هەینی ۲٦/۱۰/۲۰۱۸ی جە شارو بارلۆ-ی سەر بە شانشین-و هۆڵه‌ندای، کۆنگرەو نەتەوەیی کوردستانی-(کەنەکە)، بەبەشداری هامسەرۆک و سەدان جە ئەندامەکانش و دەیان مێمانێ و نمایندێ پارت و لایەنێ هەر چوار بەشو کوردستانی ۱۸ مین جڤاتی گردییش دەست پنەکەرد.

جە سەرەتا جڤاتەکەیەنە گیان بەخشێ ئازادی کوردستانی ڕێزشان ونە گیریا. دماتەر زوبه‌یر ئایدار ئه‌ندام جە کۆنسەو ڕاۋەبەری كۆما جڤاكێن كوردستانی-(كه‌جه‌كه‌)، قسێش کەردێ و ۋاتش: «كه‌نه‌كه‌ ٢٠ ساڵێن پەی یه‌كێتیی نەتەوەیی كوردی و پێۋەرە ژیۋای ئتنیک و باۋەریە جیاۋازەکانو کوردستانی و ناوچەکەی مەکۆشۆنە و ئارۆ هەمان ئامانجش هەن و سەرش بەردەۋام مەبۆنە».

شۆنیەرە نیلۆفه‌ر كۆچ و ڕێبوار ڕه‌شید هامسەرۆکێ کەنەکەی ۋاچێ و قسێ وێشان پێشکەشێ کەردێ و سەرنجشان ۋست سەرو هێرشە داگیرکاریەکان دژ بە کورد و کوردستانی و جە ۋەراۋەرەنە مدرامان و خەبات و کۆشاییشی ئازادی کوردی. هەر دۋێ هامسەرۆکێ پەی ڕووبەڕووبییەی هێرشەکان و دەربازکەردەی کێشە و قەیرانەکان جە کوردستانەنە، یەکێتی نەتەوەییشان بە چارەسەر زانان، کە چنڎین ساڵێن ڕێکۋستەکەشان کەنەکە هەوڵ و تەقەلاش پەی مڎۆنە.

 دماتەر  زیلان سه‌رحه‌د بە نامێ جمیەرو ژەنانو کوردی جە ئەوروپا- (TJK-E)، ئارێز عه‌بدوڵا به‌ نمایندەیی یه‌كێتیی نیشتیمانی كوردستانی-(یه‌نه‌كه‌)، سیامه‌ند موعینی هامسه‌رۆكو (په‌ژاك)ی، ڕه‌مزی كارتاڵ هاوسه‌رۆكو كۆنگره‌و گه‌لی بە پەیامێ جه‌میل بایك هاوسه‌رۆكی كۆما جڤاكێن كوردستانی (كه‌جه‌كه‌)، عەبدوستار مەجید، بە نمایندەیی کۆمەڵی ئیسلامی کوردستانی و چنڎین کەسێ تەرێ شۆن بە شۆن سەرو ئاژەو ئارۆ کوردستانی و گرنگی یەکڕیزی و یەکێتی نەتەوەیی کوردی و کوردستانی قسێشان کەردێ.

۱۸ مین جڤاتی گردیی کەەکەی ئارۆ شەممە و سەبای یەک شەممە درێژەش هەن. جفاتی گردیی کەنەکەی ساڵانە هەر جارێ جە وڵاتێ ئەنجام مڎریۆنە و ۲ ساڵێن پەیاپەی جە هۆڵەندا ڕێکۋزیۆنە.