لە شاری ستۆکهۆڵمی پایتەختی سوید، لە گەڕەکی ڤۆربی گۆرد، یادی ١٨هەمین ساڵیادی دامەزراندنی پارتی ژیانی ئازادی کوردستان (پەژاک) بە مەراسیمێک پیرۆزکرا.

ئاهەنگەکە بە سرودی نەتەوەیی کوردستان 'ئەی ڕەقیب' دەستیپێکرد و پاشان پەیامی ئەنجومەنی پەژاک خوێندرایەوە.

بەرپرسی کاروباری دیپلۆماسیی ئەوروپای پەژاک ئەمیر بابەکری باسی لە مانا و گرنگیی ڕۆژەکە کرد وتی: "ئەو ڕۆژە، کە یادی لەدایکبوونی ڕێبەر ئاپۆ دەکەینەوە، هاوکات یادی ١٨هەمین ساڵیادی دامەزراندنی پەژاکە، کە بە فکر و فەلسەفەی ئەو بنیادنراوە. ئەمە بۆ گەلی کورد لە ڕۆژهەڵاتی کوردستان و تێکۆشانیان زۆر گرنگە. ئامانجمان ئەوەیە بۆ مافەکانی مرۆڤ و ئازادی مرۆڤایەتی، کارەکانمان لەگەڵ پێکهاتەکان و ڕێکخستنەکان لەسەر بنەمای دیموکراسی و ژیانی هاوبەش بەرفراوان بکەین".

پۆستەرەکانی ڕێبەری گەلی کورد عەبدوڵا ئۆجالان، ئاڵاکانی پەژاک و وێنەی شەهیدانی پێشەنگی پەژاک لە هۆڵی چالاکییەکەدا  هەڵواسرابوون.

لە ڕێوڕەسمەکەدا پەیامی چەندین ڕێکخراو و ڕێکخستنی سیاسی خوێندرایەوە. هەروەها کاڵێ ئاتەشی, گرین، ئەڤین و موراد بە گۆرانییەکانیان چالاکییەکەیان زیاتر ڕازاندەوە.

ژ.ت