جە ۋەردەمو باڵەخانەو کۆنسەو ئەوروپای جە شارو ستراسبۆگ-و فەڕەنسای، ٤ وڵاتپارێزێ کوردێ ئەرەنیشتێ شارو مۆنتپۆلیەو هەمان وڵاتی، ۳۳۲ مین هەفتەو چالاکی ئێشکگری پەی ئازادی ئۆجالانی جە ئەستۆ مەگێرانە کە بریتیێنێ جە سەعید ئاکگوون، گول دوغان، نەسێمە گەڤەر و سارا گەڤەر.

ئێشکگێرەکێ جە بەیاننامێۋەنە داۋاو ئازادی ڕێبەرو گەلو کوردی عەبدوڵا ئۆجالان-یشان کەرد و بانگەۋازیشان ئاڕاستەو دادگاو مافو مرۆڤی و کۆمیتەو دژە ئەشکەنجەی سی پی تی جە ئەوروپا کەرد، تا سەبارەت بە چارەنۋیس نادیاری ڕێبەر ئاپۆی هەڵۋێست نیشانە بڎانە و بێدەنگی بماڕانە. هەرپاسە جەختشان کەردەۋە، تاکانە ڕا پەی دەربازبییەی جە قەیران و کێشەکان جە تورکیا ئازادکەدەی ئۆجالان نییەن. جە کۆتایی بەیاننامەکەیەنە داۋا جە گەلو کوردی و ئازادیۋازانو جیهانی کریا، تا خاوەنداری جە ڕێبەر ئاپۆی بکەرانە.

چالاکی ئێشکگێری پەی ئازادی ڕێبەر ئۆجالانی، جە ساڵو  ۲۰۱۲ی دەستش پنە کریان و تا ئارۆ بەردەۋامەن و هەر هەفتە دەستێ جە چینە جیا جیاکانو کوردی و دۆستەکانش بە شێۋازی نۆبەتی بەشدارێش بانە و ئەی هەفتێچە ۳۳۲ مین چالاکیش ئەنجام مڎریۆنە.

یاگێ بەیادئاۋردەیەن، کە نزیک بە ۳ساڵێن چارەنۋیسو ڕێبەر ئۆجالانی نادیارەن و کەس هۋاڵش نمزانۆنە و پارێزەرەکێش جە  ٢٠١١ەۋە بە بەهانێ بێ بنەمێ ڕاشان پنە نەڎریێنە سەردای ئیمرالی بکەرانە و نزیک بە ٦۰۰ جارێ داۋاکاریشان پەی سەردای کەردەی ئیمرالی ڕەت کریانەۋە، بەڵام دیسان هەفتانە ۲ جارێ سەردای دۆزگەری گردتی تورکیای جە شارو بۆرسای مەکەرانە.