کۆمیتەی راگەیاندنی کۆنگرەی نەتەوەەیی کوردستان کەنەکە لە ساڵیادی دەرچوونی ڕۆژنامەی کوردستان کە وەک ڕۆژی رۆژنامەگەریی کوردی دەستنیشان کراوە، ڕاگەیەنراوێکی داوە.
کەنەکە ڕایگەیاندوە: رۆژنامەی کوردستان بەدەرچوونی دڕی بە تاریکستانی سەردەمی دەسەڵاتی عوسمانیدا و تا سنوورێکی باش توانی هەواڵەکانی کوردستان بگەیەنێتە بەرچاوی ناوخۆ و دنیا.. لەو رۆژەشەوە تا بەئەمڕۆ کاروانی رۆژنامەگەریی کوردیی بەردەوام بووە. ئێستاش ئێمە لە سەردەمێکدا ئەژین کە بوارەکانی راگەیاندن لە رووی چەندێتیەوە یەکجار فروان و فرە رەهەندن. بە ئاسانی ئەگەنە خەڵک. لەبەر ئەوە رۆڵ و پێگەی راگەیاندن زۆر کاریگەرترە و زیاتر ئەتوانێ کار لەسەر ئاڕاستەی دیاردە و رووداوەکان بکات.

کەنەکە ئاماژەی بەوەداوە: ئەمڕۆکە راگەیاندنکاری کورد لە لایەکەوە وڵاتەکەی داگیر کراوە، لە لایەکی تریشەوە کۆمەڵگەکەی لە دۆخێکی سیاسی و ئابووریی و کۆمەڵایەتی هەستیاردایە، لە ئاستێکی هۆشیاریی و کلتووری لاوازدایە. لەو شوێنەشدا کە کورد جۆرە ئازادییەکی ڕێژەیی سیاسیی هەیە، خراپ بەکارهێنانی دەسەلات و بێدادیی کۆمەڵایەتی و هەستنەکردن بە بەرپرسێتی نەتەوەیی و مێژوویی، تەنگی بە خەڵک هەڵچنیووە. 
کەنەکە لەم بۆنەیەدا، سڵاو دەنێرێت بۆ گیان پاکی هەموو ئەو میدیاکارە قارەمانانەی کە لە بەجێگەیاندنی ئەرکی مەزنی میدیاکاریدا، گیانیان لەدەستداوە و یادیان بەرز ڕادەگرێت.

دەقی ڕاگەیەندراوەکەی کەنەکە:

لە ساڵیادی رۆژنامەگەریی کوردیدا

لە 22ی نیساني 1898 دا یەکەم رۆژنامەی کوردی بە ناوی " کوردستان " بە دەستپێشخەریی میقداد مەدحەت بەدخان بڵاوکرایەوە. بەو بۆنەیەوە رۆژی 22ی نیسان وەک رۆژی رۆژنامەگەریی کوردی دەستنیشانکراوە. لەو رۆژەوە تا ئەمڕۆ کاروانی رۆژنامەگەریی کوردیی شانبەشانی خەبات لە پێناو ئازادیی و دیموکراسی و دادی کۆمەڵایەتیدا بەردەوام بووە. رۆژنامەی کوردستان لە قۆناغێکدا چاوی هەڵهێنا کە کوردستان لەژێر دەسەڵاتی دواکەوتووی عوسمانیدا لە رووی سیاسی و ئابووری و کۆمەڵایەتییەوە نوقمی رۆژگارێکی تاریک بوو. ئەو رۆژنامەیە ئەو کاتە دڕی بەو تاریکستانە دا. تا سنوورێکی باش توانی هەواڵەکانی کوردستان بگەیەنێتە بەرچاوی ناوخۆو دنیا.

ئێستا ئێمە لە سەردەمێکدا ئەژین کە بوارەکانی راگەیاندن لە رووی چەندێتیەوە یەکجار فروان و فرە رەهەندن. بە ئاسانی ئەگەنە خەڵک. لەبەر ئەوە رۆڵ و پێگەی راگەیاندن زۆر کاریگەرترەو زیاتر ئەتوانێ کار لەسەر ئاڕاستەی دیاردەو رووداوەکان بکات.

لە کوردستانی ئێستادا، بە دەیان کەناڵی تەلەفزیۆنی ئاسمانیی و ناوخۆیی، بە دەیان رادیۆ و بە سەدان گۆڤار و رۆژنامە و بە سەدان ماڵپەڕی و هەواڵ هەن. چەندێتییەک کە ئەگەر بە جۆنێتییەکی باڵاتر کار بکات، لە زۆر بواردا بە کردەوە ئەبێتە دەسەڵاتی یەکلاکەرەوە.

هەروەک چۆن دۆخی کوردستان تایبەتە، شەقڵی راگەیاندنەکەشی تایبەتە. راگەیاندنکاری کورد لە لایەکەوە وڵاتەکەی داگیر کراوە. لە لایەکی تریشەوە کۆمەڵگەکەی لە دۆخێکی سیاسی و ئابووریی و کۆمەڵایەتی هەستیاردایە، لە ئاستێکی هۆشیاریی و کلتووری لاوازدایە. لەو شوێنەشدا کە کورد جۆرە ئازادییەکی ڕێژەیی سیاسیی هەیە، خراپ بەکارهێنانی دەسەلات و بێدادیی کۆمەڵایەتی و هەستنەکردن بە بەرپرسێتی نەتەوەیی و مێژوویی، تەنگی بە خەڵک هەڵچنیووە. هەربۆیە ئەرکی راگەیاندنکار، میدیاکاری کورد چەند جەمسەرە.

ئێستا میدیاکاری کورد ناچارە لە لایەکەوە لەسەر دۆخی ناوخۆی سیاسی و ئابووری و کۆمەڵایەتی کوردان کار بکات. لە لایەکی تریشەوە ئەبینێ هێزە داگیرکەرەکانی کوردستان، رۆژانە پیلانی نوێ و نامرۆڤانە لە دژی خەڵکی کوردستان بەگەڕ ئەخەن. سەرەڕای داگیرکاریی و هێرشەکانیان، پیلان بۆ ناکۆکی و شەڕی ناوخۆیی نێوان کوردان دائەڕێژن. وەک ئەوەی ئێستا دەوڵەتی تورکیا ئەیکات. هەربۆیە گرنگە هەموو رەهەندەکانی پیشەیی بوون، هاوولاتی بوون و نیشتمانپەروەریی لە کەسێتی میدیاکاری کوردیدا کۆببنەوە. لەو سێکۆچکەیەوە ئەرکی پیرۆزی خۆی بەجێبێنێت.

ئێمە لە کۆنگرەی نەتەوەیی کوردستان، لە رۆژی رۆژنامەگەریی کوردیدا سڵاوی گەرم بۆ میدیاکارانی کوردستان بە هەموو بەشەکانیەوە، ئەنێرین. دەستخۆشی لە کارو ماندووبوون و شەونخوونییان ئەکەین. سڵاو لە گیان پاکی هەموو ئەو میدیاکارە قارەمانانەی لە بەجێگەیاندنی ئەرکی مەزنی میدیاکاریدا، لە بەرەکانی شەڕ لەگەڵ داگیرکەران و تیرۆریستان، گیانیان لەدەست دا. سڵاو لە رۆحی هەموو ئەو میدیاکارانەی لە پێناو ئازادی رادەربڕین و دیموکراسی و بەگژداچوونەوەی گەندڵی و نادادیی کۆمەڵایەتی و سیاسی و ئابووری، بوونە قوربانیی. سڵاو لە هەموو ئەو رۆژنامەوان و میدیاکارانەی لە زیندانەکانی دەسەڵاتدار و داگیرکەراندان.

جارێکی تر رۆژی رۆژنامەگەریی کوردی لە سەرجەم میدیاکارانی کورد، لە تەواوی خەڵکی کوردستان پیرۆز بێت. 

کۆنگرەی نەتەوەیی کوردستان،
کۆمیتەی راگەیاندن
21.04.2023 برۆکسل

هـ.هـ