بە دەستپێشخەریى ئەنجوومەنى ژنانى ئازاد لە هەرێمى جزیر و دەستەى هەرەوەزیى ئەنجوومەنى ژنانى ئازاد لە هەرێمى فورات و بە هاوکاریى دارایى رێکخراوەکانى دەرەوە، ئامادەکارییەکانی کردنەوەى یەکەمین خانەى بێسەرپەرشتان لە کۆبانێ تەواو بووە.

لە شۆڕشى رۆژئاوا و ئەو شەڕانەدا گەلی هەرێمەکە لە دژی تیرۆر ئەنجامیانداوە چەندین منداڵ بنەماڵە و خێزانەکانیان لە دەستداوە و بێسەرپەرشت بوون. بە تایبەتى ژمارەى ئەو منداڵانە لە کۆبانێ بەرچاوە. شارى کۆبانێ چەندین هێرشى لەلایەن چەتەکانەوە کراوەتە سەر و گەلی هەرێمەکە بە بەرخۆدانێکى گەورە و بێ وێنە بەرەنگاری ئەو هێرشانە بوونەوە. چەتەکان هەوڵیاندا کۆمەڵکوژی ئەنجام بدەن و بەهۆی ئەو هیرشانەوە چەندین بنەماڵە کوشتارکران و ژمارەیەکى زۆر منداڵ بێسەرپەرشتیار و کەسوکار بوون.

بۆ دروستکردنى دوارۆژێکى رووناک بۆ ئەو منداڵانە، ئەنجوومەنى ژنانى ئازاد لە هەرێمى فورات خانەیەکى بێسەرپەرشتانى دروستکردووە بۆ ئەوەى ئەو منداڵانە ببن بە خاوەنى شوێنێکى ئارام و بە باشی پەروەردە بکرێن. ئەنجوومەنى ژنانى ئازاد لە ساڵی ٢٠١٥ەوە دەستیکردووە بە دروستکردنى پرۆژەى خانەى بێسەرپەرشتان و ئێستا کارەکانى ئەو خانەیە تەواو بووە.

منداڵەکان لەو خانەیەدا، پەروەردەى رۆشنبیری دەکرێن و فێرى زمانەکانى عەرەبی و کوردی و ئینگلیزى، کۆمپیوتەر، هونەر و وەرزش دەکرێن.

خانەى بێسەرپەرشتان لە ٢ بینا و ٢١ ژوور پیکهاتووە. هەر بینایەک ٣ نهۆمە. منداڵەکان لە بینایەکیاندا پەروەردە دەکرێن و لە بیناکەى تریشدا دەحەوێنەوە. لە هەر دوو بیناکەدا باخچە و شوێنى یاریى منداڵ دابینکراوە.

خانەى بێسەرپەرشتان لە مانگى ئابەوە ٥٠ منداڵی بێسەرپەرشتی کۆبانێ وەردەگرێت و دەیانحەوێنێتەوە. بۆ پەروەدەکردن و سەرپەرشتیى کردنی ئەو منداڵانە ١٨ مامۆستا و فەرمانبەری ژن ئەرکدارکراون. بەپیى وتەى بەرپرسان، بڕیارە بەمزوانە خانەى بێسەرپەرشتان لەلایەن کەسوکارى ئالان-ەوە بکرێتەوە.

ر.م