ڕێبەرو گەلو کوردی، عەبدوڵا ئۆجالان، نزیک بە ۲۰ ساڵێن جە ئیمرالی گۆشەگیر کریان و پەراۋێز ۋزیان، گۆشەگیری و پەراۋێزۋستەکە زیاتەر جە ۳ ساڵێن قورستەر کریان و هیچ هەۋاڵ و زانیاریێ دروس جەبارەشەۋە نییەن و چارنویسش نادیارەن. ئانێچە کورد و جمیەرە ئازادیەکەش و ئازادیۋازێ جیهانیش نیگەرانێ کەردێنێ. 

جەی بارەۋە، هامسەرۆکایەتی کۆنسەو ڕاۋەبەری کۆماجڤاکێن کوردستانی-کەجەکە، بە ۋەڵاکریێۋ نیگەرانی جە بارودۆخ و گۆشەگیرکەردەی ئۆجالانی بەرۋزۆنە و ئاشکراش کەردەن: جە ٥و نیسان-و ٢٠١٥ی تا ئارۆ ڕێبەر ئۆجالان جە گۆشەگیری قورسەنە بەسەر بەرۆنە. جە ٢٧و تەمووزو ٢٠١١ی شۆنیەرە ڕا بە پارێزەراش نەڎریان سەردایش بکەرانە. جە ٢٠١٦نە، دمای فشار و ناڕەزایەتی فرەی ڕا بە مەمەد ئۆجالانی دریا تا سەردای ئیمرالی بکەرۆنە و کوڵە دیدارێ چەنی ئۆجالانی برایش ئەنجام بڎۆنە. دمای ئانەیە ئیتر ڕا بە خانەۋادەکێچ نەدریا چەمشا پنەش بگنۆنە. نەک تەنها رێبەر ئاپۆ، بەڵکو ٣ زیندانىێ شۆڕشگێڵێ تەرێ جە ئیمرالی دیدارەکێشا قەدەغە کریێنێ. 

کەجەکە، گۆشەگیری قورس جە ئیمرالی بە نایاسایی و نادەستوری و پاشێلکەردەی یاسا میاندەوڵەتیەکا و تەنانەت دەستورو تورکیاچ مزانۆنە و دەسنیشانش کەردەن: ڕەفتار ۋەراۋەر بە ڕێبەرو گلێرگە(کۆمەڵگە)یێۋی، ڕەفتارەن ۋەراۋە بە سەرجەم گلێرگەکەی. هەڵۋێست ۋەراۋەر بە ڕێبەرایەتی، هەڵۋێستەن ۋەراۋەر بە گەلی. گۆشەگیری قورس دژ بە ڕێبەرایەتی، فشارەن دژو گەلی و جمیەر(تەڤگەر)ە ئازادیۋازەکەیش. 

هامسەرۆکایەتی کۆنسەو ڕاۋەبەری کۆماجڤاکێن کوردستانی-کەجەکە، جەختش کەردەنەۋە: جە ۲۰۱٥ۋە بە گۆشەگیری ئیمرالی، جەنگی قورس و فاشیزمانە دژ بە کوردی دەسش پنە کەردەن. پۆکەی جە ئارۆنە کۆشای دژ بە گۆشەگیری ئیمرالی، کۆشایەن دژ بە فاشیزمی و جەنگی.

کەجەکە جە کۆتایینە داۋاش جە هێزە دیموکراسیۋازەکا کەردێنە، تا دژ بەفشار و گۆشەگیری سەرو ڕێبەرو گەلو کوردی، عەبدوڵا ئۆجالانی و ئیمرالی بە هەڵۋسێتێ بانە و بە ئەرک و ۋەرپرسیاری وێشان هۆربێزانە.