لە راگەیاندراوەکەى کەنەکەدا هاتووە، "دکتۆر کەمال کەسێکی نیشتمانپەروەر، رۆشنبیر، ئەکادیماکار و مێژوونووسێکی پڕ بەرهەم بوو. خزمەتێکی زۆری بە مێژووی گەلەکەی، بە زمان و رۆشنبیریی و کتێبخانەی کوردی کرد. مامۆستا کەمال مێژوویەکی سادەی نە ئەنووسی، بەڕیزیان بە وردی سەرنجی رەهەندەکانی مێژوویان ئەدا. بەدواداچوونی زانستیانەی بۆ کاراکتەرو جووڵە کاریگەرەکانی کۆمەڵگە ئەکرد".

کەنەکە راشیگەیاندووە، " لەدەستدانی دکتۆر کەمال وەک کەسایەتییەکی رۆشنبیر و زاناو پسپۆڕێکی مێژوو، لەم قۆناغە هەستیارەی گەلی کوردستاندا زیانێکی گەوەرەیە و جێگاکەی بۆ هەمیشە دیارئەبێت".

دەقی پەیامەکەى کەنەکە

کۆچی دوایی مێژوونووسی ناوداری کورد دکتۆر کەمال مەزهەر ئەحمەد

بە داخێکی زۆرەوە ئەمڕۆ، 16.03.2021 ئەکادیمیکار و مێژوونووسی ناوداری کوردستان، پڕۆفیسۆر کەمال مەزهەر ئەحمەد لە تەمەنی 84 ساڵیدا و لە نە خۆشخانەیەکی شاری بۆن لە ئەڵمانیا ماڵاوایی لێکردین. دکتۆر کەمال کەسێکی نیشتمانپەروەر، رۆشنبیر، ئەکادیماکار و مێژوونووسێکی پڕ بەرهەم بوو. خزمەتێکی زۆری بە مێژووی گەلەکەی، بە زمان و رۆشنبیریی و کتێبخانەی کوردی کرد. مامۆستا کەمال مێژوویەکی سادەی نە ئەنووسی، بەڕیزیان بە وردی سەرنجی رەهەندەکانی مێژوویان ئەدا. بەدواداچوونی زانستیانەی بۆ کاراکتەرو جووڵە کاریگەرەکانی کۆمەڵگە ئەکرد. هەر لەو چوارچێوەیەدا، سەرەڕای کتێب و نووسینە مێژووییە پڕبایەخەکانی تری،  کتێبی لەسەر مێژووی تێکۆشانی ژنانی کورد و کرێکارانی کوردستان و عێراقیش نووسی. لە بواری کارەکەشیدا وەک مامۆستایەکی زانکۆ، بە سەدان خوێندکاری پێگەیاند. سەرپەرشتیی چەندین نامەی ماستەر و دکتۆرای کرد. بە تایبەتی لە زانکۆکانی بەغداو موستەنسریەی عێراق، وەک زاناو پسپۆڕکی کورد، لە لایەن خوێندکاران و مامۆستایانەوە رێزێکی زۆری لێ ئەگیرا.

دکتۆر کەمال بە زمانەکانی کوردی و عەرەبی و رووسی و ئینگلیزی کتێب و وتاری نووسیوە. ئەندامێکی کارای کۆڕی زانیاری کورد بوو. لەو دەزگا گرنگەشەوە خزمەتێکی زۆری گەلەکەی کرد.

لەدەستدانی دکتۆر کەمال وەک کەسایەتییەکی رۆشنبیر و زاناو پسپۆڕێکی مێژوو، لەم قۆناغە هەستیارەی گەلی کوردستاندا زیانێکی گەوەرەیە و جێگاکەی بۆ هەمیشە دیارئەبێت.

ئێمە لە کۆنگرەی نەتەوەیی کوردستان بە کۆچی دوایی دکتۆر کەمال مەزهەر زۆر خەمبار بووین. سەرەخۆشی لە خۆمان، لە گەلی کوردستان و خەمخۆرانی مێژووی کورد و خانەوادەی مامۆستا کەمال ئەکەین. دکتۆر کەمال مەزهەر هەروەک چۆن خزمەتێکی زۆری بە مێژووی گەلەکەی کرد، ، بە هەمانشێوەش سومبوڵێکی مێژووی گەلەکەیەتی و بۆ هەمیشە بە زیندوویی لە ناو ئەو مێژووەدا ئەژی.

ژ.ت