ئەندامی پێشووی پەرلەمانی هەرێمی بەرلین هاکان تاش ڕایگەیاند؛ سوپای تورک نەک تەنها دوای ڕووخانی ڕژێمی ئەسەد هێرشی کردە سەر ڕۆژئاوای کوردستان، بەڵکوو پێشتریش بەردەوام کەسانی مەدەنی هەرێمەکەی کردووە ئامانج و بەسەدان هاوڵاتی مەدەنی کوشتووە.

هاکان تاش بەبیری هێنایەوە کە لەم دواییانەدا ڕۆژنامەنووسان نازم داشتان و جیهان بیلگین بەدەستی دەوڵەتی تورک شەهید کران، ئەم تاوانەی ئیدانە کرد و وتی: "نابێت لەلایەن هیچ وڵاتێکەوە ئەم تاوانانە قبوڵ بکرێت کە ڕۆژنامەنووسی بێتاوان بکرێنە ئامانج و شەهید بکرێن. بۆیە داوا لەگەلی ئەوروپا دەکەم دژ بەم کردەوانە ناڕەزایی خۆیان نیشان بدەن."

هاکان تاش ئەوەشی هێنایە زمان کە لەگەڵ دەستپێکردنی دۆخی نوێی سوریا، دەسەڵاتدارانی فیدراڵی ئاڵمانیا و وڵاتانی دیکەی پەیوەندیدار سەردانی تورکیایان کردووە و سەبارەت بە هێرشەکانی بۆ سەر کوردان ڕەخنەیان گرتووە.

هاکان تاش ئەوەشی وت کە ئەمریکا خەڵاتی ١٠ملیۆن دۆلاری بۆ دەستگیرکردنی سەرۆکی ڕێکخراوی هەتەشە کە لە لیستی تیرۆری ئەمریکادایە هەڵوەشاندووتەوە و وتی: "ئەمریکا و وڵاتانی دیکەی ئەوروپا بۆ ئەوەی بتوانن ڕێگای هاوکاری لەگەڵ هەتەشە بکەنەوە، لەگەڵ یەکتر کەونەتە کێبڕکێ".

هاکان تاش بانگەوازی پاراستنی مافەکانی گەلی کوردی لە سوریا و پاڵپشتی لە تێکۆشانیانی کرد و ڕایگەیاند؛ دەوڵەتی تورک بە هێرشەکانی زیانێكی گەورەی بە کەسانی مەدەنی دەگەیەنێت و پێویستە هەر کەسێک لەدژی ئەو تاوانانە دەنگی خۆیان بەرز بکەنەوە و نارەزایەتی نیشان بدەن."