لێکۆڵینەوە دەرهەق بە ئەندامی دەستەی بەڕێوەبەری سەندیکای ئیستەنبوڵ فورات ئەپۆزدەمیر کۆتایی هات. داواکاری گشتی کۆماری ئیستەنبوڵ لێکۆڵینەوەکەی بە تۆمەتی "پڕوپاگەندەی ڕێکخستن"کۆتایی پێ هێنا و لە تۆمەتنامەکەدا داوا سزای زیندانی لە نێوان ٧ ساڵ و ٦ مانگ و ١٥ ساڵ بۆ ئەپۆزدەمیردەکات.

لە تۆمەتنامەکەدا دەرهەق بە فورات ئەپۆزدەمیر کە سێ مانگە لە ژێر چاودێرییدایە گوترا: "بە پێی زانیارییەکان سەبارەت بە کەسی گومانلێکراو، دەستنیشانکراوە کە کەسی گومانلێکراو گرێدراوی فەرمانی عەبدوڵا ئۆجالانە، لە شارەکانی ڕۆژئاوای تورکیادا لە ناو کۆنگرەی دیموکراتیکی گەلان (هەدەکە)دا بە ئامانجی ڕێکخستنی چەپ و پۆتێسناڵی ڕێکخستنکردن وەک سەرۆکی ناوچەی باگجلەری ئیستەنبوڵ کاری کردووە".

تۆمەتنامەکە لە ٢٧هەمین دادگای سزای قورسی ئیستەنبوڵ پێشکەشکرا و ٢٧هەمین دادگای سزای قورسی ئیستەنبوڵ دوای لێکۆڵینەوەی پێویست بڕیاری پەسندکردنی تۆمەتنامەکە دەدات.