کوردانی دانیشتووی شاری لیماسۆل لە وڵاتی قوبرس لە دژی هێرشە پاکتاوکاری و کۆمەڵکوژییەکانی سوپای ئاکەپە - مەهەپە بە چەکی کیمیایی بۆ سەر هەرێمەکانی پاراستنی مەدیا، لە بەردەم شارەوانیی لیماسۆل چالاکییەکی چادرهەڵدانیان دەستپێکرد. چالاکییەکە بە پێشەنگایەتیی بزووتنەوەی گەنجانی شۆڕشگێڕ و دەستپێشخەری ژنان و ئەنجوومەنی گەلی کورد لە قوبرس بەڕێوەچوو.

کوردستانیان لە چالاکییەکەدا بڵاوکراوەیان بە زمانی یۆنانی و ئینگلیزی بەسەر هاووڵاتییان دا دابەش کرد. خەڵکی قیبریس و گەشتیاران بایەخێکی زۆریان بۆ چالاکییەکە نیشاندا. چالاکوانانیش تاوانەکانی شەڕی دەوڵەتی تورکی داگیرکەریان لە دژی کورد بۆ هاووڵاتییان و گەشتیارا باس دەکرد، کە ئەو تاوانانە بە چەکی کیمیایی و قەدەغەکراو ئەنجام دەدات.

سیاسەتمەدار کامیل ئاکالن لە چالاکییەکەدا ڕایگەیاند، بۆ ریسواکردنی هێرشە پاکتاوکاری و کۆمەڵکوژییەکانی دەوڵەتی تورکی داگیرکەر و هێرشە کیمیاییەکان، کە بە بەڵگەوە سەلمێندراون، هەموو ڕۆژێک لە مەیدانەکان دا دەبن و هەموو رۆژێک لە سەرتاسەری قوبرس بە پێی پلان، زنجیرە چالاکیی سەرتاسەری ئەنجام دەدەن.

ئاکالن لەسەر پلانی چالاکییەکان وتی: "لە ئەمڕۆ بە دواوە ٣ ڕۆژ لە لیماسۆل، ٢ ڕۆژ لە لارناکا و لە کۆتایشدا ٣ ڕۆژ لە نیکۆسیا لەبەردەم بینای ئەنجومەن (پەرلەمان)ی قوبرس و نەتەوە یەکگرتووەکان و باڵیۆزخانەی ئەمریکا چالاکی ئەنجام دەدەن و چالاکییەکان لە کاتژمێر ١٢:٠٠ تاوەکو کاتژمێر ١٨:٠٠ی ئێوارە بەردەوام دەبن.

هەروەها ڕۆژی هەینی ٢٥ی تشرینی دووەم، ڕێپێوانێکی جەماوەری بۆ دەروازەی سنووری کۆشکی لیدرا لە نیکۆسیا رێکدەخەن. بەم بۆنەیەوە بانگەوازی هەموو گەلەکەمان لە قوبرس و دۆستانی قوبرسمان و هەموو ئازادیخوازان دەکەین، کە بەشداری لەو رێپێوانەدا بکەن".

ژ.ت