شانەى راگەیاندنى سەربازى عێراق، دەستگیرکردنى ژمارەیەک چەکدارى چەتە تیرۆریستەکانى داعش لە پارێزگاى نەینەوا راگەیاند،  کە بەشدارییان لە کوشتنى هاووڵاتییان و گواستنه‌وه‌ی كه‌سوكاری تیرۆریسته‌ كوژراوه‌كان دا کردووە.

بەپێى راگەیەنراوێکى شانەى راگەیاندنى سەربازى عێراق، کە دوێنێ هەینى بڵاوکراوەتەوە، گروپێکى مەترسیدارى سەربە رێکخراوى تیرۆریستى داعش-یان لە پارێزگاى نەینەوا لە باکوری عێراق دەستگیرکردووە .

لە راگەیەنراوەکەدا ئەوەش خراوەتەڕوو، له‌سه‌ر بنه‌مای زانیاری وردی هه‌واڵگری و دوای به‌دواداچون و چاودێری، گروپە تیرۆریستییەکە، کە ژمارەیان ٦ کەس بوە لە موسڵ دەستگیرکراون.

شانەى راگەیاندنى سەربازى عێراق ئاماژەى بەوەشکردوە، به‌پێی لێكۆڵینه‌وه‌كانیان؛ ئه‌و تیرۆرستانه‌ به‌شدارییان له‌ كوشتنی هاوڵاتیان و هێزه‌ ئه‌منییه‌كاندا كردوه‌. یه‌كێك له‌ ئه‌ركه‌كانیشان گواستنه‌وه‌ی كه‌سوكاری تیرۆرسته‌ كوژراوه‌كان و بوون به‌كه‌فیلیان بووه‌.

ژ.ت