بوڵدان و سانجار: ئێمە بە بڕوا و بڕیارین و بە دڵنیاییەوە سەردەکەوین
"تۆمارکردنی سکاڵا بۆ داخستنی حیزبەکەمان، گورز و کودەتایەکی گەورەیە لە دیموکراسی و یاسا و مافەکانی وڵات. ئەو حکومەتە وەک بەڕێوەبەرییەکی کودەتا چی ناوی خۆی لە مێژوودا تۆمار کرد".
پەروین بوڵدان و میدحەت سانجار هاوسەرۆکانی گشتیی هەدەپە لەبارەی تۆمارکردنی سکاڵا لەلایەن داواکاری گشتی کۆماری لە دادگای باڵای دەستووری بۆ داخستنی هەدەپە و هەڵوەشاندنەوەى مافی پارێزبەندیی عومەر فاروق گەرگەرلی ئۆغڵو رایانگەیاند، "هەدەپە تەنها حیزبێک نییە، بەڵکو لە هەمان کاتدا رامان و بیرێکە. ملیۆنەها مرۆڤ لە دەوری ئەو بیر و رامانە بوونەتە یەک. بە دڵنیاییەوە ملیۆنەها مرۆڤ داوا و پێشەرۆژی سیاسیی خۆیان دەوێت. لەلایەکی ترەوە، حکومەتی ئاکەپە – مەهەپە رەوایەتیی دیموکراتیکی خۆی لە دەستداوە و هەوڵ دەدات بە ملهوڕی و بە بەکارهێنانی کەرەستەکانی گوشار خۆی لەسەر پێ بهێڵێتەوە".
راشیانگەیاند، "هەر ئەو رۆژەى، کە عومەر فاروق گەرگەرلی ئۆغڵو پەرلەمانتاری کۆجالیمان، لە ئەنجامی حساباتی سیاسیی حکومەت و بە پێشێلکردنی یاسا و مافەکان لە پەرلەمانتاری دوورخرایەوە، داواکاری گشتیی کۆماری لە دادگای باڵای دەستووری سکاڵای بۆ داخستنی هەدەپە تۆمار کرد.
حکومەتی ئاکەپە، کە دادگای بە خۆیەوە بەستووەتەوە، دادگا بۆ جوانکردن و دیزاینکردنی سیاسەتەکانی بەکاردەهێنێت.
تۆمارکردنی سکاڵا لە دژی حیزبەکەمان گورز و کودەتایەکی گەورەیە لە دیموکراسی و حقوق و یاساکانی وڵات. ئەو حکومەتە وەک بەڕێوەبەرییەکی کودەتاچی ناوی خۆیان لە مێژوودا تۆمار کرد.
ئاکەپە تۆمارکردنی سکاڵای بۆ داخستنی هەدەپە کردە دیاری بۆ کۆنگرەى مەهەپە. داواکاری گشتی و دادوەرەکان بەپێی فەرمانی سیاسیی دەجوڵێنەوە، بەڵام دەبێت ئەوە بزانن، کە ئەو هێز و دەسەڵاتە دەگۆڕدرێت، بۆیە بە دڵنیاییەوە لە بەرامبەر یاسا و مافەکاندا لێپرسینەوەتان لێدەکرێت.
ئەوەى روویداوە، نیشانەی بێچارەبوونێکی قوڵە، کە بلۆکی دەسەڵاتی ئاکەپە – مەهەپە تووشی بوون. وەک لە رووی فیکری و سیاسییەوە ئەوەی، کە ناتوانن لە سندوقەکاندا بە دەستی بهێنن، ئێستا ئامانجیان ئەوەیە، کە لە رێگەى دادگاوە هەدەپە لە سیاسەتی دیموکراتیک داببڕن. ئەو هێرشە بە هۆی ترسی قوڵیانەوەیە و سەرچاوەکەى بۆ ئەو ترسەیان دەگەڕێتەوە.
هەدەپە نەک تەنها حیزبێک، بەڵکو لە هەمان کاتدا بیر و رامانێکە. میلۆنەها مرۆڤ لە دەوری ئەو بیر و رامانە بوونەتە یەک. بە دڵنیاییەوە ملیۆنەها مرۆڤ خاوەنداری و پشتیوانی لەو ئیرادە و ورە سیاسییە و پێشەرۆژ و داهاتووی خۆیان دەکەن.
لەلایەکی ترەوە حکومەتی ئاکەپە – مەهەپە رەوابوونی دیموکراتیکی خۆی لە دەستداوە و هەوڵ دەدەن بە کەرەستەی زۆرداری و گوشار خۆیان لەسەر پێ بهێڵنەوە. دەبێت حکومەتی ئاکەپە – مەهەپە باش بزانێت، هەر چییەک دەکەن ئیمە هەرگیز سەر دانانەوێنین، ئێمە چۆک دانادەین و سازش لەسەر سیاسەتی دیموکراتیک ناکەین و ئێمە بە بڕیا و پێداگرین بۆ درێژەدان بە بەرخودانی دیموکراتیک و تێکۆشانەکەمان.
داوامان لە هەموو هێزە دیموکراسییەکان، ئۆپۆزسیۆنی سیاسی و کۆمەڵایەتی ئەوەیە، کە لە دژی ئەو کودەتا سیاسی و پاکتاوکارییە ئاشکرایەی حقوق و مافەکان و دیموکراسی، تێکۆشانی هاوبەش بەڕێوەببەن.
ئێمە داوا لە دەستەى بەڕێوەبەری ناوەندیی حیزبەکەمان دەکەین بۆ کۆبوونەوەی نائاسایی. بە نەریتی دێرینی تێکۆشانی مێژوویمان ئێمە ئەم قۆناغە تاریکە تێدەپەڕێنین. ئێمە بە بڕیار و باوەڕین. بێگومان و بە دڵنیاییەوە ئێمە سەردەکەوین".
ژ.ت
