گورزی فرە قورس جە دوژمنی دریاۋە و ۲٦ سەربازێ کوشێ
هەپەگە: جە هەڵمەتو شۆڕشگێڵی گەریلایەنە ۲٦ سەربازێ تورکیای کوشیێنێ، ٤ سەرنگەرێ و پەناگێ خاپورێ کریێنێ و زرێپۆشێۋ دلێنە بریان.
دلێگەو یاۋنەری و چاپەمەنی هێزەکانو پارێزنای گەلی-هەپەگە، بە ۋەڵاکریا ئاشکراش کەردەن:
٢١ ئابی سەعات ٠٧:٥٠ سەرسائبی، جە بەرزایی عەلی شێری کە سەر بە ناوچەو گەڤەر-و جۆلەمێرگ-یەن، گەریلا جە ۲ قۆلێۋە چالاکیش دژ بە هێزە داگیرکەرەکانو تورکیای ئەنجام دان و جە ئاکامشەنە، ۱ سەنگەر و ۱ پەناگەی سەربازی خاپورێ کریێنێ و لانی کەم ۷ سەربازێ دوژمنی کوشیێنێ.
هەمان ڕۆچ و جە هەمان شۆن، بەڵام سەعات ١٩:٥٠ ئێۋارەگای، جارێ تەر گەریلا سەربازەکێ دوژمنیش کەردێنە ئامانج و جە ئەنجامشەنە ۲ سەربازێ تەرێ کوشیێنێ.
هەر جە گەڤەر، بەڵام جە دەڤەرو چەرچێلای، سەعات ١٦:٣٠ دەیەقێ ۋێرەگای گەریلا هێرشش کەردەن سەرو سەربازە داگیرکەرەکانو تورکیای جە بەرزایی مەجلسی. جە هێرشەکەنە گورزی فرە قورس جە دوژمنی دریان، سەرەڕا وێرانکەردەی ۳ سەنگەران، ۷ سەربازێچ کوشیێنێ.
۲۱ ئابی سەعات ۰۳:۲۰ دەیەقێ سەرسائبی، جە شارچەو دلوجوی کە سەر بە هەرێمو سەرحەد-یەن، گەریلا چالاکیش دژو ۲ زرێپۆشان ئەنجام دان. جە چالاکیەکەنە ۱ زرێپۆش دلێنە بریان و ٥ سەربازێ سەرنشینێش کوشیێنێ.
هەمان ڕۆچ هەر جە سەرحەد، بەڵام جە ناوچەو بایزیدی سەر بە پارێزگەو ئاگری، سەعات ۱۰:۳۰ دەیەقێ سائبی، گەریلا جە ۳ قۆڵێۋە هێرشش کەردەن سەرو سەربازگەو گیوربولاکی. جە هێرشەکەنە ٥ سەربازێ کوشیێنێ و ۳ تەریچ بریندارێ بیێنێ.
نیمەڕۆ ٢٠ ئابی ۋیەردەی، جە ناوچەو بەستای سەر بە شرناخی، دوژمن ئۆپەراسیۆنش ئەنجام دان و بە فڕۆکێ و کۆپتەرێ جەنگیێ دەڤەرو پیرۆ-یش بۆردومان کەردەن، جە ئاکامشەنە ۲ گەریلێ شەهیدێ بیێنێ، کە دماتر شناسنامەکەشان و زانیاری زیاتەر جە بارەشانەوە پەی ڕای گشتی ئاشکرا مەکریۆنە.
