەهیدبیەی زەکی شەنگالی مەکەرانەۋە.