بەپێى زانیارییەکان نزیکەى ٨٠ چەتەى دەوڵەتى تورکیا لە عەفرین دەستیان کردووە بە دزینى زەیتونی هاووڵاتییان و زەیتونەکانیان بردووە بۆ کارگەیەک و هەوڵیانداوە زەیتى زەیتونی لێدروست بکەن.

بە زۆر ئاڵاى تورکیا هەڵدەواسن

هاوکات دەوڵەتى تورکیا و چەتەکانى هەوڵ دەدەن بە زۆر ئاڵاکەیان بە هەموو شوێنێکدا هەڵبواسن. هەڕەشە لە هاووڵاتییان دەکەن و دەڵێن، ئەگەر ئاڵاکە هەڵنەواسن سزای پارە دەدرێن.

داگیرکەری و تاوانەکانیان

هێرش بۆ داگیرکردنى عەفرین لە ٢٠ی کانوونی دووەمی ٢٠١٨ دەستیپێکرد و رۆژی ١٨ی ئازاری ٢٠١٨ داگیرکەران چوونە ناو شاری عەفرین و ئەو شارەیان داگیرکرد. داگیرکەران لە هەموو ناوچە داگیرکراوەکاندا بەشێوەى بەرنامە بۆداڕێژراو تاوانى جەنگ و تاوانى دژی بە مرۆڤایەتییان ئەنجامداوە. جگە لە کۆمەڵکوژی کە لە کاتى هێرشە داگیرکەرییەکان ئەنجامیاندا، تاوەکو ئێستاش هەموو رۆژێک هەواڵی کوشتن، رفاندن، ئەشکەنجەکردن، تاڵانکردن، دەستدرێژی و پەلاماردان بەرامبەر بە هاووڵاتییان ئەنجام دەدەن.

تاوانى داگیرکەران لە راپۆرتە نێودەوڵەتییەکاندا

رێکخراوى لێبوردنى نێودەوڵەتى (ئەمنستى ئینتەرناشناڵ) لە سەرەتاى مانگى ئابدا لە راپۆرتێکدا رایگەیاند، بەشێوەى زۆر قورس و بە چڕی مافەکانى مرۆڤ لە عەفرین پێشێل دەکریت. راشیگەیاندبوو، دەوڵەتى تورکیا شارەکەى داگیرکردووە و لەو تاوان و پێشێلکارییانە بەرپرسیارە.

هەروەها رێکخراوى چاودێریى مافەکانى مرۆڤ (هیومان رایتس وۆچ) لە مانگى حوزەیراندا لە راپۆرتێکیدا رایگەیاندبوو، گروپەکانى سەر بە تورکیا لە عەفرین ماڵ و موڵکی هاووڵاتییانى کوردیان تاڵانکردووە و و دەستیان بەسەردا گرتوون.

ر.م