نویسەر و چالاکوان ئاکۆ مارانی خزمەتێۋیتەرش جە بوارو ئایتی و ئەنتەرنێتی پەی نویستەی بە هەورامی پێشکەش بە هەورامی نویسەکان کەرد. مارانی پەی جۆرە باس جە خزمەتەکەیش مەکەرۆنە نویستەنش: یەکەمین ھۆرامی-نۋیس کە بە بېیەی و بەبۍ بېیەی پەیوەندی ئینتەرنێتیی متاۋیۊ پەی نۋیستەی بە ھۆرامی بەبۍ بېیەی کیبۆردۍ ھۆرامیی و ئارامیۍ ئەرەمەزیێ سەرو دەزگاو بەکاربەریی [دێسکتۆپ، لێپتۆپ، تێبلێت، ئایپێد، مۆبایل-فۆن] بەکاربریۊ و ھەر پاسە متاۋیۊ پەی:

- فاڕای نۋیسیای چە ئەلف و بای ئارامی پەی ئەلف و بای لاتینی و چە ئەلف و بای لاتینی پەی ئەلف و بای ئارامی،
- نۋیستەی بە ئەلف و با ئۆروپییەکا و فاڕایش پەی ئەلف و بای ھۆرامی-ئارامی،
- یونیکۆدکەرڎەو نۋیستە کۊنەکا، کە بە فۆنتە نا-یونیکۆدەکا (عەلی-فۆنتۍ و دیلان-فۆنتۍ) و (کیبۆردە فارسیی و عەرەبییەکا) نۋیسیێنۍ، 
- نۋیستەی بە ئەلف و با ئۆروپییەکا و فاڕایش پەی ئەلف و بای ھۆرامی-لاتینی،
- نۋیستەی بە ئەلف و بای ئارامی بەبۍ بېیەی کیبۆدۍ ئارامیۍ و
- .... تد
ھۆرامی-نۋیس تاکە پەڕلېۋی ئینتەرنێتیی فرە گولانەن، کە فرە بە ئاسانی متاۋیۊ دلۍ دەزگاکانە و سەرو ھەمانە دیگیتاڵەکاۋە [یو‌ئێس‌بی USB، ئێس‌دی‌کارت SD-Card و مایکرۆ-ئێس‌دی‌کارت Micro-SD و دیسکی بەرینە External HDD] پاشەکۆتکریۊ و ھەردەم ۋەرباخەڵەنە چنی وۍ ھۊرگېریۊ و گرڎ یاگېۋەنە ۋەردەس بۊ.
پەی ئانەی کە گرڎ کاتېۋ پەڕلەو (ھۆرامی-نۋیسی) ۋەردەس بۊ، دماو ئەرەگېرتەیش چە ئا لینکەنە و پاشەکۆتکەرڎەیش، پەڕلە پەسیاکەی (Zip file) دلۍ بۊخچېۋیەنە (Folder) و ئەۋەکەرڎەی پەڕلە پەسیاکەی (Horami-nvis v1.0)، سەرو پەڕلەکەی (Horami-nvis v1.0) کلیککەرە و بەپاو ئانەی چ وێبگېڵېۋ (web-browser) بەکاربەریۊ، پەنجەرېۋی ئاسایی ئینتەرنێتیی کریۊۋە. 
پەی ئانەی گرڎ جارېۋ پەنەوازیی بە ئەۋەکەرڎەی پەڕلەکەی نەبۊ، چە بەشۊ ڕېکۋستەو وێب-گېڵەکەو وېتەنە، پەنجەرەو (ھۆرامی-نۋیس)ی کەرە بە پەنجەرەی سەرەکی-بنەمایی وێب-گېڵەکەو وېت، تاکو گرڎ کاتېۋ چنی ئەۋەکەرڎەی ئینتەرنێتی، یەکسەر (ھۆرامی-نۋیس) ۋەردەس بۊ. ھەڵبەتە پەی بەکاربەرڎەی (ھۆرامی-نۋیس)ی پەی نۋیستەی بە ھۆرامی و فاڕای نۋیستە کۊنەکا بە یونیکۆد و بەشەکا تەریچش، ھیچ پەنەوازیېۋ بە بېیەی پەیوەندی ئینتەرنێتیی نېیا، چونکە پەڕلەو (ھۆرامی-نۋیس)ی سەرتەل (online) و بەرتەل (offline) ھەرمانەکەرۊ.
پەی ئانەی کە ھۆرامی-زۋانۍ و ھۆرامی-نۋیسەکۍ چە پابەڼیی کیبۆردە نا-ھۆرامییەکا ڕزگارشا بۊ و بتاۋا بە ھۆرامی بنۋیسا و بە بەکاربەرڎەی پیتە ھەڵە و ناھۆرامییەکا پېسەو (ذ ، ؤ ، ...تد) ناچارېنەبا، پەڕلەو (ھۆرامی-نۋیس)ی پەی یار و یاۋەر و خویشانو وېت، پەی گرڎو پەیوەندییە کۊمەڵایەتییەکا وېت بکیانە.
لینکو ئەرەگېرتەی (ھۆرامی-نۋیس)ی
https://mega.nz/#!hFdFCa4b!AzjGcyxmAaPWCxiNU785JGP9Ccgwo4nDEprW57yPp78

لینکو بەکاربەرڎەی (ھۆرامی-نۋیسی) بەبۍ ئەرەگېرتەی، چە ئینتەرنێتەنە
https://sites.google.com/view/horaminvis

یانەو ئایتی ھۆرامانی

https://www.facebook.com/horaman.IT.club

https://t.me/Horaman_IT_Club
----------------------------------------------------
فەرھەنگڵەو ۋاچا :
دەزگاو بەکاربەریی : نموونە ( دێسکتۆپ، لێپتۆپ، تێبلێت، ئایپێد، مۆبایل-فۆن و ...تد)
عەلی-فۆنتۍ و دیلان-فۆنتۍ : کۊمەڵېۋ ۋېنە-فۆنتۍ بېنۍ، کە ساڵۊ ١٩٩٧، ئا کاتە پەی نۋیستەی (کرمانجی و سۆرامی و ھۆرامی -ئارامی) کیبۆردۍ نەبېنۍ و ئا ۋېنە-فۆنتۍ گنېنۍ سەرو پیتە عەرەبییەکا پەی نموونەی پیتۊ (ڤ) گنۍ سەرو پیتۊ (ظ)، (گ) گنۍ سەرو پیتۊ (ط) و کاتېۋ کە نۋیسەر ئا ۋېنە-فۆنتېشە نەبیێنۍ، نۋیستەکۍ تېکەڵوپېکەڵ و ھەڵە، پیتە بنەڕەتییە عەرەبییەکۍ بەرگنېنۍ.
دیلان-فۆنتۍ : کۊمەڵېۋ فۆنتۍ نا-یونیکۆدۍ بېنۍ، کە بەرھەمو (KurdSoft.com) بېنۍ و ئاڎېچۍ ھەمان گرفتو (عەلی-فۆنت)اشا بۍ و سەردەمو نەبېیەی فۆنت و کیبۆردۍ یونیکۆدېنە بەکاربریېنۍ.
USB : 
یەکەمین ھۆرامی-نۋیس کە بە بېیەی و بەبۍ بېیەی پەیوەندی ئینتەرنێتیی متاۋیۊ پەی نۋیستەی بە ھۆرامی بەبۍ بېیەی کیبۆردۍ ھۆرامیی و ئارامیۍ ئەرەمەزیێ سەرو دەزگاو بەکاربەریی [دێسکتۆپ، لێپتۆپ، تێبلێت، ئایپێد، مۆبایل-فۆن] بەکاربریۊ و ھەر پاسە متاۋیۊ پەی 
SD-Card و Micro-SD : ھەمانۊ پاشەکۆتکەرڎەی بەرەکیی کامێرای و مۆبایلی و تێبلێتی
External HDD : ھەمانۊ پاشەکۆتکەرڎەی بەرەکیی، کە قەبارەش چە ھەمانەکا تەری گۆرەتەرا
Zip file : پەڕلە پەسیا و جەڕدریا، یان بۊخچەی پەسیا و جەڕدریا
Folder : بۊخچە
Web-browser : وێب-گېڵ، ئامرازو بەکاربەرڎەی و گېڵای ئینتەرنێتنەتە، نموونە
Firefox, Opera, Safari, Internet-Explorer, Google Chrome
online : سەرتەل ، سەرو خەتو ئینتەرنێتیۆ
offline : بەرتەل ، بەرو خەتو ئینتەرنێتیۆ