کەمپینی میانەتەوەیی: ۱۰ ملیۆنێ ئیمزێ پەی ئازادی ئۆجالانی کۆکریێنێ

جە بڕۆکسل کەمپینی میانتەوەیی پەی ئازادی ئۆجالانی کۆنفڕانسی ڕۆچنامەۋانیش بەست و ئاشکراش کەرد: تا ئیسە ۱۰ ملیۆنێ ئیمزێشان پەی ئازادی ئۆجالانی کۆکەردێنێ.

ئارۆ جە بارەگاو یاۋنەری و چاپەمەنی ئەوروپای کە سەر پارلەمانو ئەوروپایەن و ئینا جە بڕۆکسل-و پایتەختو بەلجیکای، کەمپینی میانەتەوەیی «ئازادی پەی ئۆجالانی» سەرو کار و چالاکی کەمیپینەکەی کۆنفرانسێۋی ڕۆچنامەۋانیش بەست و مێمانێ بەریتانیێ، ئیتالیێ و باسکێ و چنڎین دەزگێ یاۋنەری(میدیا) ئامادێش بیێ.

جە پەراۋێزو کۆنفەڕانسەکەیەنە، هاڤین گونئه‌‌شه‌ر، نمایندێ جە "ئنسیاتیڤو ئازادی پەی ئۆجالانی و ئاشتی پەی کوردستانی" بە ئاژانسەکەیمان فوڕات نیوزیش ۋات: کە مینەکەشان کە پەی ئازادی   بەڕێز ئۆجالانی کە ۲ ساڵێن دەستش پنە کەردەن، دەربازو قۆناغێۋی نۋینیش مەکەرانە و جە ۲ ساڵێ ئایندەنە ئازادی ئۆجالانی ببۆنە ئاژەی سەرەکی. 

هاڤینە ۋاتیچش: ئیتر ئازادکەردەی ئۆجالانی وەختش ئامان و ئانێچە پەی بەدی-ئاۋردەی ئاشتی جە تورکیا و وەرهۆرزی میانی زەرورەتەن. جە ڕاستیەنە خاسکەردەی بارودۆخو ئۆجالانی جە زیندانەنە، خاسکەردەی بارودۆخو کوردیەن جە تورکیانە و ڕا پەی گەشەکەردەی ئاشتی و چارەسەری مەکەرۆۋە. جە سەروەختێۋەنە کە دەوڵەتو تورکیای جەنگش دژو کوردی جاڕدان، تەنیا ڕاچارە دیموکراتی و ئاشتی-یەن، کە کرێڵو ئانێچە ئۆجالانەن.

"هاڤین گونئه‌شه‌ر"ە ئاشکراش کەرد، جە ۲ دۋە ساڵێ ۋیەردێنە کەمپینەکەشان جە سەرتاسەرو جیهانی ۱۰ ملیۆنێ ئیمزێشان پەی ئازادی ئۆجالانی کۆکەردێنێۋە.

جە کۆنفەڕانسەکەنە، ئارنالدۆ ئۆته‌گی، ڕێکۋزو گردی هامپەیمانی باسکی (Euskal Herria Bildu)، کە ۱٤ ساڵێ تەمەنیش زیندانە بەسەربەردەن ۋاتش: ئامانج جە ئامادەبییەم جە کۆنفەڕانسەکەنەئانەن تا پەشتیۋانی ژەن و پیاکانو جمیەری سەربەوێۋازی باسکی پەی ئۆجالانی نیشانە بڎێمێ. نامبریا بەڵێنشدا، چوون ۋیەردە درێژە بە کار و چالاکی پەی ئازادی ئۆجالانی بڎۆنە.

ئارنالدۆ ئۆته‌گی ئاشکراش کەرد : «ئێمه‌ مزانمێنە كه‌ گۆشه‌گیرکەردەی عه‌بدوڵا ئۆجالانی تەنیا سزادای ئاڎی نییەن، بەڵکو ڕێبازێۋەن پەی سزادای کوردی. ئێمە سەرەڕا داۋاکەردەی پەی دمایی-ئاۋردەی بە گۆشەگیریەکەی، داۋاچ مەکەرمێنە جارێ تەر گفتوگۆ و سەردای پەی ئیمرالی دەست پنە بکەرۋە و ڕێککەوتەی بکریۆۋە. داۋاچ جە گلێرگەی میاندەوڵەتی مەرکەرمێنە بەشدارێ گفتوگۆکانی بکەرۆنە و هانو چارەسەری بڎۆنە.

نامبریا ئاماژەش دانە بە ڕۆڵ و جایگا و گرنگی کەسایەتی ئۆجالانی و دەستنیشان کەردەن: عەبدوڵا ئۆجالان نەک تەنیا پەی کوردی، بەڵکو پەی گردو ئا کەس و لایەنانە کە گەرەکشانە جیهانێ باشتەر و دادپەروەرتەر بەدی بەیۆنە هاۋەڵ و دۆستەن و یاگێ بایەخیەن.

دماتەر دێ ماژۆ، ئه‌ندام جە ئه‌نجومه‌نو شاره‌ۋانیی ناپۆلی/ئیتالیا، قسێش کەردێ و ۋاتش: ئێمە جە ناپۆلییەۋە پەشتگیری جە کۆشای ئازادی کوردی و ئازادکەردەی بەڕێز ئۆجالانی مەکەرمێنە، کە نزیکە بە ۲۰ ساڵێن بە ناهەق و جە دۆخێ نامرۆڤانەنە جە ئیمرالی زیندانی کریان.
 
ماژۆ ئاماژەش بە بەخشای مافو هاموڵاتی جەلاو شارەۋانی ناپۆلی بە ئۆجالانی و جە ۲۰۱۸  نە دەستەواڵەیی شارەکەیشان چەنی کۆبانێ دا و هۆکارو ئانێشە پەی مۆدێلو ئۆجالانی پەی پێۋەرە ژیۋای کلتور و نەتەوە و ئایینە جیاۋاکان گێڵناۋە و دڵنیاییشدا کە پێسەو ئیتالییەکان نزیکێنێ جە کوردی و ۋاتش: گومانمان جە گۆشەگیرکەردەی سەرۆک ئۆجالانی هەن و دژش مدرمێۋە و باۋەڕمان هەن کە مشیۆم خێرا ئۆجالان ئازاد بکریۆنە، ئانێچە کاریگەری منیۆرەسەرو پەی ئاشتی و چارەسەریێۋی مایندە و هەمیشەیی جە تورکیا و وەرهۆرزی میانی.

دێ ماژۆ، ئه‌ندام جە ئه‌نجومه‌نو شاره‌ۋانیی ناپۆلی/ئیتالیا، ئازادی ئۆجالانیش پەی هامسەنگی جیۆپۆله‌تیك و ئارامیی ئه‌ورووپای بە گرنگ مزانۆنە و داۋاش جە گلێرگەی میاندەوڵەتی و میانەتەوەیی کەرد، تا هەوڵ بڎانە خانەۋادە و پارێزەرێ ئۆجالانی بشانە ئیمرالی و کۆتایی بە گۆشەگیری بێنە. هاموەخت مشیۆم ئەوروپا فشار بۋزۆنە سەرو تورکیای تا مافەکانو کوردی قبوڵ بکەرۆنە. بشیۆم دژ بە ئەۋەگێڵای فاشیزمی و دکتاتۆری کە ئامانجو ئەردۆغانیەن بمدراۋە.

دێ ماژۆ ۋاتەنیچش: کورد جەی ساڵانەو دماییەنە پەی دەستەبەرکەردەی ئۆتۆنۆمی دیموکراتی و جەنگ چەنی چەتەکانو داعشی قوربانی گەورەش دان و دنیاچ ۋەراۋەرو کوردیەنە بێدەنگ بییەن، ئیتر کاتش ئامان ئا بێدەنگیە ماڕیۆنە.

یاگێ ئاماژەدایەن، کەمپینی میانتەوەیی پەی ئازادی ئۆجالانی، کە ۲ ساڵێن جە ئاستی میانەتەوەییەنە بەردەۋامەن، جەلاو ژمارێۋی فرێ جە کەسایەتیێ و سەندیکێ و ڕێکۋزیێ جیهانیێ پەشتیۋانی مەکریۆنە کە ملیۆنان ئەندامێشان هەنێ و چانیشاچە: مایرید ماگواره‌ كه‌ خاوه‌ن خه‌ڵاتو نۆبڵی ئاشتییه‌ن، فه‌یله‌سوف نوام چۆمسكی، جۆسێ رامن هۆرتا سه‌رۆك كۆمارو وەڵێنو ته‌یمووری كه‌ هامكات خاوه‌ن خه‌ڵاتو نۆبڵی ئاشتییه‌ن، پڕۆفیسۆر ئه‌نگێلا ده‌یڤس، ده‌سمۆند توتو خاوەن خه‌ڵاتو نۆبڵی ئاشتی، جێری ئادامس ڕێبه‌رو شین فینی جە ئێرله‌ندا، ئارنالدۆ ئۆته‌گی ڕێبه‌رو هه‌رێمو باسك، سه‌ندیكاو Unite teh Union، سه‌ندیكاو GMB و سه‌ندیكاو دورهام مینه‌رس-ی به‌ریتانی.