کەنەکە: شه‌نگال و جینۆسایده‌كه‌یش کە دنیاش هەژنا جە ۋیر نمەکریانە
کەنەکە، جە ساڵیادو فەرمان و کۆمەڵکوشکەردەی خەڵکو شەنگالی ۋەڵاکریاش دان و دەسنیشانش کەردەن: "جینۆسایدو شەنگالی دنیاش هەژنا و گەریلا و شەڕڤانێ بە قەرەمانی مەزن فریا ئێزیدیەکا کەوتێ.
کۆنگرەو نەتەوەیی کوردستانی-کەنەکە، جە ٤ مین ساڵیادو مەرگەسات و فەرمان و جینۆسایدو شەنگالی و ئێزیدخان-یەنە ۋەڵاکریێۋش دان و دلێشنە ئامان:
جە هێرشەکەشەنە دژ بە شەنگالی و ئێزیدیەکا، سەرجەم داگیرکەرەکێ کوردستانی سوپاسگوزارێ داعشی بێنێ. ئێران و تورکیا، تەنانەت ئێراق و سوریا بە زیاڎەۋە ڕازی بە هێرشەکەی بێنێ. چونکە داعش بیەبێ بە پێشەنگو ۋیرو دژە کوردی و کوردستانی و جە شەنگالەنە تراژیدیا و مەرگەساتی غەمناکش خوڵقنا و تراژیدیاکەیچ دنیاش هەژنا.
دما بەدمای مەرگەسات و تراژدیاکەی کورد جە گرد لاۋە بە هانا و فریاو خەڵکە ۋنەقۆمیا و مەرگەساتبارەکەو شەنگالی لۋا و هامکاریشا کەردێ. بەتایبەتی گەریلاکێ هەپەگەی و یەژەئاستاری، یەپەگە و یەپەژەی بە قارەمانی و فیدارکاری مەزن فریا ئێزیدیەکا کەوتێ و ڕاش نەڎا مەرگەساتەکە زیاتەر گەورەتەر بۆۋ و ئێزیدیەکێشا پارێزنێ و هێرشەکەو داعشیشا مدرنا. بەڵام مەخابن هەزاران کەسێ کۆمەڵکوشێ کریێ و هەزارنی تەریچ بە تایبەتی ژەنی و زارۆڵێ بەدیلی بریێ کە تا ئارۆچ فرێۋشا سوراخشا نییەن و چارەنویسشا نادیارەن.
مەخابن ئا هێزێ کە ئەشیەی جە ناوچەکەنە ئێزیدیەکێ و شەنگالشا پارێزنێ، کەیچی بە بێ ئاگارادکەردیشا شەنگال و خەڵکەکەشا ئاست جیا، ئانێچە هۆکار بێ پەی خوڵقنای ئا مەرگەساتە گەورە و غەمناکەیە کە سەرو ئێزیدخانی و ئێزییەکارە ئاما. ئانێچە سەلەمناش کە مشۆم شەنگالیەکێ هێزو پارێزانی و ستاتۆ وێسەرو وێشا بۆنە.
پۆکەی ڕۆو ٣ ئابو ٢٠١٤ی ڕوێۋی تاریک و غەمناکەن، کە جارێ تەر فەرمان و قڕڕکەدی دژ بە ئێزییەکا بە کەردەیی(پڕاتیک) بریاڕاۋە و جە شەنگالەنە شۆفینیزمی عه‌ره‌بی، فاناتیزم و كۆنه‌په‌رسی ئیسلامی و سەرجەم دژە کوردەکێ، چێرو عەباو داعش-یەنە یەگانگیرێ بیێ. ئیتر داعش بی بە نموونەو سیستمە كۆلۆنیسته سەردەستەکا كوردستانی کە بە هێرش پەی سەرو شەنگالی گەرەکشا بێ دەسکەوتەکێ کوردی جە پانیشت و وەرنیشتو کوردستانی جەباربەرانە و جارێتەر کۆلۆنیالیزم سەرو کوردیەرە سەپناۋە. هەر پاسە ئامانجشا بێ کە جە ڕووەو دەمارگیری ئیسلامییەۋە، ئایین و باوەڕی ئێزیدی بنەبڕ بکەرانە. چونکە هەر بە ئەرەگێرتەی شەنگالی، چەتەکێ داعشی دەسشا کەرد بە کوشت و بڕ و تاڵانکەردەی و وێرانکەردەی گەل و ناوچەکەی.
ئارۆ سەرەڕا ئانەیە کە شەنگال و ناوچەکێ ئێزیدخانی جە داعشی پاکێ کریێنێ، بەڵام بەشێ فرێ جە خەڵکەکەیش هێشتا ئاۉارێنێ و هەزاران کەسێچ کە فرەتەر ژەنیەنێ دیلێنێ و بە کەسوکاری و وارو وێشا شاڎێ نەبیێنێ. ئێزیدیەکێ هەم ئانێشا کە کۆچبەرێنێ و هەم ئانیچشا کە گێڵێنێ شەنگال جە بارودۆخی سەخت و دژوارەنە مژیۋانە. ئانێچە سەروگردیمارە فەرز کەرۆنە تا جە ئاستی دلین و بەرینو وڵاتیۋە، خەبات و کۆشش پەرە پنە بڎێمێ و هامکاری ئێزیدیەکا بکەرمێنە.
ساڕێژبیەی زام و ئازارەکا شەنگالی تەنها بە یەکیەتی و یۆگرتەی نەتەوەیی مومکنەن، هیۋادارێنمێ کە مەرگەسات و جینۆسایدو ئێزیدیەکا گردیما چڵاکنۆمارە و دەس دلێ دەسو هەنتری بنیێمێ و کوردستانی چێرۆ کۆلۆنیالیزم-یەنە ڕزگار بکەرمێ و ئازدایێۋی ڕەها بە دیاری بە گەلەکەمیا بەخشمێنە.
