هامسەرۆکایەتی کۆنسەو ڕاۋەبەری کۆما جڤاکێن کوردستانی-کەجەکە، جە ساڵیادو کودەتا فاشیزمانەکەو ۱۲و ئەیلول-و ۱۹۸۰ی جە تورکیا، ۋەڵاکریاش دان و دلێشەنە ئامان:

٣٨ ساڵێ سەرو کودەتا فاشیستییەکەو ١٢ ئەیلول-یەرە دەرباز بی، ئێمە عەقڵیەت و هۆشمەندیێ کە هۆکار بێ پەی ڕوودای کودەتاکەی شەرمەزار مەکەرمێنە. هاموەخت ئا کەسانە کە جە مدرامان و ڕووبەڕووبیەی کودەتاکارانی شەهیدێ و بریندارێ و کەمئەندامێ بیێ و ئا دەیان هەزار کەسانە کە زیندانیێ کریێ و ئەشکەنجە دریێ بە ڕێزە یادشان مەکەرمێۊە. بەدڵنیایی جەخت مەکەرمێۋە کە ڕەنجێ جە سەروەختو کوەدتاکەیەنە کێشانشان و ئەشکەنجێ کە دریێنێ، دەرەنجام بەرهەم بڎۆنە و بە بەدی ئاردەی تورکیای دیموکراتیک، کوردستانی ئازاد و وەرهۆرزی میانی دیموکراتیک تاجدار بکەرمێنە.

کەجەکە باسش جە لایەنە بەشدارەکانو کودەتا سەربازیەکەو ۱۲و ئەیلولی کەردەن و دەستنیشانش کەردەن: کودەتا سەربازیەکە بە هامکاری جەنەراڵە فاشیستەکان و بە پەشتیۋانی ناتۆی و ئا هێز و لایەنانەی ئەنجام دریا کە ئامانجشان دلێنەبەردەی و ئەۋەسڕیەی کوردی بێ. هاموەخت ئامانجێ تەرشان سەرکوت-کەردەی خەباتی ئازادیۋازانە و دیموکراسیانە گەلان و ڕەنجدەرانو تورکیای بێ تا بە تەمامی چێردەستێشان بکەرانە. کودەتاکارەکێ و پەشتیۋانەکێشان پەی یاۋای بە ئامانجەکێشان کوردستانی داگیرکریا و تورکیاشان کەرد بە زیندانێ گەورە و ستەم و زۆرداریشان سنورش بەزنا و یاۋا قولە و سیستەمەکەشان پەی جۆرە مەرزنارە و یاگەگیرکەرد. پلانشان ئانە بێ تا ٥۰ ساڵێ تەرێ کورد و جمیەرە ئازادیەکەش، سۆسیالیست و شۆڕشگێڵێ تورکیا نەتاوانە سەرە بەرز بکەرانێۋە.

کەجەکە جە بەردەۋامیەنە ئاماژەش بە شکەست پنەدای کودەتاکەی کەردەن و ئاشکراش کەردە: کودەتاکەو ۱۲و ئەیلولی بە مدرامان و مانگێرتەکەو ۱٤ تەموزی جە ڕووە ئایدۆلۆژیەکەیشەۋە شکست دریا. مدرامان بە پێشەنگی کەمال پیر و محەمەد خەیرى دورموش، کە جە ٧ و ١٢ ئەیلول-و ١٩٨٢ شەهیدێ بیێ، شکستش بە  کودەتاکەی و ئەنجامدەرەکانش دا و ئامانجەکێش مایە پوچێ کەردێۋە و حساباتەکێشان پەی دلێنەبەردەی کوردی بەتاڵێ کەردێ. ئانێچە فەزڵەکەش پەی مدرامانێۋی گڵێۋە کە جە زیندانو ژمارە ٥ی جە ئامەد و شۆڕشگێڵەکانو دلێ زیندانەکان تورکیای ئەنجام دریا. مدرامانەکە دمای ۲ ساڵان بە قەڵەمبازو ۱٥ ئاب-و ۱۹۸٤ی درێژەش پنە دریا و پتەو تەر کریا. ئیتر دمای ئانەیە مدرامانەکە ۳٥ ساڵێن بە بەردەۋامی دژ بە سیستمی فاشیزمی ئەرەمەرزیاکریای داگیرکەر و ستەمکەر ڕاۋەبریۆنە.

هامسەرۆکایەتی کۆنسەو ڕاۋەبەری کەجەکەی، دەستنیشانش کەردەن: وەر جە ۱۹۸۰ی جە تورکیا کۆشای دژ بە دەوڵەت و دەسەڵاتداری فرە بەهێز بێ. چانێچەنە نمەبۆ ڕۆڵ و هەڵوێستو  شۆڕشگێڵانەو ماهیر چایان، دەنیز گەزمیش و ئیبراهیم کایپاک کایای فەرامۆش بکریۆنە و هەر ئانێچە بێ جمیەری کۆمەڵایەتی بەهێز و کاریگەرش دلێ گەلی و گەنجانە خۆڵقنا. بەڵام کودەتاکە دەرەنجام گاریگەری نەرێنیش سەرو جمیەری شۆڕشگێڵی و کۆمەڵایەتی جە تورکیا نیارە، ئانێچە کارێش کەرد تا جمیەرو گەلی و گەنجانی جە خەبات و کۆشای لاۋازێ بانە و دەرنجام نەبانە بە خاوەن هەڵۋێشتێ ئەنەیاۋایانە و هامبەش. پۆکەی مشیۆم جە ساڵیادو کودەتاکەو ۱۲و ئەیلولیەنە پەیجۆر و ۋنەکۆڵیای چا بارودۆخەیە و هۆکارەکانیش بکریۆنە و ۋزیۆنە ڕووە کە کودەتاکە چ گاریگەریێۋی خرابش کەردەن سەرو جمیەری شۆڕشگێڵی و کۆمەڵایەتی جە تورکیا و تەنها باسکەردەی و ئەۋەگێڵنای ڕوودای و ڤیەرەکانو کودەتاکەی ۋەسێ نییەن.

بە پەیلۋای کەجەکەی، ئارۆ تورکیا ئاتاجش بە خەتو خەبات و کۆشای، ماهیر چایان، ئیبراهیم کایپاک کایا و دەنیز گەزمیشی و ڕێبازەکێشان هەن و بە تایبەتی مشیۆم سود جە شێۋازو هەڵۋێستێشان دژ بە فاشیزمی داگیرکەر و دلێنەبەری هۆرگێریۆنە. جە ئارۆنە فرە گرنگەن کۆشای ئازادی کوردی و کۆشای ئازادی و دیموکراسی گەلان و ڕەنجدەرانو تورکیای هامکارێ هەنتری بانە و کۆشای هامبەش ڕاۋەبەرانە و ئانێچە پەی ڕووبەرووبیەی ئایدۆلۆژی فاشیزیم-و  ۱۲ ئەیلولی و دەسەڵاتداری ئاکەپە-مەهەپە و ئەردۆغانی کە میراتگرێ کودەتاکەیەنێ تاکە چارەسەرەن. چونکە ئەگەر جە مەغزا کۆشای و هۆشمەندی هامبەشی نەیاومێنە، ئاۋەختە خەبات و کۆشای دژ بە ئاکەپە-مەهەپەی گاریگەریش نمەبۆنە. ئەگەر کۆشایەکە ئەنجام نەڎریۆنە ئاۋەختە فاشیزم باڵادەستی ئایدۆلۆژی وێش زیاتەر سەپنۆنە و دکتاتۆری و داگیرکەری قڕکەر هیچ لەمپەڕێ ۋەردەمشەنە نمەمەنۆۋە و چەسپیۆنە.

کەجەکە جە دمیایی ۋەڵاکریاکەیشەنە، سەرجەم ئا شۆڕشگێڵێ کە دژ بە ستەم و زۆرداری کودەتا فاشیستیەکەو ۱۲ ئەیلولی خەباتشان کەردەن و شەهیدێ بیێنێ بە ڕێزداری یادشان مەکەرۆۋە و بەڵێن مڎۆنە درێژە بە ڕێبازەکێشان و ئازادی و دیموکراسی و سۆسیالیزمی بڎۆنە و ئامانجەکەێشان جە کوردستان، تورکیا و وەرهۆرزی دلین باۋەرۆنە دی.